Read Yucateco Salmos 71 Bible Online

Salmos 71 - Yucateco bible

Salmos 71

¹Yuumtzil ti' teech quin caxtic áantajil; mix bikin ca a p'aten ich subtzilil.

²¡Jáalkabten, áanteni', tumen teche' tojech! Beet utz a wu'uyiquen yéetel toqueni'.

³Beetabáa a nojoch tuunichil yéetel ¡u ca'anal u castilloil tu'ux quin baliquinbáa yéetel tu'ux quin toquiquinbáa! ¡Teeche' in nojoch tuunich yéetel in tuulum naj!

⁴In Ku, toquen tu kabo'ob le loolob máaco', bey xan ti' u kabo'ob le quíimsaj wíinico' yéetel ti' le dzíidzic máaco',

⁵tumen teeche' Yuumtzil, teech in pa'atajil líikbal tin táanquelmil teech xan in ma'alob alab óolal.

⁶Ti' yanili'en tu jobnel in maamae' in dzaamaj ti' teech in pa'atajil. ¡Teech ta beetaj in síijil! ¡Tene' yaan in qui'iqui' t'antiquech mantadz!

⁷Tin beetiquinbáa jak óolal u ti'al ya'abcach máaco'ob, ba'ale' teech in ta'acbesajil.

⁸Bul kiin, chuup in chi' Yéetel qui'iqui' t'aano'ob ti' a nojbe'enil;

⁹ma' a cúulpachtiquen le quéen nuxibchajquen, ma' a xúump'attiquen le quéen lúubuc in muuko'ob.

¹⁰In aj p'eeco'ob le máaxo'ob u káato'ob u quíimseno'obe' dzo'oc u much'icuba'ob tin wóokol u ti'al u beeto'ob teenloob.

¹¹Cu ya'alico'ob: Ch'a'apachte'ex yéetel mache'ex, dzo'oc u pa'ata'al tumen Ku; mix máac je'el u páajtal u toquique'.

¹²Ma' a náachtal ti' teen in Ku; ¡co'oten tu séeblaquil a wáanten!

¹³¡Ca sublacquinta'aco'ob yéetel ca xu'ulsa'aco'ob u aj p'eeco'ob in cuxtalo'! ¡Ca pa'ajac u subtalo'ob le máaxo'ob cu dzíiboltico'ob kaas tin wóokolo'!

¹⁴Ba'ale' tene' yaan in pa'ataj ti' teech mantadz, yaan xan u asab bin u bin in qui'iqui' t'antiquech;

¹⁵tuláacal kiin quin in ka'ayt dzo'oc a lojico'on yéetel dzo'oc a beetic ba'al toj ti' to'on. ¡Lela' jun p'éel ba'al ma' tin kuchul in ch'a'anu'ucte!

¹⁶Yuumtzil, yaan in tzicbaltic le nucuch meyajo'ob tabeetajo'; ¡yaan in dzáic ojéeltbil, chéen teech tojech!

¹⁷In Ku teech ta ca'anbesajen líikbal tin táanquelemil; tac bejela'e' táan in ka'aytic a nucuch meyajo'ob.

¹⁸In Ku, le quéen nuxibchajquene' ma' a xúump'atiquen bey le quéen we'ej sacac u tzo'otzel in pool, tumen láili' yaan in tzicbaltic le a nojoch páajtalil ti' le ch'i'ibalo'oba' yéetel ti' le bíin taalaco'obo'.

¹⁹A tojile', Yuum Ku, cu kuchul tac ca'an; teche' ta beetaj nucuch meyajo'ob, ¡mina'an mix máac je'el bix teche'!

²⁰Quex tumen a beetmaj in wilic ya'abcach loobo'ob yéetel yaj óolo'obe', yaan a beetic in cuxtal tu ca'a téen; yaan a líikesiquen ti' u taamil le lu'umo';

²¹yaan a asab nojochquintiquen yéetel yaan a qui'imaccunsic in wóol tu ca'a téen.

²²Tene' ba'ax quin in beete' yaan in kayic kaayo'ob yéetel yaan in qui'iqui' t'antic a tojil ti' u juumbal paaxo'ob, in Ku, u quili'ichil Israel.

²³Yaan u qui'imactal u yóol in chi' quéen kaaynac ti'teech, bey xan le in pixan a lojmajo'.

²⁴In waak yaan u ya'alic láaj kiin, teche' tojech, tumen le máaxo'ob u káato'ob ca'ach in loobile' dzo'oc u chu'upulo'ob yéetel sublaquil.