Read Yucateco Salmos 79 Bible Online

Salmos 79 - Yucateco bible

Salmos 79

¹¡In Yuumtzil, le j ma' ocsaj óolo'obo' dzo'oc u láaj ch'aico'ob ba'al a ti'al! ¡Dzo'oc u kascuntico'ob a quili'ich kulnaj dzo'oc xan u p'atico'ob ju'uju'ut u caajil Jerusalén!

²¡Dzo'oc u p'atico'ob u quimen wíinclilo'ob a palitzilo'ob, le máaxo'ob u kubmaj y yóolo'ob ti' teche', u ti'al u tzéenticuba'ob le j ch'oomo'obo' yéetel le káaxil ba'alche'obo'!

³tu weco'ob u ki'ikelo'ob bey ja' ichil tuláacal u caajil Jerusalén, mix máac yanji u ti'al muquico'ob.

⁴C p'a'asta'al tumen c éet caajalo'ob yéetel c che'ejta'al tumen máaxo'ob bakpachtico'on.

⁵In Yuumtzil, ¿tac ba'ax kiin cu bin jáawal p'uja'anil? ¿Yaan wa u p'áatal mantadz t'aba'an a p'uja'anil je'el bixle káako'?

⁶¡Wec a p'uja'anil tu yóokol le j múuch' ma' ocsaj óolo'obo', le ma' u kaj óoltecho'obo' mix cu ch'a'a chi'ito'ob a kaaba'!

⁷Tumen leti'obe' tu xu'ulso'ob Jacob yéetel tu p'atajo'ob ju'uju'ut le múuch' caajo'obo'.

⁸Ma' a beetic c bo'otic u kasa'anil c máanja'an ch'i'ibalo'ob; ¡ca talac séeba'an u ch'a' c beel a muumun yaacunaj, tumen jach luba'an c óol!

⁹In Ku, c tocsajil, ¡áanto'oni', jáalkabto'oni', sa'ats c si'ipil tu yo'olal u nojbe'enil a kaaba'!

¹⁰Ma' u yantal ba'ax o'olal u ya'alico'ob le máaxo'ob ma' ukaj óolecho'obo': ¿Tu'ux yaan u Ku leti'ob? ¡Dzáa to'on ca c il u ja'adzal le máaxo'ob j quiimso'ob a palitzilo'obo'! ¡Ca u yojéelto'ob xan, le máaxo'ob ma' u kaj óolecho'obo'!

¹¹Táan óolt u tac poolo'ob le kala'ano'obo', toc xan yéetel a nojoch páajtalil le máaxo'ob xotkinta'ano'ob u ti'al quíimilo'.

¹²In Yuumtzil, sut siete u téenel tu yóokol le j táanxel cajtalilo'obo' le kaas u beetmajo'ob techo';

¹³ba'ale' to'on a caajalo'on, to'on u j tamanilo'on a ya'ax su'uquilo'ob, yaan c dzáic teech nib óolal mantadz; ¡yaan c kayic a qui'iqui' t'aano'ob ti' tuláacal ja'abo'ob mina'an u xuul!