Read Yucateco Salmos 86 Bible Online

Salmos 86 - Yucateco bible

Salmos 86

¹Yuumtzil beet utz a wu'uyiquen, tumen jach okom in wóol, óotzilen xan;

²áanteni' tumen in woquesmaj in wóol ti' teech. Teche' in Kuech; ¡toc le palitzila' tumen chuca'an u yóol ti' teech!

³Yuumtzil ch'a'a teen óotzilil, tumen láaj súutuc quin káat óolal ti' teech.

⁴Yuumtzil qui'imaccuuns u yóol u pixan a palitzila', tumen ti' teech quin payalchi'.

⁵Tumen teche' Yuumtzil utzech, ca sa'atsaj si'ipil; tuláacal yaacunajech ti' le máaxo'ob t'anic a kaaba'o'.

⁶Yuumtzil u'uy in payalchi', ¡táan óolt in káat óolal!

⁷Ichil in yaj óolale' quin káat óolal ti' teech, tumen teche' ca núuquiquen.

⁸¡Yuumtzil, mina'an u láak Ku je'el bix teche'! ¡Mina'an mix ba'al ca u quet a meyajo'ob!

⁹Yuumtzil teech ta beetaj tuláacal le múuch' caajo'obo'; leti'ob túune' yaan u taalo'ob ti' teech u ti'al ukultecho'ob yéetel u ti'al u nojbe'encunto'ob a kaaba'.

¹⁰Tumen chéen teech Junab Kuech; ¡teche' nojochech yéetel ca beetic jak óol ba'alo'ob!

¹¹Yuumtzil, e'es teen a beel, u ti'al ca in tzaypachtech yéetel chuca'an óolal. beet ca u tzic a kaaba' in pucsi'ikal.

¹²In Yuumtzil, In Ku, yaan in qui'iqui' t'antiquech yéetel tuláacal in pucsi'ikal. yaan xan in nojbe'ecuntic mantadz a kaaba'.

¹³¡Nojoch a yaacunaj ti' teen! ¡Dzo'oc a toquiquen ti' le mucnalo'!

¹⁴In Ku, jun múuch' jáanpay óol j loolob máaco'obe' ma'tu táan óoltiquecho'ob, dzo'oc u nupcuba'ob u beeto'ob ten kaas, u káato'ob xan u quíimseno'ob.

¹⁵Ba'ale' teche' Yuumtzil, yaacunaj Kuech yéetel ca ch'a'ic óotzilil; ma'atach tu náacal a wóol, láaj yaacunajech, láajjaajilech.

¹⁶Pacteni', ¡ch'a'a teen óotzilil! ¡Toc a palitzila', dzaa a muuk ti' a paalila'!

¹⁷Dzáa teen jun p'éel ma'alob chíica'an u chíiculal a wutzil, le quéen u yil le máaxo'ob u p'ecmajeno'obe', ca sublacchajco'ob. ¡Teche' Yuumtzil ca dzáic teen áantaj yéetel qui'imacóolal!