Read Yucateco Salmos 68 Bible Online

Salmos 68 - Yucateco bible

Salmos 68

¹Le quéen ococ Yuum Ku u ti'al j ba'atele', u aj p'eeco'obe' cu ki'itpajalo'ob; le máaxo'ob p'ecmaile', cu púudzulo'ob tu táan;

²cu sa'atalo'ob bey buudz ichil le iiko', cu yíibilo'ob bey quib ichil le káako'; ¡tu táan Kue', quimen yanil le loolob máaco'obo'!

³Ba'ale' le utzil máaco'obo', cu qui'imactal u yóolo'ob; tu táan Yuum Kue' cu chu'upulo'ob yéetel qui' óolal. ¡cu síit'o'ob yéetel qui'imac óolal!

⁴Te'exe' kaaynene'ex ti' Yuum Ku, kaye'ex kaayo'ob ti' u kaaba'; qui'iqui' t'ante'ex le máax cu bin tu yóokol le múuyalo'obo'. ¡Qui'imacchajac a wóole'ex ti' le Yuumtzilo'! Qui'imacchajac a wóole'ex tu táan.

⁵Yuum Ku cajacbal ichil u kulnaje' leti' u taata le j ma' taataobo' yéetel u tocsaj le x quimen íichamo'obo'.

⁶Kue' cu dzáic ti' le máaxo'ob chéen tu juuno'obo', cúuchil tu'ux u cajtalo'ob, cu jáalkabtic le máaxo'ob kala'ano'obo', yéetel cu dzáic ti'ob ayikalil; ba'ale' le j ma' u'uyaj t'aano'obo' bíin cajlaco'ob ti' sa'am lu'um.

⁷Ku, le ca jóokech tu táan a caajale' le táan a bin tu yéetelo'ob te x tocoy lu'umo',

⁸le lu'umo' quíilbanaji, líikbal ca'ane', káax cháac, Sinaie' quíilbanaj tu táan Yuum Ku, tu táan u Kuil Israel.

⁹Ku, teech ta beetaj u káaxal ya'abcach ja' u ti'al ca a dzáa túumben muuko'ob ti' a tiquin lu'umo'.

¹⁰A caajale', cajlaj te'elo'; teech túune', tu yo'olal a wutzile', ta dzaj ti' le óotzilo', le ba'ax kabéet ti'e'.

¹¹Yuumtzile' tu dzáa jun p'éel t'aan u ti'al bisbil; ya'abcach co'olelo'obe' tu ka'aytajo'ob:

¹²¡Táan u púudzul le ajawo'ob yéetel u ba'atel máaco'obo'! Te j najo'obo' le co'olelo'obo' cu t'oxico'ob le ba'alo'ob lukesa'ab ti' le aj p'eeco':

¹³ba'ale' te'exe' j páate'ex a ta'acmaba'ex. ¡U xiiko'ob sacpacalo'ob búucbesa'ano'ob yéetel ma'alob plata! ¡U kukmelo'obe' pixa'ano'ob yéetel ma'alob oro!

¹⁴Le ca j beeta'ab u púudzul le ajawo'ob tumen Junab Ku ti' máax yaan tuláacal páajtalil, táan u káaxal u p'úuyulo'ob ye'eb tu yóokol u pu'uquil Salomono'.

¹⁵¡Buca'aj u ca'anlilo'ob u pu'uquilo'ob Basane', yéetel buca'aj ca'anlil u jo'ol lu'umilo'obe'!

¹⁶Te'ex sen ca'anal pu'uque'exe', ¿ba'axten ca pactique'ex yéetel dzíibolal le pu'uc tu yéeyaj Yuum Ku u ti'al u cajtalo'? ¡Yuumtzile', te cun cajtalo', u ti'al ja'abo'ob mina'an u xuul!

¹⁷Kue' yaan ya'abcach u bolanilo'ob u ba'atel; jóok sinaí j taal tu yéetelo'ob tac tu kulnaj.

¹⁸Ku, na'aquech te ca'analo' táan a bisic le máaco'ob kala'ano'obo', ta kamaj siibal ti' leti'ob, tac xan le j ma' u'uyaj t'aano'obo', tu kubjuba'ob ti' teech, Yuumtzil.

¹⁹¡Qui'iqui' t'aan u ti'al Yuum Ku c tocsajilo', tumen cu bisic sáamsamal le c cuucho'obo'!

²⁰C Junab Kue' jun túul Ku cu tocsaj cu páajtal xan u toquico'on ti' quíimil.

²¹Yuum Kue' yaan u pa'ic u pool c aj p'eeco'ob, u pool le máaxo'ob xi'ic u bin u kebantalo'obo'.

²²Yuumtzile' u ya'almaj: Yaan in beetic u jóokol Basán; yaan in beetic u jóokol ti' le taamtam ka'anabo',

²³u ti'al ca páatac a p'o'ic a wooco'ob yéetel u ki'ikel aaj p'eeco'ob yéetel ca u'ukuc xan tumen peeko'ob.

²⁴Yuum Ku, in Ku, in ajaw, te ta kulnajo' cu yila'al u tzóol xíimbal le máaco'ob iquilu kiinbesa'al a tzicbe'enilo'.

²⁵Le máaxo'ob cu kaayo'obo', táanil cu bino'ob, le cu paaxo'obo' paachil cu bino'ob, tu chúumuque' le x lo'obayano'obo' táan u bin u paxico'ob u panderetaob.

²⁶¡Tuláacale'ex utzil t'ante'ex le Yuumtzilo'! ¡Utzil t'anta'ac Yuum Ku tumen u múuch'cabil Israel!

²⁷Táanil ti'obe' cu bin Benjamín le j t'uupo' yéetel u ya'abcach nuuctaquil Judá, Sabulón yéetel Neftalí.

²⁸In Ku, e'es a páajtalil; ¡u ti'al ca ila'ac le ba'ax ta beetaj t o'olalo'!

²⁹Líikbal ta ca'anal kulnaj yaan Jerusaleno', le tu'ux cu taasico'ob teech siibalo'ob le ajawo'obo',

³⁰key Egipto u ba'alche'il le jalalo'obo', le u múuch'cabil le dzíidzic wacaxo'ob yéetel u mejen wacaxo'obo'; tu yo'olal u dzaamail u yóolo'ob ti' ayikalile' ca pepe'echa'atico'ob le caajo'obo', ¡ki'itbes le máaco'ob u yaacuntmajo'ob le ba'atelo'!

³¹Líikbal Egiptoe', yaan u taal jalach wíinico'ob, Etiopiae' yaan u líikesic u kabo'ob ti' Junab Ku.

³²¡Kaaynene'ex ti' Yuum Ku u ajawile'ex lu'um; kaye'ex kaayo'ob ti' Yuumtzil,

³³ti' le máax yaan te j ca'ano'obo', te j úuchben ca'ano'obo'! U'uye'ex bix u juum u t'aan, le t'aan yaan u páajtalilo'.

³⁴Kaj óolte'ex u páajtalil Ku; u nojbe'enile' ti' yaan tu yóokol Israele', u páajtalile' cu kuchul tac te j ca'ano'.

³⁵Jakbe'en Yuum Ku te tu quili'ich najilo'; le u Ku Israelo' cu dzáic páajtalil yéetel muuk ti' ucaajal. ¡Qui'iqui' t'anta'ac Yuum Ku!