Read Yucateco Salmos 69 Bible Online

Salmos 69 - Yucateco bible

Salmos 69

¹Toqueni', in Ku, tumen ta'itac u búulul in ni';

²táan in búulul ichil jun p'éel taamtam áakal, mina'an tu'ux in jedzic in wooc. Dzo'oc in kuchul tac tu asab taam le ja'o', táan ujíiltiquen u yáalcab ja'il

³dzo'oc u ma'astal in caal iquil in sen awat; yaj in caal; ¡ca'anantac in wich iquil in sen pa'atic in Ku!

⁴Asab ya'ab in aj p'eeco'ob kuuxiltiqueno'ob tu yo'olal mix ba'al ti' u ya'abil u tzo'otzelo'ob in pool; dzo'oc u ya'abtal u muuko'ob le máaxo'ob p'ecmaileno', le máaxo'ob xu'ulsiquen chéen tu yo'olal mixba'alo', u káato'ob ca in sut ba'ax ma' in wocoltmaji'.

⁵In Ku teche' a wojel buca'aj in ma' na'atil; ma' táan u páajtal in ta'aquic teech in kebano'ob.

⁶Yuumtzil, teche' u Kuilech tuláacal páajtalil, ¡ma' u máansico'ob subtzilil tu yo'olal in si'ipil le máaxo'ob u yoquesmajo'ob u yóolo'ob ti' techo'! U Ku Israel, ¡ma' u lúubul; u yóolo'ob tin wo'olal le máaxo'ob yéetel yaayam cu caxtiquecho'obo'!

⁷Ta wo'olale' dzo'oc in mukyajtic u beeta'al teen kaas; chuup u táan in wich tu yéetel subtzilil;

⁸¡beyen jun túul táanxel caajil u ti'al in sucu'uno'obe'; ma' kaj óola'anen tumen u paalalo'ob in maamai'!

⁹Tumen in kub óolal ti' u yaacunajil a najile' cu xul óoltiquen; tuláacal le pooch'il cu beeta'al techo' tin wóokol cu lúubul.

¹⁰Quin wokol, quin su'ukin, ba'ale' leti'obe' cu p'a'astiqueno'ob;

¹¹wa quin búuquintic u nookil okom óole', chéen u ti'al u che'ejtiqueno'ob.

¹²Ti' yanen tu chi' le máaxo'ob cu much'talo'ob u ya'alo'ob ba'alo'ob, tac le cala'ano'obo' cu beetico'ob in kaayilo'ob.

¹³Ba'ale' tene' quin ch'a'a chi'itiquech, Yuumtzil In Ku, ¡áanten bejela'e'! Tu yo'olal a nojoch yaacunaje' ¡u'uyeni'! Tu yo'olal a mantadz áantaje' ¡toqueni'!

¹⁴¡Ma' a cha'ic in búulul ich luuk Toquen ti' le máaxo'ob u p'ecmajeno'obo' bey xan ti' le taamcach ja'o'!

¹⁵¡Ma' a cha'ic u jíiltiquen u muuk u sayabil! ¡Ma' a p'atiquen tu tojil u xúuch le ja'o'. bic u xúuchen ca u kalen tu taamil!

¹⁶Núuquen, Yuumtzil; ¡teche' utzech, yéetel nojoch a yaacunaj! Tu yo'olal u nojochil a yaacunaje', pacteni',

¹⁷¡ma' a tzelic ta táan le palitzila'! ¡Núuquen tu séeblaquili' tumen tu chi' quíimil yanen!

¹⁸Nadzabáa ti' teen, toqueni'. ¡Toquen ti' in aj p'eeco'ob!

¹⁹Teche' a wojel u pooch'iqueno'ob, bey xan le subtzilil bey le a'alaj ba'alo'ob dzo'oc in mukyajtico'; teche' a woojel máaxo'ob in aj p'eeco'ob.

²⁰Le pooch'ilo'obo' dzo'oc u beetico'ob loob tin pucsi'ikal; ¡mina'an in wóol mix xan in muuk! Chéen cunel in caxtic máax u ch'a'a teen óotzilil, máax cun u qui'imaccunt in wóol.

²¹Tu dzajo'ob teen káaj ba'al in jaante, le ca j ukajchajen xane', tu dzajo'ob teen su'udz ja' inwuke'.

²²¡U mayacche'il u janalo'ob yéetel janalilo'ob xane' ca súutkajaco'ob léechil u ti'alo'ob!

²³¡Beet u ch'óoptalo'ob mantadz ca páatac xan quiquilnac u tzeleco'ob!

²⁴Nijcunt a p'uja'anil tu yóokolo'ob; ¡ca chucpachta'aco'ob tumen a chocoil p'uja'anil!

²⁵ca júutuc tu'ux caja'ano'ob, yéetel ma' u p'áatal mix máac tu najilo'ob;

²⁶tumen táan u ch'a'apachtico'ob le máax ta dzaj yaayaj óolal ti'e', yéetel cu p'a'astico'ob le máax ta cha'aj u mukyaje'.

²⁷Ya'abcuns u si'ipilo'ob yéetel le kaas cu beetico'oba'; ¡ma' u kuchul u ti'alinto'ob a sa'atsajil!

²⁸¡Tup u kaaba'ob ti' u ju'unil le cuxtalo'! ma' a dzáico'ob tu'ux dzíibta'an u kaaba'ob le utzo'obo'.

²⁹Ba'ale' tene' koja'anen yéetel yaj in wóol, líiksen, in Ku, yéetel toqueni'.

³⁰Yuum Ku, bíin in qui'iqui' t'ant yéetel kaayo'ob akaaba'; bíin in nojbe'encunt yéetel qui'iqui' t'aan.

³¹Beyo' Yuumtzile' yaan u p'áatal asab qui'imac u yóol, ti' ca in quiims jun túul wacax u ti'al in kub ti', wa jun túul chan wacax yaan u baaco'ob yéetel u maayo'ob.

³²Le quéen u yilo'ob lela', yaan u qui'imactal u yóolo'ob le j yaayaj óolo'obo'; yaan u yantal u yóol u pucsika'al le máaxo'ob caxtic Kuo',

³³tumen Yuumtzile' cu yu'ubic le óotzilo'obo' yéetel ma' táan u cúulpachquintic le u ti'alo'ob, kala'ano'obo'.

³⁴¡Ca qui'iqui' t'anta'ac tumen ca'an, lu'um, ka'anab yéetel tumen tuláacal le caja'ano'ob te'elo'!

³⁵Tumen Yuum Kue' bíin u toc Sión yéetel yaan u ca'a líiksic u noj caajilo'ob Judá; u paalalo'ob u palitzilo'obe', bíin u ti'alinto'ob le noj caajo'; bíin u ch'a'ob yéetel ti' bíin cajlaco'obi'; ¡le máaxo'ob yaacuntmail u kaaba'e', leti'ob bíin cajlaco'obi'!