Read Yucateco Salmos 60 Bible Online

Salmos 60 - Yucateco bible

Salmos 60

¹ku, Ichil a p'u'ujule', dzo'oc a xúump'attico'on. dzo'oc a mixba'alcuntico'on: ¡sut c muuk bejela'e'!

²Ta beetaj u quíilbal, ta beetaj xan u je'ejetpajal le lu'uma, ¡bejela'e' nup' teeililo'ob tumen táan u níiquil!

³Dzo'oc a beetic u máan a caajal ti' yaayaj túuntajilo'ob; dzo'oc a dzáic to'on jun p'éel ukul cu chocoquintic c pool;

⁴¡bejela'e' dzáa jun p'éel chíiculal ti' le máaxo'ob cu tziquiquecho'obo', u ti'al ca u jecho'ob le julubo'obo'!

⁵¡Núuct c t'aan, toco'on yéetel a páajtalil! ¡Toc le máaxo'ob a yaacuntmajo'!

⁶Kue' u ya'almaj tu quili'ich najil: ¡Yéetel buca'aj qui'imac óolalil quin in jatz Siquem, yéetel quin in t'ox u táan lu'umil sucot!

⁷Galaad yéetel Manasese' in ti'alo'ob; Efraine' u nu'uculil in pixic in pool; Judae' u xóolte'il in jala'achil.

⁸Moabe' u nu'ucul tu'ux quin p'o'iquimbáa. tu yóokol Edome' yaan in pulic in xanab, ¡yaan in wawat tu yo'olal le dzáanche'etajil tu yóokol le filisteobo'!

⁹¿Máax je'el u bisiquen ti' le caaj yaan u tuulumilo'? ¿Máax je'el u bisiquen tac Edome'?

¹⁰Ku, tumen teche', dzo'oc a p'atico'on; ¡bejela'e', ma'atech a jóokol yéetel c ba'atel máaco'ob!

¹¹Áanto'on c ba'atelt c aj p'eeco'obi', tumen mix ba'al u biilal u yáantaj wíiniqui'.

¹²Yéetel u yáantaj Kue', je'el u páajtal c beetic nucuch ba'alo'obe'; ¡leti' cun u yach' le c aj p'eeco'obo'!