Read Yucateco Salmos 72 Bible Online

Salmos 72 - Yucateco bible

Salmos 72

¹Ku, dzáa ti' ajaw a tojil, ti' u paal ajawe' a ti'ibil bejil,

²u ti'al ca u beet u jalachil tu yóokol a caajal bey tu yóokol a wóotzilo'obe' yéetel p'is óol bey xantojil.

³Le pu'uco'ob yéetel le witzo'obo' ca u dza'ob jéedzelyéetel tojil ti' a caajal.

⁴¡Ca u beet le ajawo' le ba'ax toj ti' le óotzilo'obo'! ¡Ca u toc u paalal le máax mix ba'al yaan ti'obo' yéetel ca u pech' le máaxo'ob cu pech'co'ob wíinico'!

⁵¡Ca yanac mantadz u sajac tziiquil le ajaw ti' teech ca'aliquil yano'ob le kiin yéetel le ujo'!

⁶¡Leti'e' ca béeyac je'el bix le ja' cu káaxal tu yóokol le su'uco' yéetel je'el bix le ye'eb cu jóoyabtic le lu'uma'!

⁷¡Ca sen yanac jéedzelil yéetel tojil ti' u kiinilo'ob u jalachil, tac u kiinil le quéen xu'uluc le ujo'!

⁸¡Ca u beet u jalachil ti' jun p'éel ka'anab tac tu láak ka'anab, u cáajbal ti' u áalcab ja'il Éufrates tac tu xuul yóokolcaab!

⁹¡U cajnáalilo'ob le x tocoy lu'umo' ca u kububa'ob tu táan leti', u aj p'eeco'obe' ca u léedzo'ob lu'um!

¹⁰¡Ca u taaso'ob ti', siibalo'ob yéetel bo'olo'ob uajawilo'ob Tarsis yéetel le peteno'obo', bey xan u ajawilo'ob Sabá yéetel Seba!

¹¹¡Ca xolac tu táan, tuláacal le ajawo'obo'! ¡Ca meyajta'ac tumen tuláacal le caajo'obo'!

¹²Tumen leti'e' bíin u toc le óotzil cu káat óolalo' yéetel xan le máaxo'ob pech'a'ano'ob mina'an mix máac áantico'obo'.

¹³Bíin u ch'a'a óotzilil ti' le j cabal óolo'obo' yaan u toquic u cuxtal le óotzilo'obo'.

¹⁴Yaan u toquico'ob ti' le yeedzilo' yéetel ti' le jáanpay óolo', tumen u ti'al leti'e' jach co'oj u cuxtalo'ob.

¹⁵¡Ca cuxlac le ajawo'! ¡Dza'abac ti' u oroil Sabá! ¡Mantadz ca úuchuc káat óolal ti' Ku tu yo'olal leti'! ¡Mantadz ca qui'iqui' t'anta'ac!

¹⁶¡Ca yanac ya'abcach ba'al jantbil te j caajo'obo', ca ya'abac xan tu ca'analil le pu'uco'obo! ¡Ca yi'ibanac janalne'en neeko'ob bey xan te j Líbano', ca jadzutzac le caajo'obo' je'ebix u lool le xíiwo'ob te j káaxo'!

¹⁷¡U kaaba' ajawe' ca p'áatac mantadz; u péectzilile' ca xáanac je'el bix u xáantal le kiino'! ¡Tu yo'olal leti'e' ca u kamo'ob qui'iqui' t'aano'ob tuláacal u múuch' caajilo'ob yóokol caab! ¡Ca a'ala'ac qui' u yóol, tumen tuláacal le múuch' caajo'obo'!

¹⁸Mantadz qui'iqui' t'aanta'ac Junab Ku c Yuumtzil, u Ku Israel, le máax chéen leti' beetic le nucuch ba'alo'obo'.

¹⁹Mantadz qui'iqui' t'aan ti' u nojbe'en kaaba'. ¡Ca chu'upuc tuláacal le lu'um yéetel u nojbe'enil! ¡Ca béeyac!

²⁰Te'ela' cu dzo'ocol u payalchi'ob David u paal Isaie'.