Read Yucateco Salmos 66 Bible Online

Salmos 66 - Yucateco bible

Salmos 66

¹Kaaynene'ex ti' Yuum Ku yéetel qui'imac óolal, u cajnáalile'ex tuláacal le lu'umo';

²kaye'ex kaayo'ob ti' u nojbe'en kaaba'; kaye'ex ti' nojbe'en qui'iqui' t'aano'ob;

³A'ale'ex ti' Yuum Ku. A meyajo'obe', jak óolbe'eno'ob. tu yo'olal a nojoch páajtalile' a aj p'eeco'obe' cu lúubulo'ob tu yéetel sajaquil ta táan;

⁴tuláacal u yóokol caabe' cu kultiquech yéetel cu kayic kaayo'ob ti' a kaaba'.

⁵Co'otene'ex a wile'ex u meyajo'ob Ku, le jak óolbe'en ba'alo'ob tu beetaj tu yo'olal máaco'ob:

⁶le ka'anabo' tu sutaj tiquin lu'umil, c úuchben taataobe', j máano'ob xíimbalil ichil le áalcab ja'o'. ¡qui'imacchajac c óol ti' Yuum Ku!

⁷Yéetel u páajtalile' leti'e' cu beetic u jalachil mantadz; u yicho'obe' cu cananpactic le múuch' caajo'obo', u ti'al beyo' le j ma' u'uyaj t'aano'obo', ma' u líikilo'ob tu yóokol leti'.

⁸¡Múuch' caaje'ex qui'iqui' t'ante'ex Yuum Ku! ¡beete'ex u juum u qui' óolal a kaaye'ex!

⁹Tumen dzo'oc u bisico'on tu yéetel cuxtal, ma' u cha'a c lúubuli'.

¹⁰C Ku, a dzaamajo'on ti' túuntajil; dzo'oc a p'o'ic c kaasil je'el bix u beeta'al ti' platae'.

¹¹Dzo'oc a beetic c lúubul ti' le x léechebilo'; ta dzaj c cuch jun p'éel talam mukyaj;

¹²Ta p'ataj u xanabcha'atico'on jun túul je'el máaxaque'; dzo'oc c máan ich káak yéetel ich ja', ba'ale' dzo'oc a kuchul a dzáic to'on ch'a'a iikil.

¹³Bíin ocoquen ta kulnaj ca in tóoc ti'ibil óolalo'ob ta táan; bey quin in dzo'ocbesic a dzaa t'aano',

¹⁴leti'e' séeb chi'ob tin beetaj teech le ca tin wilajimbáa ichil sajbe'entzile'.

¹⁵Bíin in tóoc tu yóokol u multuunil a kultaj u poloquil ba'alche'ob; bíin in dzáa ti' teech wacaxo'ob yéetel j xiibil yuuco'ob, bey xan u qui'iboquil le j tamano'obo'.

¹⁶¡Co'otene'ex tuláacale'ex, le máaxe'ex yaan te'ex u sajac tziiquil Yuum Ku! ¡U'uye'ex, bin in ca'aj in tzicbalt te'ex le ba'ax dzo'oc u beetic leti' tin wo'olale'!

¹⁷Yéetel in chi' bey xan yéetel in waake' tin t'aanaje', yéetel xan tin qui'iqui' t'antaj.

¹⁸Wa ca yanac ti' teen kaakas tuuculo'obe', Yuumtzile' ma' bíin u yu'uben ca'achi';

¹⁹¡ba'ale' leti'e' tu yu'ubajen tu núucaj xan in payalchi'ob!

²⁰¡Qui'iqui' t'anta'ac Yuum Ku, tumen ma' tu cúulpachtaj in payalchi' yéetel ma' tu lukesaj teen u yaacunaji'!