Read Yucateco Salmos 80 Bible Online

Salmos 80 - Yucateco bible

Salmos 80

¹U j Canan Israel, teech ca bisic José je'ebix jun múuch' j tamano'obe', teech túune', ti' yaan a jalach káanche' tu yóokol le querubino'obe', ¡u'uyej! ¡Pact Efraín yéetel utzil!

²¡Benjamín yéetel Manasés! ¡Aajen co'oten a toco'ob yéetel páajtalil!

³In Ku ¡beet ca béeychajco'o je'ebix ca'ache'! ¡Pacto'on yéetel utzil; beyo' cu yantal to'on tocsajil!

⁴Yuum Ku, ti' máax yaan tuláacal páajtalil, ¿tac ba'ax kiin cun p'áatal kuuxech yéetel u payalchi' a caajal?

⁵Ta dzaj to'on yaj óolal u ti'al c jaante, u ti'al c uk u ja'il c ich.

⁶Ta beetajo'on u p'a'as le j táanxel caajilo'obo'. c aj p'eeco'obe' cu che'ejtico'ono'ob.

⁷Ku ti' máax yaan tuláacal páajtalil, ¡beet ca béeychajaco'on je'el bixo'on ca'ache'! Pacto'on yéetel utz; beyo' cu yantal to'on tocsajil.

⁸Ta jóokesaj Egiptoe' jun cúul u pakalil uva; ta tojolch'intaj le máaxo'ob ma' u kaj óoltecho'obo' u ti'al ca a pak le uvaob tu lu'umo'obo'.

⁹Ta míistaj le lu'um tu'ux ta pakajo'; tu tabaj u mootz; u kabo'obe' tu chupajo'ob le múuch' caajo'obo'.

¹⁰Tu pixaj le pu'uco'obo' yéetel u bo'oy, yéetel u kabo'obe' tu pixaj le che'ob sen ca'analo'obo'.

¹¹Kuch u kabo'ob tac ka'anab tac xan u yáalcab ja'il Éufratese' kuch u ku'uko'ob.

¹²¿Ba'axten dzo'oc a jutic u bakpach, táan a pa'atic ca t'o'ococ u yich le uva tumen le máaxo'obcu bino'ob te j bejo'?

¹³Táan u kascunta'al tumen le quitamo'; ¡táan u jaanta'al tumen u ba'alche'ilo'ob le káaxo'!

¹⁴Ku, ti' máax yaan tuláacal páajtalil, beet utz a suut ti' to'on; ma'alob paacatnen líikbal te j ca'ano', ch'a'a óotzilil ti' u paklil le uvao',

¹⁵ti' u pakalil le uva ta pakajo' ti' le ku'uk ta ma'alob jedzcuntajo'.

¹⁶Xu'uls yéetel a p'uja'anile' le máaxo'ob cu xotico'ob yéetel cu t'oquico'ob le paakalo';

¹⁷ba'ale' áant le caaj a yéeymajo', bey xan le u ku'uk ta jedzcuntajo';

¹⁸beyo' mix bikin je'el c p'atiquech tu ca'a téene'. Dzáa to'on cuxtale'; beyo' chéen teech bíin c ch'a'a chi'ita kaaba'.

¹⁹Ku, in Yuumtzil ti' máax yaan tuláacal páajtalil, ¡beet ca béeychajco'o je'ebixo'on ca'ache'! ¡Pacto'on yéetel utzil beyo' cu yantal to'on tocsajil!