Read Yucateco Salmos 52 Bible Online

Salmos 52 - Yucateco bible

Salmos 52

¹[2] ¿Mu'uka'an wíinic, ba'axten cu ca'analtal a wich tuyo'olal a kasa'anil? ¡U yaacunaj Yuum Kue' mina'an xu'ulul ti'!

²Chéen kaas ca tucultic a beetic; a waake' bey jun p'éel xotob sen yaan u yej, cu beeticloobe'.

³Ca táanilcunsic le kaaso' ti' le utzo'; ca táanilcunsic le tuuso' ti' le jaajo'.

⁴A'alaj ba'al aakech, ca táanilcunsic le t'aano'ob cu beetic loobo';

⁵ba'ale' Ku xane' yaan u xu'ulsiquech jun puli'; yaan u machiquech u xáacch'intech ti' a wotoch, cu dzo'ocole' cu lukesic a cuxtal.

⁶Le máaxo'ob cu yu'ubico'ob u t'aan Yuum Kue' le quéen u yilo'ob le ba'ax cu yúuchula' bíin u ch'a'ob sajaquilil, ba'ale' yaan u che'ejtico'ob le máaco' táan u ya'alico'ob:

⁷Il a wile'ex le máax ma' tu caxtic u yáantaj Kuo', le máax u kubmaj u yóol ti' nojoch ayikalilo' yéetel cu pechicubáa ichil u kasa'anilo'.

⁸Ba'ale' tene' beyen ya'ax olivo yanilen ichil u kulnaj Kue'; ¡mantadz yaan in kub óoltic u yaacunaj!

⁹Kue' mantadz yaan u dzáic teech nib óolal tu yo'olal ba'axta beetajo'; yaan in pa'ataj ti' teech tu táan le máaxo'ob u kubmaj u yóolo'ob ti' techo', tumen teche' utzech.