Read Yucateco Salmos 6 Bible Online

Salmos 6 - Yucateco bible

Salmos 6

¹Yuumtzil ma' a keyiquen ichil a p'uja'anil, ma' a jadziquen ichil a kuuxilil.

²Yuumtzil, ch'a'a teen óotzilil, tumen quin wu'uyiquinbáa x ma' muukil. Yuumtzil, sut ti' teen in toj óolal, tumen tuláacal in wíinclil táan u quiquilaanquil.

³Táan in quiquilaanquil yéetel sajaquil. Yuumtzil, teche', ¿ba'ax kiin a suut?

⁴Yuumtzil, co'oten, ¡toc in cuxtali'! ¡toquen tu yo'olal a yaabilaj!

⁵Mix jun túul máac wa quimene' cu páajtal u ka'asiquech; ¿máax je'el u páajtal u qui'iqui' t'antiquech wa ti' yaan ichil u mucnale'?

⁶Dzo'oc in sen ca'anal j okol. Áakab ca'a tac áakab quin sen okol, tac in káan jo'ol quin ch'ulic yéetel u ja'il in wich.

⁷Le ki'inamo' cu buudzquintic in paacat; ¡u budzpajal in wich tu yo'olal in aj p'eeco'ob!

⁸¡Tzelaba'ex tin wicnal loolob máaque'ex, Yuumtzile' dzo'oc u yu'ubic in jajak iik!

⁹Yuumtzile' dzo'oc u yu'ubic in káat óolo'ob, ¡Yuumtzile' dzo'oc u táan óoltic in payalchi'!

¹⁰In aj p'eeco'obe', sajac quimeno'ob, bíin pa'ajac u subtalo'ob; ¡chéen ichil jun mudz iche' sublaco'ob bíin áalcabnaco'ob!