Read Yucateco Salmos 55 Bible Online

Salmos 55 - Yucateco bible

Salmos 55

¹In Ku, u'uy in payalchi'i'; táan óolt in káat óolal.

²U'uy in t'aani', núuc in payalchi'i'; tumen ichil in mukyaje' quin t'aniquech.

³U T'aan in aj p'eeco'ob yéetel u yawat le kaakasmáaco'obo' cu beetico'ob in quiquilaanquil. Dzo'oc u chupiqueno'ob yéetel yaj óolalo'ob, cu loobiltiqueno'ob yéetel p'uja'an óolal.

⁴In pucsi'ikale' táan u titi'ip'aanquil tin tzeem; tin wóokol yaan u sajaquilil quíimil.

⁵Dzo'oc u taal ti' teen jun p'éel nojoch sajaquilil; ¡táan in quiquilaanquil yéetel sajaquilil!

⁶Quin wa'alique': Quexi'i wa yaan teen xiiko'ob je'el bix u xiiko'ob sacpacale'; quin xiknal túun ca páatac in je'elel.

⁷Xiknalile' je'el u páajtal in bin tac náache'; je'el u páajtal in p'áatal cajtal x tocoy lu'ume'.

⁸Je'el in chich xiknal u ti'al in canantiquinbáa ti' u p'uja'anil le iiko' yéetel ti' le chac ikalo'.

⁹Xu'ulso'ob Yuumtzil, beet ma' u na'aticuba'ob, tumen chéen meyaj kaas yéetel kuuxilil quin wilic.

¹⁰Bul kiin yéetel bul áakab chéen táan u bakpachtico'oble caaja'. Ichile' yaan kasa'anil yéetel u tuuculil u beeta'al kaas; ichile' yaan talam kasa'anil,

¹¹chuup yanilo'ob u bejilo'ob yéetel meyaj kaas bey xan yéetel tuusil.

¹²wa in aj p'eec ca u ya'al teen ba'ale', je'el u páajtal in mukyajtique' wa jun túul máax u p'ecmailen ca líikic tin wóokole', je'el u páajtal in ta'aquiquinbáa ti'e'.

¹³Ba'ale' teech máax naadz yanil ti' teen, máax u kaj óol tuláacal in cuxtal,

¹⁴máax yéetel quin much'iquinbáa tu kulnaj Yuum Ku u ti'al c tzicbal yéetel núup óolal, máax yéetel quin xíimbal ichil; ya'ab máaco'ob, ¿ba'axten ca beetic teen lela'?

¹⁵¡Ca téec ch'a'abaco'ob tumen quíimil in aj p'eeco'ob! ¡Ca lúubuco'ob cuxa'ano'ob ichil mucnal! tumen le kasa'anilo' ti' yaan tu pucsi'ikalo'obe'.

¹⁶Ba'ale' tene' yaan in káat óolal ti' Yuum Ku. Le Yuumtzilo' yaan u toquiquen.

¹⁷Yaan in tac pool yéetel yaan in wokol ja'atzcab kiin ocnaj kiin bey xan yéetel áakab; leti'e' yaan u yu'ubic in t'aan.

¹⁸Ti' le ba'atelo'obo' yaan u toquiquen, yaan u toquic in cuxtal, Quex tumen sen ya'ab in aj p'eeco'ob.

¹⁹Junab Kue' cu ajawil u ti'al ja'abo'ob mina'an u xuulo', yaan u yu'ubiquen, yan xan u cabalcuntic u yóolo'ob; tumen leti'obe' ma' tu kexic u cuxtalo'ob mix sajaco'ob ti'Kui'.

²⁰Cu líiksico'ob u kabo'ob tu yóokol u aj p'eeco'ob, ma' tu dzo'ocbesico'ob u dzaa t'aano'ob.

²¹Jach u yojelo'ob u ch'ujucquinto'ob u t'aano'ob, ba'ale', ba'ax u káato'obe' ba'atel. U t'aano'obe' asab jajalqui ti' aceite ba'ale' beyo'ob máascabo'ob jóokesa'an u yejo'obe'.

²²P'at a yaayam óolalo'ob ti' Yuumtzil, leti' túune' yaan u dzáic teech jéedzel; mix bikin bíin u ch'a'a' u lúubul le máax toj u cuxtalo'.

²³In Ku le quíimsaj máaco'ob yéetel j tuuso'obo' ma' tu cuxtalo'ob mix táancoch u ja'abilo'ob; ba'ale' tene' in kubmaj in wóol ti' teech.