Read Yucateco Salmos 88 Bible Online

Salmos 88 - Yucateco bible

Salmos 88

¹Yuumtzil in Ku, in Tocsajil, yéetel kiin bey xan yéetel áakab táan in káatic teech áantaj,

²¡kam in payalchi'i'! ¡táan óolt in káat óolali'!

³Jach ya'ab le kaas dzo'oc u lúubul tin wóokolo', le o'olale' táan in wiliquinbáa tu chi' quíimil;

⁴¡je'el u páajtal in xo'ocol ichil le quimeno'obo', tumen dzo'oc in p'áatal x ma' muukil!

⁵Xúump'atta'anen ichil quimeno'ob; beyen je'el bix le máaco'ob dzo'oc u quíimilo'ob ich ba'atele', le dzo'oc u muculo'obo'; beyen je'el bix le dzo'oc a lukesic a wáantaj ti'o' yéetel dzo'oc a tu'ubsico'ob.

⁶Dzo'oc a puliquen ti' u asab taamil le mucnalo', ti' cúuchilo'ob éekjoche'eno'ob yéetel taamtaco'ob.

⁷Dzo'oc a láalic a p'u'ujul tin wóokol, ¡dzo'oc a buliquen bey tu yáanal u cuclilo'ob ka'anabe'!

⁸Dzo'oc a beetic in xúump'atta'al tumen in wéet óolo'ob; ta beetaj u ti'al ma' u páajtal u mukyajtiqueno'ob. ¡Beyen jun túul máac kala'an ma' tu páajtal u púudzule'!

⁹Tu yo'olal u ya'abil in wokole' táan in p'áatal ch'óopen. ¡Sáamsamal quin ka'am t'aan ti' teech, Yuumtzil; ti' teech xan quin líikesic in kabo'ob.

¹⁰¿Je'el wa a beetic máactzilo'ob tu yo'olal le quimeno'obo'? ¿Je'el wa u páajtal u dzáico'ob teech nib óolal le dzo'ocu quimilo'obo'?

¹¹¿Je'el wa u tzicbalta'al a jaajil yéetel a yaacunaj ich mucnal tu'ux yaan le quimeno'obo'?

¹²¿Je'el wa u páajtal u yila'al a máactzilo'ob ichil éekjoch'e'enile'? ¿Je'el wa u yantal wa máax u kaj óolt a tojile'?

¹³Ba'ale' Yuumtzil, tene' ti' teech quin ka'am t'aan; ja'atzcab kiin quin payalchi' ti' teech.

¹⁴¿Ba'axten ca cúulpachcuntiquen, Yuumtzil? ¿Ba'axten ca kex óoltiquen?

¹⁵Likbal tu kiinilo'ob in táanquelemile' ti' yanchajen ichil yaj óolal yéetel tu chi' quíimil; dzo'oc in mukyajtic nucuch yaayaj ba'alo'ob ta túuxtaj ti'teen, ma' tu páajtal in mukyajtic u láak ba'alo'ob.

¹⁶A sen p'uja'anile', dzo'oc u máan tin wóokol, dzo'oc u dzáancha'atiquen;

¹⁷cu chuca'an bakpachtiquen tuláacal kiino'ob, bey jun p'éel búulcabile'.

¹⁸Dzo'oc a náachcuntic teen in wéet óolo'ob, bey xan in láaktzilo'ob; bejela'e' chéen yéetel éekjoche'enil quin bisiquinbáa.