Read Yucateco Salmos 77 Bible Online

Salmos 77 - Yucateco bible

Salmos 77

¹Ti' Yuum Ku quin káat óolal yéetel ka'amcach t'aan u ti'al ca u yu'uben.

²Tu kiinil okol óolene' quin caxtic Yuumtzil, mantadz xan quin líikesic in kabo'ob ichil in payalchi' yéetel áakab. Ma' tu yantal jéedzel óolal ti' in pixan.

³Cu ka'ajal teen Yuum Kue, quin wokol; quin dzáiquimbáa tuucule', cu lúubul in wóol.

⁴Teche' Yuumtzil ma' táan a cha'ic in wenel; jach saatal yanil in wóol mix táan u páajtal in t'aan.

⁵Quin tucultic le kiino'ob yéetel le ja'abo'ob máanja'ano'obo';

⁶cu ka'ajal teen le in kaay ca'ach ti' le áakabo'obo'. Ichilene' quin tuucul yéetel quin káat chi'itiquinbáa:

⁷¿Je'el wa u p'áatal mantadz kuux Yuumtzile'? ¿Ma' wa bíin suunac u bisjubáa t éetel yéetel utzili'?

⁸¿Dzo'oc wa u xu'upul a yaacunaj? ¿Xu'up wa u dzaa t'aan u ti'al mix bikin?

⁹¿Dzo'oc wa u tu'ubul ti' Yuum Ku u yutzil? ¿Jach wa táaj kuux, le o'olale' mina'an ch'a'a óotzililti'?

¹⁰Le ba'ax sen yaj tin wóole', in tucultic le sen ca'anal Junab Kuo', ma' je'ebix ca'ach t éetele'.

¹¹Bíin in ka'ajes le jak óol meyajo'ob tu beetaj Yuumtzil ti' le kiino'ob máanja'ano'obo';

¹²yaan in tucultic tuláacal le ba'ax tu beetajo'.

¹³Yuum Ku, a bejilo'obe' quili'icho'ob, ¿yaan wa u láak Junab Ku nojoch je'el bix teche'?

¹⁴¡Teech le Ku ca beetic jak óol meyajo'obo'! ¡Ta dzaj u kaj óolt a páajtalil le múuch' caajo'obo'!

¹⁵Yéetel a páajtalile' ta tocaj a caajal, u paalalo'ob Jacob yéetel u paalalo'ob José.

¹⁶In Ku, le ca tu yilajech le ka'anabo', sajacchaji, ca quiquilnaj u taamtam ja'ilo'ob;

¹⁷le múuyalo'obo' tu cha'ajo'ob u káaxal u ja'il, yanchaj u quíilbal cháaco'ob te j ca'ano', tuláacal tu'uxe' léenbalnaj cháaco'ob.

¹⁸Cu yu'uba'al u quíilbal a cháaco'ob ichil le moson iiko'; sáasilchaj yóokolcaab yéetel a léenbal cháaco'ob; le lu'uma' tu tíitubáa yéetel le quíilbalo'obo'.

¹⁹Ta je'aj tu'ux a máanbal ti' le ka'anabo', ta ch'actaj ya'abcach ja'ob, ba'ale' mix máac tu yilaj tu'ux t'áal a wooc.

²⁰Ta nu'ucbisaj a caajal jeel bix u bisa'al u múuch'ul j tamano'obo' tu yéetel Moisés bey xan tu yéetel Aarón.