Read Yucateco Salmos 7 Bible Online

Salmos 7 - Yucateco bible

Salmos 7

¹Yuumtzil, in Junab Ku, ti' teech quin caxantic áantaj. ¡toquen ti' tuláacal le máaxo'ob ch'a'apachtiqueno'!

²¡Toqueni', tumen beyo'ob leóne'; ma' xan ca u xe'exet'eno'obi', ca mina'anac máax toquiqueni'!

³Yuumtzil, in Junab Ku, ¿ti' ba'ax sipa'anen ichil le ba'alo'oba'? ¿Yaan wa máax in quíimsmaj?

⁴¿Dzo'oc wa in bo'otic yéetel kaas le utz tu beetaj ten in wéet óolalo'? ¿Dzo'oc wa in yedzic in aj p'eec tu yo'olal mix ba'al?

⁵Wa beyo' in aj p'eeque' ca u ch'a'apachten. ca u chucpachten ca xan u jíilten j lu'um, ca u balakcunt j lu'um in tziiquil.

⁶¡Yéetel p'uja'anil Yuumtzil, líiken! ¡Dzáaba tu táan u p'uja'anil in aj p'eeco'ob! Teech máax a'almail a beetic ba'ax tu beele', ¡dzáaba tin tzéel!

⁷Bakpachtabáa yéetel u múuch'ul nucuch caajo'ob dzáa xan a jalach káanche' tu yóokolo'ob, te ca'analo'.

⁸Yuumtzil teech p'is óoltic le nucuch caajo'obo'; p'is óolten je'el bix le ba'axo'ob quin beetic tu beele': P'is óolten je'el bix in x ma' si'ipilil.

⁹Junab Ku, teech máax beetic ba'ax toj. teech máax xakaltic le tuuculo'ob yéetel ba'axo'ob yaan tu' dzu' le pucsi'ikalo'obo', ¡beet u xu'ulul u meyaj loob le aj loobo'obo', ba'ale' le máac toj u cuxtalo' ma' cha'ic u lúubul!

¹⁰In aj canane', leti' u Junab Kuil ca'an, leti' máax toquic le máaxo'ob jaaj yóol u pucsi'ikalo'obo'.

¹¹Junab Kue' leti'e' toj Aj p'is óol, mantadz cu xot kintic le kasa'anilo'.

¹²Wa le wíinic ma' tu suut ti' Junab Kue', Kue' cu ja'ic u ca'amat yej máascab; dzo'oc u t'inic u p'úun che',

¹³u ni' u julubo'obe' t'aba'an yanilo'ob, dzo'oc u nu'ucbesic u nu'uculo'ob iquil u quíimsaj.

¹⁴Ile'ex le j loolob máaco'; yaan u ki'inamil síisaj ti', Koja'an yanil ti' u kasa'anil bíin u síijes tuus.

¹⁵Dzo'oc u je'ic jun p'éel mucnal jach taam, ti' bíin lúubuc ichil le mucnal tu páanajo'.

¹⁶¡U kasa'anil yéetel u meyaj loobe', bíin lúubuco'ob jach tu yóokol u pool!

¹⁷Bíin in qui'iqui' t'ant le Yuumtzilo', tumen leti'e' toj; yaan in kayic kaayo'ob tu kaaba' le Yuumtzilo', tu kaaba' u Junab Kuil ca'an.