Read Yucateco Salmos 81 Bible Online

Salmos 81 - Yucateco bible

Salmos 81

¹¡Kaaynene'ex yéetel qui'imac óolal ti' Ku, tumen leti' c muuk! ¡Qui'iqui' t'ante'ex u Ku Jacob yéetel u yawatil qui'imac óolal!

²Kaaynene'ex je'ebix u juum u paaxil arpa yéetel salterio.

³Paxe'ex le trompeta le quéen kuchuc u kiinil chichan uj, bey xan le quéen kuchuc u kiinil yiijtal uj, lela' leti' u kiinil le c nojoch kiinbesajo'.

⁴Tumen lela' leti' le a'almaj t'aan tu dzaj u Ku Jacob ti' Israelo';

⁵leti' le a'almaj t'aan j dzaab ti' José le ca jóok Ku u jadz Egiptoe'. Tin wu'uyaj jun p'éel t'aan ma' in kaj óoli', táan u ya'alic ti' teen:

⁶Dzo'oc in luksic le cuuch ti' a queléembalo'obo', dzo'oc in luksic u aalil le nojoch cuucho'.

⁷Ichil a yaayaj óolale' ta t'anajen, tene' tin tocajech; tin núucajech ichil u quíilbal cháac; tin dzajech ti' túuntajil tu jáal u ja'ilo'ob Meriba.

⁸In caajal, u'uy le ba'ax quin wa'alic techa'. ¡quexi'i ca u yu'ub in t'aane', Israel!

⁹Ma' u yantal teech táanxel lu'umil kuob, mix a kultic yaanal kuob.

¹⁰Teen Yuumtzil, a Junab Kuo', le máax jóokesech ti' u lu'umil Egiptoe'; jap a chi'e', tene' quin na'ajcunsiquech.

¹¹Ba'ale' in caajale' ma' tu yóoltaj u yu'ubeni'. Israele' ma' tu yóoltaj u dzo'ocbes in t'aani'.

¹²Le o'olale' tin cha'a u bino'ob tu paach u saatal óolalo'ob, cuxlajo'ob túune' je'el bix utzchajic tu t'aano'obe'.

¹³¡Wa ca u yu'ub ca'ach in t'aan in caajale'! ¡Wa ca máanac ca'ach u caajil Israel tin bejilo'obe'!

¹⁴ti' jun p'éel p'il ichil yéetel mudz ichile' dzo'oc ca'ach in t'oonquintic u aj p'eco'obe' yéetel dzo'oc ca'ach in jadzic le máaxo'ob cu bino'ob tu yóokolo'obo'.

¹⁵Le máaxo'ob u p'ectmajo'ob Yuumtzile' yaan u lúubulo'ob saj quimeno'ob, yéetel u xot kiinilo'obe' cu p'áatal jedzta'anta'an.

¹⁶Kue' dzo'oc ca'ach u tzéentic u caajal yéetel u asab ma'alobil trigoe'. dzo'oc ca'ach xan u lukesic u yukajilo'ob yéetel káaxilcaabe'.