Read Yucateco Salmos 64 Bible Online

Salmos 64 - Yucateco bible

Salmos 64

¹In Ku u'uy in tac pool; canant in cuxtal ti' loolob aj p'eeco'ob.

²Ta'aquen ti' le kaakas máaco'obo' yéetel ti' u x mucul tuuculo'ob; toquen ti' u loolob tuucul le kaakas máaco'obo',

³máaxo'ob cu jóokesico'ob u yej u yaako'ob bey u yej máascabe' yéetel cu jóokol tu chi'obe', t'aano'ob cu quíimsaj bey julubo'obe'.

⁴Tac tu'ux u ta'acmajuba'obe' cu pulic u julubo'ob tu yóokol le máac mina'an u si'ipilo'; x ma' sajaquile', cu téec julubtico'ob.

⁵Cu líiksic u yooco'ob tu baatzilo'obe' u ti'al u beeto'ob ba'al kaas; cu jokjo'oltico'ob u dzáico'ob ta'acbil léecho'ob, táan u tucultico'obe' ma' tu páajtal u yila'alo'ob tumen mix máac,

⁶mix xan bíin káat chi'ita'aco'ob tu yo'olal ukasa'anilo'ob. Ba'ale' le máax yaan páajtalil ti' u asab taamil u tuucul máaque', leti' bíin u xakalt u asab taamil tuláacal ba'al.

⁷Yuum Ku cun loobiltico'ob yéetel julubo'ob chéen quéen téec loobilta'aco'ob;

⁸yéetel u t'aano'ob bíin lúubuco'ob, yaan u p'a'asta'alo'ob tumen le máaxo'ob cun ilico'obe'.

⁹Bey túuno' yaan u tzi'iquil Ku tumen tuláacal máac yéetel yaan u tzicbaltico'ob ba'axo'ob cu beetic; yaan u kuchul u na'ato'ob le ba'ax tu beetaj Yuum Kuo'.

¹⁰Le utzil máaco' yaan u qui'imactal u yóol ti' Yuumtzil, yéetel ti' leti' cun j taal u yáantajil; tuláacal le máaxo'ob toj u pucsi'ikalo'obe' yaan uqui'imactal u yóolo'ob.