Read Yucateco Salmos 57 Bible Online

Salmos 57 - Yucateco bible

Salmos 57

¹[5] Ch'a'a teen óotzilil, in Ku, ch'a'a teen óotzilil, tumen ti' teech quin caxtic áantaj. In káat in ta'acbesimbáa tu yáanal a xiiko'ob tac quéen máanac le sajbe'enilo'.

²Bin in ca'aj in jach ka'am t'ant le sen ca'anal Kuo', le Junab Ku máax cu yáantiquen ti' tuláacal ba'alo'.

³Leti'e' yaan u túuxtic líikbal te j ca'ano' u yaacunaj yéetel u jaajil, yaan u toquiqueno'ob ti' le máaxo'ob cu ch'a'apachtiqueno'ob yéetel p'uja'an óolal.

⁴Luba'anen j lu'um, ichil leóno'ob cu jaantico'ob wíinic; u cojo'obe' beyo'ob pupudzquil lóonte'obe', beyo'ob xan julubo'obe', u yaake' jun p'éel máascab jóokesa'an u yej.

⁵In Ku ti' yanech tu yóokol le ca'ano'; A nojbe'enile' cu chupic tuláacal le lu'uma'.

⁶In aj p'eeco'obe' tu dzajo'ob teen jun p'éel léech u ti'al u lúubsico'ob in wóol; tu beetajo'ob jun p'éel jom lu'um tin beel, ba'ale' leti'ob lúubo'obi'.

⁷In pucsi'ikale' u dzaamaj u yóol, in Ku; in pucsi'ikale' u dzaama u yóol u ti'al u kay teech kaayo'ob.

⁸In pixan, aajen; paaxnen arpa, salterio paaxnen xan; ¡yaan in wajal táan u taalbal u tíip'il kiin!

⁹Yuumtzil, yaan in qui'iqui' t'antiquech yéetel kaayo'ob, chúumuc ti' caajo'ob yéetel ti' múuch' caajo'ob.

¹⁰Tumen a yaacunaje' nojoch tac te j ca'ano'obo'; a kub o'olale' cu kuchul tac te ch'ooj ca'ano'.

¹¹In Ku, teche' ti' yanech tu yóokol le ca'ano'; ¡a nojbe'enile' cu chupic tuláacal le lu'uma'!