Read Yucateco Salmos 90 Bible Online

Salmos 90 - Yucateco bible

Salmos 90

¹Yuumtzil, ti' teech c balbáa uti'al ja'abo'ob mina'an u xuul.

²Ma'ili' yanac le pu'uco'obo' mix xan yanac lu'um yéetel yóokolcaabe', likbal ti' le kiino'ob dzo'oc máanja'ano'obo' tac ti' le kiino'ob cu taalbalo'obo', teech Kuech.

³Ca beetic u suut máac ti' le sa'am lu'um le quéen a wa'al: Suunene'ex ti' le sa'am lu'umo', cuxa'an wíinique'ex.

⁴Tu jaajile' a ti'al teche' mil ja'abo'obe' beyo'ob le u kiinil jo'olje'ac dzo'oc u máano'; ¡Beyo'ob wa jay p'éel u jaatzabilo'ob le áakabo'!

⁵Ca jáanpay jíiltic le máaco'obo', beyo'ob chéen junp'éel wayake';

⁶beyo'ob xíiwe', cu tóop'ol yéetel cu loolanquil ja'atzcab kiine', ba'ale', ocnaj kiine' cu quíimil yéetel cu tijil.

⁷Tu jaajile' a p'uja'anile' cu xu'ulsico'on, ¡cu p'atico'on saatal c óol.

⁸C kebano'ob yéetel c kasa'anilo'obe' chica'an yanilo'ob ta táan.

⁹Tu jaajile' c cuxtale' cu xu'ulul tu yo'olal a p'uja'anil; cu bin c ja'abilo'ob bey jun p'éel jajak iike'.

¹⁰Setenta ja'abo'ob u kiinilo'ob c cuxtal; le jach mu'uka'ano'obo' cu kuchulo'ob tac ochenta ja'abo'ob, ba'ale' u ca'anal ichil u yúuchul cuxtal ya'abcach kiine' chéen cu taasic yaj óolal yéetel meyaj. ¡Séeba'an u máan le ja'abo'obo' beyxan to'on!

¹¹¿Máax u kaj óol u muuk a p'uja'anil? ¿Máax u kaj óol a kuuxilil?

¹²Ca'ans to'on c ma'alob xoquic u kiinilo'ob c cuxtal u ti'al c kaj óoltic bix óojelajil.

¹³¡Yuumtzil, suunen ti' to'on! ¿Buca'aj bíin xáanaquech? ¡Ch'a'a óotzilil ti' le palitzilo'oba'!

¹⁴Chupo'on yéetel a yaacunaj u cáajbal le kiino'.

¹⁵Dzáa to'on ya'abcach u ja'abilo'ob qui'imac óolal je'el bix u ja'abilo'ob yaayaj óolal dzo'oc u yantal to'ono' yéetel je'el bix le u kiinilo'ob t ilaj le kaaso'.

¹⁶¡Dzáa ca páatac u yilico'ob palitzilo'ob u ch'i'ila'ancabilo'ob! ca páatac xan u yilico'ob a meyajo'ob yéetel a nojbe'enil.

¹⁷Ca yanac t óokol u yutzil c Yuum Ku, ¡Yuumtzil utzil jedzcuntic c meyaji'! ¡Bey, utzil jedzcunt c meyaj!