Read Yucateco Salmos 73 Bible Online

Salmos 73 - Yucateco bible

Salmos 73

¹Buca'aj utzil Yuum Ku yéetel Israel bey xan yéetel le j sac u pucsi'ika'alo'obo'.

²Jun láak p'íite' dzo'oc ca'ach in lúubule'; in wooco'obe' óoli' jacchajo'ob.

³Le ca tin wilaj bix u ayikaltal le ca'anal icho'obo' yéetel le j loolob máaco'obo', tin dzíiboltaj in béeytal je'ebixo'obo'.

⁴Leti'obe' ma' tu tucultico'ob wa yaan quíimil, tumen chuupo'ob yéetel toj óolal;

⁵ma' u mukyajmajo'ob u yaj óolo'ob wíinico'obi', mix yanchajo'ob ich yamyamil je'el bix u láak máaco'obo'.

⁶Le o'olale' le ca'anal ichilo' leti' u léech caal yéetel le jáanpay óolalo' leti' u búuc;

⁷jach chuupo'ob yéetel kasa'anil; le o'olale' tu pucsi'ikalo'obe' cu jóokol kaakas tuuculo'ob.

⁸Yéetel p'a'as, ca'anal ichil bey xan yéetel x ma' muclile' cu ya'alico'ob u beetico'ob loob bey xan le jáanpay óolalo';

⁹cu ya'alico'ob ba'al ti' le ca'ano'; cu yáalcabtico'ob xan le lu'umo' yéetel u ya'alaj ba'alo'ob.

¹⁰Le o'olale' ya'ab máac cu bin tu paacho'ob mix xan cu yila'al mix jun p'éel kaas tu cuxtalo'ob.

¹¹Cu ya'alico'ob: ¿Je'el wa u kuchul u yojéelt Kue'? ¿Je'el wa u kuchul ilbil tumen le J sen ca'anilo'?

¹²¡Ile'ex le j loolob máaco'oba'! yéetel x ma' chi'ichnaquile' táan u ya'abcuntic u ayikalilo'ob.

¹³¡Mix ba'al u biilal u yantal teen jun p'éel sac pucsi'ikal yéetel ca in p'o'o in kabo'ob ti' tuláacal kaas!

¹⁴Tumen ti' tuláacal súutuque' quin kamic jaadzo'ob, yéetel quin ja'adzal xan ti' sáamsamal ja'atzcab kiin.

¹⁵Wa ca tuuculnaquen ca'ach je'el bix leti'obe', dzo'oc ca'ach in cúulpach loobiltic a paalalo'obe'.

¹⁶Tin dzajinbáa in na'at lela'. ba'ale' jach talamchaj ti' teen.

¹⁷P'iis le ca j ooquen ichil u yotoch Kue' kuchen in ch'a'anu'uct bix cun dzo'ocolo'ob:

¹⁸a dzaamajo'ob ti' jun p'éel cúuchil jajalqui yéetel ca túulch'intico'ob j kastal.

¹⁹¡Ichil jujun súutuquil cu bin j xu'ulsbilo'ob! ¡Saajquilil cu quíimsico'ob!

²⁰Yuumtzil, le quéen líikiqueche', je'el bix u yajal máac ti' u wenele', yaan a cúulpachcuntic le j ca'a p'éel icho'.

²¹Tene' chuupen ca'ach tu yéetel káakaj óolal yéetel tin pucsi'ikale' tin wu'uyaj yajil,

²²tumen beyen jun túul j ma' na'ate' ma' tin kuchul na'at ca'achi; ¡beyen ca'ach jun túul ba'alche' ta táane'!

²³Quex beyo' yanjien mantadz ta wéetel. Ta machajen yéetel a x no'oj kab,

²⁴ta nu'uctaj in cuxtal yéetel a tzol xiquino'ob; le quéen kuchuquen tu xuule' yaan a kamiquen yéetel tziiquilo'ob.

²⁵¿Máax yaan te ca'ano'? ¡Chéen teech! Ma' in káat lu'umcabil ba'ali'.

²⁶Tuláacal in wíinclil táan u xu'upul, ba'ale' Kue' leti' in ayikalil mina'an u xuul; leti' u muuk in pucsi'ikal.

²⁷Le máaxo'ob cu náachtalo'ob ti' teche' yaan uquíimilo'ob; yaan a xu'ulsic le máax ma' tu kubic u yóol ti' teche'.

²⁸Ba'ale' tene' yaan in nadziquinbáa ti' Yuum Ku, tumen in ti'al tene' leti' u ma'alobil. Ti' teech quin ta'acbesiquinbáa; le o'olale' yaan in ka'aytic tuláacal le ba'ax a beetmajo'.