Read Yucateco Salmos 51 Bible Online

Salmos 51 - Yucateco bible

Salmos 51

¹Yuumtzil, tu yo'olal a yaacunaje', ch'a'a teen óotzilil, tu yo'olal a nojoch muumun óolale', lukes in si'ipilo'ob.

²¡P'o'o in kasa'anil! ¡lukes in keeban!

³Quin kaj óoltic j ma' u'uyaj t'aanen; in kebane' ma' tu páajtal in tu'ubsic.

⁴J kebanchajen ti' teech, chéen ti' teech, tin beetaj le ba'ax ca xot kiintico', le o'olale' a xot kiine' jach tu beel; mina'an tu'ux u ya'ala'al wa ma' toj a p'is óol.

⁵Tu jaajile' kasa'anen líikbal ca j síijen, ma'ili' síijiquene' j kebanen.

⁶Tu jaajile' Yuumtzil a yaacuntmaj le jaaj pucsi'ikalo'; yéetel a dzaamaj ti' teen na'atil.

⁷Lukes in kasa'anil yéetel hisopo, ca p'áatac utz in wanil; p'o'ene' ca p'áatac asab saquen ti' nieve.

⁸Chupen yéetel nojoch qui'imac óolal: quex tumen dzo'oc a okomquiimsic in wóole', qui'imaccuuns in wóol tu ca'a téen.

⁹Náachcuns in kebano'ob ti teech lukes xan tuláacal in kasa'anilo'ob.

¹⁰Junab Ku ¡dzáaten jun p'éel sac pucsi'ikali'! ¡dzáaten jun p'éel túumben yéetel toj pixan!

¹¹Ma' a lukesiquen ta táan mix a luksic ti' teen a quili'ich pixan.

¹²Beet in wu'uyic tu ca'a téen u qui'imac óolil a tocsajil; áanten yéetel tuláacal u yutzil in pucsi'ikal

¹³u ti'al ca in ca'anbes a beelo'ob ti' le j ma' u'uyaj t'aano'. u ti'al xan ca suunaco'ob le aj kebano'ob ti' techo'.

¹⁴Ma' a cha'ic in wequic u ki'ikel mix máac, Junab Ku, u Kuil in tocsajil, beyo' bíin ka'ayt yéetel kaayo'ob, teche' aj ti'ibil bejech.

¹⁵Yuumtzil je'e' u bóoxel in chi'; yéetel u bóoxel in chi' bíin in qui'iqui' t'antech.

¹⁶Tumen ma' káat ti'ibil óolalilo'obi' mix le quiimsbil ba'alche'obo'; ca páatac in dzáictechi', ba'ale' ma' leti' a káati'.

¹⁷Le siibal unajmal u dza'abal ti' Yuumtzile' jun p'éel pixan cu mukyaj; ¡teche', Yuumtzil, ma' ta cúulpachcunsic jun p'éel pucsi'ikal xe'exe'et'paja'an!

¹⁸Tu yo'olal a sen utzile' beet utz ti' Sión; líikes tu ca'a téen u tuulumilo'ob Jerusalén.

¹⁹bey túuno' bíin a kam le quíimsbil ti'ibil óolalo'obutz ta t'aano', ba'alche'ob yéetel ti'ibil óolalo'ob tóoca'ano'ob; bey túuno' bíin ku'ubuc mejen wacaxo'ob tu multuunil a kulta'al.