Read Yucateco Salmos 92 Bible Online

Salmos 92 - Yucateco bible

Salmos 92

¹Sen Ca'anal Yuumtzil, ¡buca'aj ma'alobil u dza'abal teech nib óolal yéetel u ka'ayal kaayo'ob ti' a tzicbe'enil!

²U ka'ayta'al tu ja'atzcabil bey tu yáakabil a nojoch yaacunaj yéetel a chuca'an óolal,

³ti' u paaxil táabil paaxo'ob, u qui' ch'ujuc paaxil arpa bey xan salterio.

⁴In Yuumtzil, ¡teech ta beetaj u qui'imactal in wóol yéetel ba'axo'ob ca beetic! ¡A meyajo'obe' cu chupiqueno'ob yéetel qui'imac óolal!

⁵Yuumtzil buca'aj nuuctaquil a meyajo'ob. ¡buca'aj taamtaquil a tuuculo'ob!

⁶¡Chéen le ma' na'ato'ob ma' tu na'atico'obo'!

⁷Wa le j loolob máaco'ob yéetel le j meyaj loobo'ob cu ch'íijilo'ob je'el bix xíiw, bey le cu ayikaltalo'obo', chéen u ti'al xu'ulsbilo'ob jun puli'.

⁸Ba'ale' teche', Yuumtzil, u ti'al ja'abo'ob mina'an u xuul ti' yanech te j ca'anilo'.

⁹Yuumtzil, jun p'éel ba'al jaaj, a aj p'eeco'obe' bíin xu'ulsa'aco'ob; tuláacal le loolob máaco'obo' yaan u ki'itbesa'alo'ob.

¹⁰Teche' ca ya'abcuntic in muuko'ob je'ebix u muuk jun túul xibil wacaxe' yéetel ca wequic qui'iboc ja' tu yóokol in pool.

¹¹Bíin in wil u lúubul a aj p'eeco'ob; ¡bíin in wu'uy u yáacam le j loolob máaco'obo'!

¹²Le utzil máaco'obo' cu loolanquilo'ob je'el bix u loolanquilo'ob le xa'ano'obo', yéetel cu ch'íijilo'ob je'el bix u kulcheilo'ob Líbanoe'.

¹³Je'el bix cuxa'an che'ob paka'ano'ob tu kulnaj Yuumtzile' cu loolanquilo'ob tu sujuy táancabil u kulnaj c Yuum Ku.

¹⁴Tac tu nuxibilo'obe' yaan u yichanquilo'ob; bíin yanaco'ob mantadz mu'uka'ano'ob yéetel toj u yóolo'ob;

¹⁵yaan u ka'aytico'ob: Yuumtzile', in Aj canan, leti'e' toj, ti' leti'e' mina'an mix jun p'éel kaas.