Read Yucateco Salmos 75 Bible Online

Salmos 75 - Yucateco bible

Salmos 75

¹C dzáic teech nib óolal Ku, c dzáic teech nib óolal; c ch'a'a chi'itic a kaaba' yéetel c tzicbatic a jakbe'en óol ba'alo'ob.

²Yuumtzile' cu ya'alic: Ti' le kiin quin in yéeyo' yaan in p'is óolal yéetel tuláacal tojil.

³Le quéen quíilbanac lu'um, yéetel tuláacal cajnáalilo'obe', teen máax beetic u p'áatal jejedzquil u chuun pakilo'ob.

⁴Ti' le máaxo'ob ca'anal u yicho'ob yéetel kasa'ano'obo' quin wa'alic: Ma' jach a nonoj ba'alcunsicaba'ex, mix xan u ca'analtal a wiche'ex;

⁵ma' a sen awtique'ex a páajtalile'ex, mix xan a ma' na'at t'aane'ex.

⁶Tumen le áantajo' ma' teech u taal j lakin, mix j chikin, mix tu x tocoy lu'umil le j noojolo',

⁷ba'ale' Yuum Kue' leti' cu p'is óol; cu cabalcunsic u yóol dze'edzeco'obi, u láako'obe' cu líikesico'ob.

⁸Tu kab Yuumtzil yaan u nu'ucul u láalic u P'u'ujul chuup yéetel xa'aka'anbil vino su'udzquinta'an. Le quéen u wec le vino', tuláacal u loolob máaquilo'ob le lu'uma' yaan u yukico'obtac u xiixel.

⁹Tene' mantadz yaan in ka'aytic u Ku Jacobo' yéetel yaan in kayic qui'iqui' t'aano'ob ti';

¹⁰tumen leti' cun u xu'uls u ca'anal ichil le loolob máaco'obo', ba'ale' leti' cu ya'abcuntic u páajtalil le utzul máaco'.