Read Yucateco Salmos 91 Bible Online

Salmos 91 - Yucateco bible

Salmos 91

¹Le máax cajacbal tu yáanal u bo'oyil Aj Sen Ca'anale' ti' yaan tu yáanal u canan le máax yaan tuláacal páajtalil ti'o'.

²Leti'e' cu ya'alic ti' Yuumtzil: ¡Teech in ta'acbesaj, in tocsajil, in Ku máax ti' yaan in wóol!

³Chéen leti' cu toquiquen ti' léecho'ob yéetel ti' koja'anilo'ob cu quíimsaj;

⁴tumen yáanal u xiiko'obe' bíin u ta'acbesech, yéetel yáanalo'obe', ca bin ma'alob antal. ¡U muuk óolale' bey jun p'éel chimale', leti' bíin u canantech!

⁵Ma' a ch'a'ic sajaquil ti' u sajbe'enil áakab, mix ti' le julubo'ob cu pu'ululo'ob yéetel kiino',

⁶mix ti' le báan quíimilo'ob cu kuchulo'ob ich éekjoch'e'enil, mix ti' le xu'ulsajo'ob quex yéetel kiin.

⁷Tumen mil wíinico'ob bíin quíimico'ob ta x dzíic kabil yéetel diez mil ta x no'oj kabilo' ba'ale' mix jun p'éel loob bíin úuchuc teech.

⁸Chéen yaan a wilic ba'ax bíin úuchuc: yaan a wilic u kamico'ob ba'ax cu najmatico'ob le loolob máaco'obo'.

⁹Tumen ta beetaj a ta'acbesaj le Yuumtzilo', le Aj Sen Ca'analo' u cúuchil a ma'alob antal,

¹⁰ma' bíin talac teech mix jun p'éel kaasi', mix le koja'anil bíin kuchuc ta wotocho',

¹¹tumen leti'e' bíin u túuxt u ángelo'ob u ti'al u canantecho'ob je'el tu'uxac ca xi'iqueche'.

¹²Tu kabo'ob bíin u bisecho'ob u ti'al ma' u t'óochpajal ti' mix jun p'éel tuunich.

¹³Je'el u páajtal a máan ichil chacmo'olo'ob yéetel u mejenilo'obe', je'el xan a pe'echaktic mejen caano'ob yéetel nucuchcaano'ob.

¹⁴Kue' cu ya'alic: Tene' bíin in dzáa tu'ux ma' u yúuchul loob ti'; náach ti' tuláacal ch'apach, tumen leti'e' u yaacuntmajen yéetel u j káaj óolen.

¹⁵Le quéen u t'anene', yaan in núuquic ti': ¡tene' bíin yanaquen tu yéetel! Yaan in toquic ti' yaayaj óolal, bíin in chup yéetel tziiquilo'ob;

¹⁶yaan in beetic u máansic jun p'éel chowac cuxtal: ¡yaan in beetic u qui'imactal u yóol tu yo'olal in tocsajil!