Read Yucateco Salmos 94 Bible Online

Salmos 94 - Yucateco bible

Salmos 94

¹¡E'es a kuuxil, Yuum Ku, sut loob ti' le máaxo'ob cu beetico'ob loobo'!

²Teech u j p'is óol yóokolcaab; ¡líiken a jadz le ca'anal icho'obo'!

³¿Yuumtzil, tac ba'ax kiin, tac ba'ax kiin yaan u bin u qui'imactal u yóol le kaakas máaco'obo'?

⁴Tuláacal le j meen kaaso'ob, a'alaj ba'alo'ob yéetel ca'anal icho'obo'; ¡leti'obe' cu nojba'alcunticuba'ob!

⁵Yuumtzil, leti'obe' táan u xe'exe'et'ico'ob a caajal; ¡cu cabalcuntico'ob u yóol le a ti'alo'obo'!

⁶Cu quíimsico'ob x quimen íichamo'obo' tac le j ma' yuumo'obo' bey xan táanxel lu'umilo'ob.

⁷Cu ya'alico'ob: Yuumtzile' ma' tu paacat, u Ku Jacobe' ma' tu kuchul u yojéelte.

⁸¡J nuum wíinique'ex, ch'a'anu'ucte'ex! ¿Ba'ax kiin quéen yanac a na'ate'ex?

⁹¿Ca tuclique'ex wa ma' tu bin j u'uyaj le máax beet le xiquino'obo'? ¿Ma' wa tu bin j paacat le máax beet le icho'obo'?

¹⁰¿Ma' wa tun jaadz le máax a'alic u nu'uc ti' le múuch' caajo'obo'? ¿Ma' wa tu bin j caanbal le máax ca'anbesic wíinic?

¹¹Yuumtzile' u yojel, wíinique' chéen cu tucultic ba'alo'ob mina'an u nu'uc.

¹²Yuumtzil utz yanil le máax ca wa'alic u nu'uc ti' yéetel ca dzáic ti'e' a ca'anbesajo'ob

¹³u ti'al ca u yantal jom óolal ti' le quéen kuchuc le kaakas kiino'obo', ba'ale', u ti'al j loolob máaque', ba'ax cu nu'ucbesa'ale' mucnal.

¹⁴Le Yuumtzilo' ma' tu bin u xúump'at u caajal, mix xan tu p'atic chéen tu juuno'ob le u ti'alo'obo'.

¹⁵Le j p'is óolo' yaan u sut u betjubáa tojil, tuláacal máac tzicbe'ene' yaan u bin tu paach.

¹⁶¿Máax je'el u líikil u toquen ti' j loolob máaco'ob yéetel j meen loobo'ob?

¹⁷Wa ma' úuchic u yáantiquen Yuumtzile', bejela'a' ti' yanen ti' u ch'ench'enquil le quíimilo'.

¹⁸Le ca tin wa'alaj jun téene': In wooco'obe' táan u jacchajlo'ob, a yaacunaje' Yuumtzil tu yáanten.

¹⁹Chúumuc ti' le sen tuuculil ba'alo'ob cu much'icuba'ob tin sutpache', teche' ca dzáic teen je'elel yéetel qui'imac óolal.

²⁰Teche' ma' tu páajtal a beeticabáa éet óolil yéetel le jalacho'ob ma' tu toj p'is óolo'ob yéetel cu beetico'ob ba'alo'ob kaas tu yo'olal a'almaj t'aan,

²¹cu tucultico'ob ba'al kaas tu yo'olal tzicbe'en máac mina'an u si'ipilo', yéetel cu ya'alico'ob unaj ca quíimsa'ac.

²²Ba'ale' Yuumtzile' leti' in ta'acbesaj; in Kue' leti' le nojoch tuunich cu toquiqueno'.

²³Yuumtzile' yaan u beetic u xu'ulsa'al le j loolob máaco'obo'; u kasa'anilo'ob cu bin xu'ulsico'ob. ¡C Kue' leti' bíin u beete!