Read Yucateco Salmos 76 Bible Online

Salmos 76 - Yucateco bible

Salmos 76

¹Junab Kue' kaj óola'an tu lu'umil Judá; U kaaba'e' jach nojoch tu lu'umil Israel.

²U kulnajile' ti' yaan tu yóokol u pu'uquil Sión, tu caajil Jerusalén;

³te'elo' tu cachaj u nuuquilo'ob le ba'atelo': chimalo'ob máascabob yéetel julubo'ob.

⁴¡Yuum Ku, teche' nojbe'enech! ¡Asab nojochech ti' le pu'uco'ob mina'an xu'ulul ti'obo'!

⁵Le asab xiixib máaco'obo' ocla'ab le ba'ax yaan ti'obo'; le asab mu'uka'ano'obo' mix ba'al páatchaj u beetico'ob. ¡tu wenelto'ob u dzooc u wenelo'ob!

⁶Le quéen keyajnac u Ku Jacobe', ma' tu páajtal u péec le bolan yéetel u tzíiminilo'.

⁷¡Teche' sajbe'entzilech! ¿Máax je'el u p'áatal u ya'alacbal ta táan le quéen t'aanac a p'uja'anile'?

⁸Líikbal te j ca'ano' ca dzáic ojéeltbil a p'is óol; le lu'umo' cu p'áatal ma' tu péec tu yo'olal u sajaquil,

⁹Ku, le quéen líikiquech u ti'al a dzáa p'is óolale', yéetel a toc u pech'a'anilo'ob le yóokolcaaba'.

¹⁰U kuuxilil wíinique' cu suut qui'iqui' t'aanil a ti'al; tac u asab chichanil u kuuxilile' cu suut u ti'al a péet jo'ol.

¹¹Beete'ex séeb chi'ob ti' Yuumtzil a Kuex, ba'ale' dzocbese'ex. Te'ex ca bakpachtique'ex le máax cu najmatic tziiquilo', taase'ex ti'ibil óolalo'ob ti'.

¹²Tumen leti' cabalcunsic u yóol le jalacho'obo', yéetel cu dzáic sajaquil ti' u ajawilo'ob yóokolcaab.