Read Yucateco Salmos 78 Bible Online

Salmos 78 - Yucateco bible

Salmos 78

¹In caajal táan óolt in ca'anbesaji'; ¡chinabáa a ch'en xiquint le ba'ax quin wa'alic techa'!

²Bin in ca'aj t'aan ichil queet t'aano'ob; yaan in wa'alic mucul t'aano'ob tzicbalta'an likbal ya'abcach ja'abo'ob.

³Le ba'ax c u'uymaj, c ojel, tzicbalta'ano'ob to'on tumen c taataobo',

⁴ma' bíin c mucult ti' c paalalo'obi'. Yéetel le ch'i'ibalo'ob bíin taalaco'obo' yaan c qui'iqui' t'antic c Yuumtzil, yéetel yaan c tzicbaltic u páajtalil bey xan le jakbe'en ba'alo'ob u beetmajo'.

⁵Kue' tu dzáa jun p'éel a'almaj t'aan u ti'al Jacob, tu ya'alaj bix unaj u bisicuba'ob u caajnáalilo'ob u Israel; tu ya'almaj t'antaj ti' c máanja'an ch'i'ibalo'obe' ca u ca'anbeso'ob ti' u paalalo'ob,

⁶u ti'al ca kaj óolta'ac tumen le ch'i'ibalo'ob bíin taalaco'obo', u ti'al xan le paalalo'ob bíin síijico'obo', leti'ob xane' ca u ca'anbeso'ob ti' u paalalo'ob.

⁷Beyo' bíin yanac u yocsaj óolalo'ob ti' Yuum Ku yéetel ma' u tu'ubsico'ob ba'ax tu beetaj leti'; u ti'al ca u dzo'ocbeso'ob u ya'almaj t'aano'ob

⁸yéetel ma' u béeytalo'ob je'el bix u máanja'an ch'i'ibalo'obo', j ma' u'uyaj t'aano'ob, j ma' na'ato'ob, mina'an jéedzel tu pucsi'ikalo'ob, ¡ch'i'ibal mina'an u yocsaj óolal ti' Yuum Ku!

⁹U paalalo'ob Efraín máaxo'ob u ch'a'ama'ob u nu'ucul u ba'atelo'obe', tu sutajo'ob u paacho'ob tu kiinil le ba'atelo',

¹⁰ma' tu dzo'ocbesajo'ob le nup t'aan tu beetajo'ob yéetel Yuum Kuo'. mix tu yóoltajo'ob u yu'ubo'ob u ca'anbesajo'obi'

¹¹Tu tu'ubsajo'ob le ba'ax tu beetaj Yuum Kuo', le máactzilo'ob tu beetaj táano'obo'.

¹²Junab Kue' tu beeta'ab máactzilo'ob tu táan u taataob te tu cúuchil Zoán, tulu'umil Egipto:

¹³tu buja ca'a jaatz le ka'anabo' ca tu beetaj u máano'obi', tumen ja'il le ja'obo' j káal tu ca'a tzéelil, bey caka'alac tumen pako'obe'.

¹⁴Yéetel kiine' tu nu'uctaj u beelo'ob yéetel jun p'éel múuyal, yéetel áakabe', yéetel u sáasilil káak.

¹⁵Te x tocoy lu'umo' tu jóokesaj ca'a búuj ti' le nucuch tuunicho'obo', ca tu dzaj ya'abcach ja' u yuko'ob.

¹⁶¡Kue' tu beetaj u jóokol ti' le nojoch tuunicho' jun p'éel u tóoch'bal ja', ya'abcach u tuulancal!

¹⁷Ba'ale' leti'obe' xi'ic u bin u kebancuntcuba'ob ti' Yuum Ku; te x tocoy lu'umo' j ko'oxchaj yóolo'ob ti' Aj Sen ca'analo'.

¹⁸Tu túuntajo'ob u yóol Ku, táan u káatico'ob janal je'el bix tu tucultajo'obe'.

¹⁹Tu ya'alajo'ob ba'al tu yóolal, táan u ya'alico'ob: Kue', ¿je'el wa u páajtal u dzáic ba'al c jaant te x tocoy lu'umo'?

²⁰Jach tu jaajile' Kue' tu buja le nojoch tuunicho'; ti' le tuunicho' jóok ja' bey jun p'éel áalcab ja'e', le lu'umo' j búuli; ba'ale' ¿je'el wa u páajtal u dzáic xan waaje'? ¿je'el wa u páajtal u dzáic bak ti' u caajale'?

²¹Le ca tu yu'ubaj Yuumtzil lela', j p'u'uji; ¡u p'uja'anil bey káake' j t'a'ab tu yóokol u caajil Jacob!

²²Tumen ma' tu kubaj u yóolo'ob ti' Yuum Kui' mix tu yocsaj óolto'ob u yáantaji'.

²³Quex beyo' Kue' tu túuchi'itaj le múuyalo'obo' yéetel tu je'aj u jool najilo'ob le ca'ano';

²⁴¡tu beetaj u káaxal maná tu yóokol u caajal, u waajil ca'an u ti'al u jaanto'ob!

²⁵¡Leti'obe' tu jaantajo'ob u yo'och waaj ángelo'ob. Kue' tu dzaj ti'ob ya'abcach janal!

²⁶Lakin iik yéetel j noojol iike' piquitnajo'ob ca'an; Ku j taaso'ob yéetel páajtalil.

²⁷Tu beetaj u káaxal bak tu yóokol u caajal; ¡j káax ch'íich'o'ob bey u sa'am lu'umil ka'anabe'!

²⁸Kue' tu beetaj u lúubulo'ob chúumuc ti' le cúuchil tu'ux caja'an le máaco'obo' yéetel tu bak paach le pasel najo'obo'.

²⁹Jaano'ob p'iis na'ajchajico'obe'; bey túuno', Kue' tu dzaj ti'ob ba'ax tu yóoltajo'ob.

³⁰Ba'ale' ma' máanac ca'ach u poochilo'obe', ti'anili' u janal tu chi'obe',

³¹ca j lúub u p'uja'anil Ku tu yóokolo'ob, ca tu quíimsaj le xiibo'ob asab mu'uka'antaco'obo'. ¡Tu beetaj u quíimil u asab ma'alob máaquilo'ob Israel!

³²Ba'ale' quex beyo' kebanchajo'ob tu ca'a téen; ma' tu yocsaj óolto'ob u máactzilo'ob Kui'.

³³Le o'olale' j dzaab xuul ti' u cuxtalo'ob tumen Yuum Ku, beyo'ob múus iik ichil jun p'éel nojoch sajquile'.

³⁴Wa cu quíimsa'al dze'edzec tumen Kue', cu caxantico'ob túun; cu sutkajlo'ob ti', cu caxtico'ob túun, x ma' je'elelil;

³⁵cu ka'ajal túun cu ka'ajal ti'ob, Sen Ca'anal Ku, leti' máax canantico'ob yéetel lojico'ob.

³⁶Ba'ale' yéetel u chi'obe' bey xan yéetel u yaako'obe', cu ya'alico'ob jadzutz tuso'ob,

³⁷tumen mix jun téen yanji ba'al jaaj tu pucsi'ikalo'ob, mix tu yocsaj óolto'ob u nup t'aani'.

³⁸Ba'ale' Kue' tu ch'a'aj óotzilil ti'ob, ma' tu ch'éejsajo'obi', ca tu sa'atsaj u kebano'ob. ya'ab jun téenele' tu dzaj jun tzéelil u kuuxil, ma' tu cha'aj u bisa'al tumen le p'uja'anilo'.

³⁹Ka'aj ti' Ku, leti'obe' chéen óotzil wíinico'ob, chéen beyo'ob iik cu bin ma' tu suute'.

⁴⁰¡Buca'aj u téenel ma' tu u'uyaj t'anto'ob Kui', yéetel tu beetajo'ob u mukyaj te x tocoy lu'umo'!

⁴¹Ba'ale' tu túuntajo'ob u yóol tu ca'a téen; ¡cu okomquintico'ob u yóol u quili'ichil Israel!

⁴²Ma' j ka'aj ti'ob le kiin ca j to'oco'ob yéetel upáajtalil Ku ti' u kab u aj p'eeco'obi';

⁴³le ca tu beetaj nucuch meyajo'ob te tu cúuchil Zoán tu lu'umil Egiptoe',

⁴⁴le ca tu sutaj ki'ikil u ja'il le áalcab ja'obo', ma' páatji u yu'ukul tumen le egipciobo'.

⁴⁵Tu túuxtaj tu yóokolo'obe' áacacho'ob yéetel muucho'ob, lelo'oba' tuláacal ba'al cu lukico'ob yéetel cukascuntico'ob.

⁴⁶Tu kubaj ti' le sáako' u yich le lu'umo' tu yo'olal ba'ax meyajnajo'ob.

⁴⁷Yéetel bat bey xan yéetel escarchae' tu kascuntaj u pakal higos bey xan u pakal uvaob.

⁴⁸U wacaxo'ob yéetel u j tamano'obe' j quíimo'ob tu yáanal le bato' bey xan tu yáanal jaadz cháac.

⁴⁹Kue' tu túuxtaj bey u bisaj t'aanil loobile' u p'uja'anilu kuuxilil, u xotkiin yéetel yaj óolal.

⁵⁰¡Ma' je'el u p'u'ujuli', ma' tu sa'atsaj u cuxtalo'obi'! Ba'ale' tu kubajo'ob ti' quíimil;

⁵¹¡tu beetaj u quíimil u yáax paal tuláacal u cajnáalilo'ob Egipto!

⁵²Tu jóokesaj Israel bey jun p'éel u múuch'ul j tamano'obe'; tu beetaj u ch'actic u caajal le x tocoy lu'umo'.

⁵³Tu bisaj ma'alob canantbil u ti'al ma' u ch'a'ic sajquilil, ba'ale' u aj p'eeco'obe' j búulo'ob ichil le ka'anabo'.

⁵⁴Kue' tu taasaj u caajal ti' u quili'ich lu'umil, ¡ti' le pu'uc tu ch'a'aj yéetel ba'atelo'!

⁵⁵Tu táan Israele' tu jóokesaj le máaxo'ob ma' tu yocsaj óolto'ob Kuo'; tu t'oxaj u tzúutzucal le lu'um ti' u caajalo' tu dzaj xan tu'ux u cajtalo'ob.

⁵⁶Ba'ale' tu túuntajo'ob u yóol Ku le Aj Sen Ca'analo' ca tu ya'ajajo'ob ba'alo'b tu yo'olal leti', táan u ma' u'uyaj t'antico'ob u ya'almaj t'aano'ob;

⁵⁷je'el bix tu beetilaco'ob u taataobe' tu xúump'atto'ob ma' j chucpaj u yóolo'ob tu yéeteli'. ¡kéech u beelo'ob ca j sa'ato'ob!

⁵⁸Tu beetajo'ob u kuuxil tu yo'olal le maba'alcúuchilo'obo', tu'ux tu kultajo'ob beetbil Kuob; ca tu p'u'usajo'ob Yuum Ku.

⁵⁹Kue' kuuxilnaj le ca tu yo'olaj lelo', ca tu sen p'ectaj israel,

⁶⁰ca xúump'attaj u quili'ich najil Siloo' tu'ux cajacbal ca'ach ichil le máaco'obo'.

⁶¹Tu cha'aj u ch'a'abal tumen u aj p'eeco'ob u chíiculal u nojbe'enil yéetel u páajtalil.

⁶²Jach p'u'uj yéetel u caajale', ca tu kubaj ti' u aj p'eeco'ob.

⁶³Le xi'ipalalo'obo', káak quíimso'ob; ¡ma' yanji u kaayil dzo'ocol beel u ti'al le x ch'úupalo'obo'!

⁶⁴Le j kiino'obo' j quíimo'ob tu yej máascab, ma' okolta'abo'ob tumen u yatano'obi'.

⁶⁵Ba'ale' le Yuumtzilo' aaj, bey u yajal ti' jun p'éelwenele', bey jun túul xiibil máac cu ka'ajal u yiik cu dzo'ocol uyukic vinoe',

⁶⁶tu loobiltaj u aj p'eeco'ob ca tu beetaj u yáalcabo'ob, tu chupajo'ob yéetel subtalil u ti'al ja'abo'ob mina'an uxuul.

⁶⁷Tu cúulpachtaj u ch'i'ibal José, bey xan u ch'i'ibal Efraín;

⁶⁸ba'ale' tu yéeyaj u ch'i'ibal Judá yéetel u yaacunaj pu'uquil Sión.

⁶⁹Tu beetaj u quili'ich najil ti' jun p'éel ca'anal cúuchil yéetel tu jedzcuntaj je'el bix u jedzcunajil le lu'umo' u ti'al ja'abo'ob mina'an u xuul.

⁷⁰Tu jóoksaj David ti' u canan j tamane' ca tu yéeyaj u ti'al u palitzilte;

⁷¹tu lukesaj ti' u canan j tamane' u ti'al ca u canant u caajal Yuumtzil, u ti'al u canant Israel;

⁷²tu canantaj, tu bisaj yéetel no'oja'an kab bey xan yéetel jaaj óol pucsi'ikal.