Read Yucateco Salmos 74 Bible Online

Salmos 74 - Yucateco bible

Salmos 74

¹Yuum Ku, ¿Ba'axten dzo'oc a xúump'attico'on jun puli'? ¿Ba'axten dzo'oc u léequel a p'u'ujul ti' u j tamanilo'ob a cool?

²Ka'ajac teech a caajal, le ta yéeyaj líikbal tu yáax chuune', le ta manaj u ti'al a beetic jun p'éel caaj jach ati'alilte'; ka'ajac teech u pu'uquil Sión tu'ux le tu'ux caja'anecho'.

³Co'oten a wil le mina'an u xuul juutlilo'ob u pakilo'ob le quili'ich najo', le aj p'eeco' dzo'oc u jutic tuláacal.

⁴A aj p'eeco'obe', táan u kayico'ob dzáancha'atajil te ta quili'ich najo'; ¡dzo'oc u líiksico'ob ca'anal, u báacam j táanxel lu'umil!

⁵¡Tu yóokol u táancabil u yúuchul ocbal! Bey j ch'ac si'ob tu chúumuc jun p'éel piimpim káaxe',

⁶yéetel báat bey xan yéetel x bajab tu xe'exe'et'o'ob le jadzutz ba'alo'ob beeta'an yéetelche'o'.

⁷Tu tóoco'ob a quili'ich najil; ¡tu cúulpachcunso'ob a kulnajil, tu juto'ob tac lu'um!

⁸Tu dzajo'ob u t'aanil u xu'ulsico'ob; ¡tu tóocajo'ob tuláacal le cúuchilo'ob yaan te j múuch'caaj tu'ux c much'icbáa u ti'al c kultecho'!

⁹Bejela'e', ma' táan c ilic le quili'ich chíiculalo'obo', mina'an mix jun túul aj bóobat. mix c ojel buca'aj kiin cu bin j xáantal le ba'alo'oba'.

¹⁰Ku, ¿tac ba'ax kiin quéen jáawac u ya'alic to'on ba'alle aj p'eeco'? ¿Tac ba'ax kiin quéen jáawac u ya'alic teech ba'al?

¹¹¿Ba'ax teen ca ta'aquic u páajtalil a kab? ¿Ba'ax teen ca wa'atal a méekmaj a kabo'ob?

¹²Teech in ajaw, líikbal le úuchben kiino'obo'. Ku, teche', ta dzaj tocsajil way yóokolcaabe',

¹³teech ta je'aj le ka'anab yéetel a páajtalilo', ta pa'aj u pool le nucuch ba'alche'ob yano'ob te j ka'anabo',

¹⁴ta yach'aj u poolo'ob le nojoch ba'alche' cu kaaba'intic Leviatano', ta dzáa xan jaantbil tumen u dzíidzic ba'alche'ilo'ob le x tocoy lu'umo'.

¹⁵Teech ta beetaj u xíitil sayabo'ob yéetel áalcab ja'ob, ta tiquincunsaj xan le nucuch áalcab ja'obo'.

¹⁶A ti'al le kiino' bey xan le áakabo'; teech ta beetaj le ujo' bey xan le kiino';

¹⁷teeche' ta dzaj u xu'ukil u xuul yóokolcaab; teech ta beetaj yáaxkin, bey xan u kiinilo'ob que'elil.

¹⁸Yuumtzil il le aj p'eeco' táan u poch'iquech; j ma' na'at wíinique' táan u t'aan kaas ta wo'olal.

¹⁹¡Ma' a jach tu'ubsico'on! Beyo'on mucuyo'ob mina'an u muuko'obe', ¡ma' a kubico'on ti' le dzíidzic ba'alche'obo'!

²⁰¡Ka'ajac teech a nup t'aan, tumen le lu'um' chuup yéetel jáanpay óol tac tu xuul u nakliquil!

²¹Ma' a cha'ic u beeta'al u cabal óolcunta'al le máax cu ye'edzlo'; ¡yaan u qui'iqui' t'antiquech le óotzilo' bey xan le máax cabal u yóolo'!

²²¡Yuum Ku, líiken, toc le ba'ax a ti'alo'! ¡Ka'ajac teche', le j ma' na'ato'obo' ma' tu xu'ulul u ya'alico'ob teech ba'al!

²³Ma' u tu'ubul teech u yawat a aj p'eeco'ob, bix u bin u ka'amtal u yawat le j ma' u'uyaj t'aano'obo'.