Read Yucateco Salmos 9 Bible Online

Salmos 9 - Yucateco bible

Salmos 9

¹Yuumtzil, in káat in qui'iqui' t'antech yéetel tuláacalin pucsi'ikal, bey xan in tzicbalt a jakbe'en meyajo'ob.

²U Yuumtzililech ca'an, ta wo'olal in káat awat yéetel tuláacal qui'imac óolal; in káat in kay kaayo'ob ti' a kaaba'.

³Ta táane' in aj p'eeco'obe' cu yáalcabo'ob; cu lúubulo'ob cu quíimilo'ob xan.

⁴Teche' jun túulech toj Aj p'is óol: dzo'oc a cutal ti' a jalach káanche' u ti'al a toj p'isóolten.

⁵Dzo'oc a keyic le j ma' ocsaj óolo'obo', dzo'oc a ch'éejsic le kaakas máaco'obo', dzo'oc a tupic u ka'ajesajilo'ob u ti'al mix bikin.

⁶Le aj p'eeco'obo' dzo'oc u quíimilo'ob, u caajalo'obe' j p'áat x tocoy lu'umil; teech ta xu'ulsajo'ob; ti' leti'obe' mix u ka'ajsajilo'ob j p'áati.

⁷Ba'ale' Yuumtzile', ajaw tac u ti'al ja'abo'ob mina'an uxuul; dzo'oc u jedzcuntic u jalach káanche' u ti'al le p'isóolalo':

⁸bíin u p'is óolt yóokolcaab yéetel tojil, tu beel bíin u xotkint le caajo'obo'.

⁹Yuumtzile' cu canantic le máaxo'ob yedza'ano'obo', leti' canantico'ob ti' u kiinil yaj óolal.

¹⁰Yuumtzil, le máaxo'ob u kaj óoltmajecho'obo' u kubmajo'obu yóolo'ob ti' teech, tumen mix bikin ca xúump'attic le máaxo'ob cucaxtiquecho'obo'.

¹¹Kaye'ex kaayo'ob ti' Yuumtzil u nojochil Sión; ka'ayte'ex ti' le caajo'obo' le ba'ax dzo'oc u beetico'.

¹²Cu ka'ajal ti' Yuum Ku le máaxo'ob cu mukyajo'obo' yéetel ma' teech u tu'ubsic u yáacamo'ob; cu jadzic le máaxo'ob cu beetico'ob kaaso'.

¹³Yuumtzil, ch'a'a ten óotzilil, il bix u beetico'ob in mukyaj le máaxo'ob p'ectmaileno'; ¡jóokesen ti' u chi' le quíimilo'!

¹⁴Beyo' te tu jool cajilo'ob Jerusaleno', bíin in wa'al ti' tuláacal máaxe', teche' ca najmatic qui'iqui' t'aan; teen xane' jach qui'imac in wóol, tumen teche' ta tocajen.

¹⁵Le máaxo'ob ma' u kaj óoltmajo'ob Yuumtzile' culúubulo'ob ti' u dzaa léecho'ob; u yooco'obe' cu p'áatalo'ob léechpaja'ano'ob ti' le léecho'ob tu mucul dzajo'obo'.

¹⁶Yuumtzile' dzo'oc u dzáicubáa kaj óoltbil: ¡dzo'oc u beetic ba'alo'ob tojtac! Le kaakas máaco' cu t'i'ilil u yooco'ob ti' le léech tu jayajo'obo'.

¹⁷Le kaakas máaco'ob ma' u kaj óoltmajo'ob Yuumtzilo', le máaxo'ob cu tu'ubsico'ob Yuum Kuo', yaan u bino'ob te tu cúuchil le quimeno'obo';

¹⁸tumen ma' láaj kiin cu tu'ubsa'al le óotzilo'obo', mix xan saatal jun puli' u pa'atajo'obi'.

¹⁹Líiken, Yuumtzil; ma' a cha'ic u ca'analtal u yich máac; ¡p'is óolt ta táan le múuch' j ma' ocsaj óolo'obo'!

²⁰Beet u ch'a'ico'ob sajaquil, Yuumtzil; ¡beet u yojéeltico'obe' leti'obe' chéen wíinico'ob!