Read Yucateco Salmos 59 Bible Online

Salmos 59 - Yucateco bible

Salmos 59

¹In Ku toquen ti' in aj p'eeco'ob, toquen ti' máaxo'ob loobiltiquen.

²Toquen ti' le j kasa'an máaco'obo', toquen ti' le loolob wíinico'obo';

³tumen yaan máaco'ob yaan páajtalil ti'obe' chéen táan u pa'atico'ob u kiinil u ti'al ca uquíimseno'ob.

⁴Yuumtzil, ma', j ma' u'uyaj t'aaneni', mixkebanchaja'aneni'; ma' in beet mix ba'al kaasi', ba'ale', quex beyo', táan u nu'ucbesiucuba'ob j lúubul tin wóokol. ¡Aajen, co'oten a nuptáanten, il xan le kaas cu yúuchula'!

⁵Yuumtzil u Junab Ku Israel, ti' máax yaan tuláacal páajtalil, aajen, jadz le máaxo'ob cu kultico'ob u j ma' jaajil Kuo'; ma' a ch'a'ic óotzilil ti' le loolob máaco'ob cu kubico'ob u yéet xiibilo'obo'.

⁶Cu suuto'ob yéetel áakab, beyo'ob peeko'ob cu yawat chi'ibalo'obe', yéetel cu máan u suuto'ob ich caaj.

⁷táan u yóomanquil u chi'obe' cu ya'alico'ob t'aano'ob cu meyaj loob: ¡Mix máac yaan u ti'al u yu'ubo'on!

⁸Ba'ale', teche' Yuumtzil, ca che'ejtico'ob; ca p'a'astic le máaxo'ob ma' tu kultico'ob u jaajil Kuo'.

⁹In Ku, ti' teech quin kubentiquinbáa, teech xan in muuk yéetel in wáantajil.

¹⁰Le Ku yaacuntmaileno', yaan u taal u nuptáanten; yaan u beetic in wilic u dzáanche'eta'al le máaxo'ob p'ecmaileno'.

¹¹Ma' a ch'a'ic óotzilil ti'ob u ti'al ma' u tu'ubsa'alo'ob tumen in caajal; ki'itbeso'ob yéetel a páajtalil, cabalcunt u yóolo'ob. ¡Yuumtzile', leti' c áantajil!

¹²Cu kebantalo'ob ti' tuláacal ba'al cu ya'alico'ob; ¡le o'olale' ca ka'alaco'ob ichil u ca'anal ichilo'ob yéetel ichil u chéen cunel ch'a'a chi'itajo'ob!

¹³¡Xu'ulso'ob, xu'ulso'ob yéetel a kuuxil! ¡Ca xu'uluc u cuxtalo'ob! ¡Ca ojéeltaque', Junab Kue' leti' ajaw líikbal Israel tac tu xuul yóokolcaab!

¹⁴Le quéen suunaco'ob yéetel áakab táan u chi'ibalo'ob beyo'ob peeke', yéetel quéen suutul suutnaco'ob ich caaj táan u caxtico'ob janale', yaan u yawat chi'ibalo'ob, tumen chéen jun p'íit janal cun u nuptáanto'ob.

¹⁶Ba'ale' tene' yaan in kaay ti' teech ja'atzcab kiin; yaan in ka'amcach ka'aytic a yaacunaj tac xan páajtalil; Tumen teche' ta betajabáa in wáantajil yéetel u cúuchilil tu'ux tin baljimbáa tu kiinil yaayaj óolal.

¹⁷Ti' teech quin in kay kaayo'ob, in Ku, tumen teech in muuk yéetel in wáantajil; ¡teech le Ku yaacuntmaileno'!