Read Yucateco Salmos 89 Bible Online

Salmos 89 - Yucateco bible

Salmos 89

¹Yuumtzil mantadz yaan in wa'alic ichil in kaay, teche'utzech; mantadz yaan in tzicbaltic, ma' tu kexpajal a wóol.

²Yaan in ka'aytic mina'an u xuul a yaacunaj; ma' tu kexpajal a wóol je'el bix mina'an kexpajal ti' le ca'ano'.

³Ta beetaj jun p'éel nup t'aan yéetel David; ta dzaaj a t'aan ti' le a palitzil a yéeymajo':

⁴Yaan in beetic ca ajawnac a ch'i'ibalo'ob mantadz ta jalach káanche'.

⁵Yuumtzil tuláacal u cajnáalilo'ob le ca'ano' cu qui'iqui' t'antico'ob a chuca'an óolal yéetel a máactzilo'ob.

⁶Yuumtzil, mina'an mix máac te j ca'ano' je'el u queticubáata wéetele'.

⁷Le nojoch sajbe'entzil Junab Kuo', bakpachta'an tumen u cajnáalilo'ob ca'an.

⁸Yuumtzil, Ku ti' máax yaan tuláacal páajtalil, cu súutpachtiquech le jaajilo'; ¡mina'an mix máac lajquetiquech!

⁹Teech jedzcuntic p'uja'an ka'anab tac xan le u ca'anal tóoch'bal cúuchilo'obo';

¹⁰ta dzáancha'ataj u ba'alche'il le ka'anabo', bey jun túul quimene', ta ki'itbesaj a aj p'eeco'ob yéetel u muuk a kab.

¹¹Ca'an yéetel lu'ume' a ti'alo'ob; teech ta beetaj le yóokolcaaba' bey xan tuláacal le ba'al yano'obo'.

¹²Teech ta beetaj le j xamano' bey xan le j noojolo'; u pu'uquilo'ob Tabor yéetel Hermóne' qui'imac u yóolo'ob táan u kaayo'ob ti' a kaaba'.

¹³A kabe' yaan páajtalil ti'; a x no'oj kabe' mu'uka'an yéetel cu t'oncunaj.

¹⁴A jalach káanche'ile' jejedzqui yanil ti' p'is óolal yéetel ti' tojil; le yaacunaj yéetel le jaajilo' cu yila'al ti' tuláacal ba'al ca beetic.

¹⁵Yuumtzil, utz yanil le caaj u yojel u qui'iqui' t'antech yéetel qui'imac óolal, cu xíimbal sáascuna'an tumen a sáasil;

¹⁶ti' a kaaba'e', cu qui'imactal u yóol tuláacal kiin, cu líikil xan u yóol tu yo'olal a tojil.

¹⁷Tu jaajile' teech u muuk yéetel u jadzutzil; c páajtalile' cu ya'abtal tu yo'olal a wutzil.

¹⁸¡C balbae' Yuumtzil! ¡C Ajawe' u Quili'ich Ku Israel!

¹⁹Juun téenaque', j t'aanajech ich náayil, ca ta wa'alaj ti' a chuca'an paalitzilo'ob: Dzo'oc in yéeyic jun túul u xiixib máac ichil in caajal, dzo'oc in dzáic ca'anal, dzo'oc xan in wáantic.

²⁰¡Dzo'oc in nuptáantic in paalitzil David! Yéetel in quili'ich aceite dzo'oc in dzáaic ajawil,

²¹in kabe' mantadz cu bin j antal tu yéetel; yaan in dzáic u muuk yéetel in páajtalil.

²²Ma' bíin u puluba'ob u aj p'eeco'ob tu yóokoli', mix tu bin dzáancha'atbil tumen le j loolob máaco'obo'.

²³Yaan in pech'ic u aj p'eeco'ob; ¡yaan xan in luksic u aj p'eeco'ob tu táan! ¡Yaan in xu'ulsic le máaxo'ob p'ecmailo'!

²⁴Leti'e' yaan u xooc yéetel in yaacunaj bey xan yéetel in chuca'an óolal; tin wo'olale' yaan u ya'abtal u páajtalil.

²⁵Yaan in jedzcuntic u páajtalil bey xan u jalachil likbal te j nojoch ka'anabo' tac te áalcab ja'obo'.

²⁶Leti'e' yaan u ya'alic teen: Teche' in taataech; teech in Ku ca dzáic teen tocsajil ca wáantiquen xan.

²⁷Teen xane' yaan in dzáic ti' ba'ax cu najmatic yáax paal, tu yóokol u ajawilo'ob yóokolcaab.

²⁸In yaacunaj ti' leti'e' mina'an u xuul; in nup t'aan tu yéetele' jejedzquil yanil.

²⁹Le quéen kuchuc leti'e', u ch'i'ibalo'obe' yaan u beetic u ajawilo'ob mantadzca'aliquil yaan le ca'ano'.

³⁰Ba'ale' wa le leti'ob cu xúump'attico'ob in ca'anbesajobe' wa ma' tu cuxtalo'ob je'el bix cu ya'alic in wa'almaj t'aano'obe',

³¹wa cu kéechelo'ob ti' in dzaa t'aano'obe' wa ma' tu yu'ubaj t'antico'ob in wa'almaj t'aano'obe',

³²yaan in jadzic u ma' u'uyaj t'aanilo'ob bey xan u kasa'anilo'ob yéetel p'isib jaadz.

³³Ba'ale' ma' tin in p'at in yaacuntic David, mix tin in lukes in chuca'an óolal ti' leti'.

³⁴Ma' tin in pa'a' in nup t'aan mix tin mixba'alcuntic indzaa t'aan.

³⁵Jun téene' tin jalach t'aantaj ti' tu yo'olal in quili'ichil, tene' ma' bíin tuusnaqueni':

³⁶ca'aliquil yaan kiine' u ch'i'ibalo'obe' yaan u beetico'ob u ajawilo'ob.

³⁷¡Mantadz jejedzquiob je'el bix le ujo'! ¡Mantadz jejedzquiob ca'aliquil yaan le ca'ano'!

³⁸Chéen ba'ale' ma' ta kamaji' yéetel ta cúulpachtaj le ajaw máax ta yéeyajo'; ¡dzo'oc a kuuxtal tu yéetel!

³⁹Ta pa'aj le nup t'aan yéetel a paalitzilo'; dzo'oc a pulic lu'um u péet jo'ol.

⁴⁰Dzo'oc a je'ic joolo'ob ti' tuláacal u pakilo'ob; ta sutaj jeenel pakilo'ob u noj tuulum najilo'ob.

⁴¹Tuláacal máac cu máane' cu yoclic je'el ba'alac ukáate; cu p'a'atal tumen u láak caajo'ob.

⁴²Ta beetaj u líikesic u kab u aj p'eeco'ob yéetel qui'imac óolal.

⁴³Ta líikesaj u yej u mascab ma' xan ta wáantaj ti' le ba'atelo'.

⁴⁴Dzo'oc a lukesic u ayikalil; dzo'oc a pulic u jalach káanche' tac lu'um;

⁴⁵dzo'oc a lukesic ti' u ja'abilo'ob u cuxtal, dzo'oc a chupic xan yéetel subtzilil.

⁴⁶Yuumtzil, ¿tac ba'ax kiin yaan a ta'acbesicabáa? ¿Yaan wa u p'áatal mantadz t'aba'an a p'uja'anil je'el bixle káako'?

⁴⁷Yuumtzil, ka'ajac teche' in cuxtale' cóom; le máac a beetmajo' jun p'íit kiin u cuxtal.

⁴⁸¡Mix máac cuxa'an wa ma' yaan u quíimil! ¡Mix máac je'el u páajtal u toquicubáa ti' u páajtalil le quíimilo'!

⁴⁹Yuumtzil, ¿tu'ux yaan le yáax yaacunaj ta dzaj u t'aanil ti' David ichil a chuca'an óolalo'?

⁵⁰Yuumtzil, ka'ajac teche' le a paalitzilo'obo' cu ya'ala'al ba'al ti'ob tumen ya'abcach máac; teen xane' táan in bisic tin pucsi'ikal le pooch'i'ilo'obo'.

⁵¹In Yuumtzil, ¡bey u poch'ico'on le aj p'eeco'obo'! ¡je'el tu'uxac ca xi'ic le máax a yéeymajo' bey u ya'alico'ob ba'al ti'!

⁵²Qui'iqui' t'anta'ac Yuumtzil u ti'al ja'abo'ob mina'an u xuul. ¡Ca béeyac!