Read Yucateco Salmos 95 Bible Online

Salmos 95 - Yucateco bible

Salmos 95

¹Co'otene'ex, kaaynaco'on ti' Yuumtzil yéetel qui'imac óolal. kaaynaco'on ti' le nojoch tuunich cu toquico'ono'.

²Cone'ex ocol tu táan u ti'al ca c dzáa nib óolal ti', yéetel kaaynaco'on ti' u tzicbe'enil.

³Tumen Yuumtzile' leti' nojoch Ku, u nojoch ajaw tuláacal le beetbil Kuobo'.

⁴Ti' yaan tu kabe' u asab taamil cúuchilo'ob le lu'uma'; le asab ca'anal pu'uco'obo' u ti'al leti'.

⁵Ka'anabe' u ti'al tumen leti' j beete; yéetel u kabo'ob tu beetaj tiquin lu'um.

⁶Co'otene'ex kulnaco'on xolocbalo'on; cone'ex xoltal tu táan le Yuumtzilo', tumen leti' tu beetajo'on.

⁷Leti'e' c Ku, to'one' u caajalo'on, u j tamanilo'on u ya'ax su'uquilo'ob. U'uye'ex bejela'e' le ba'ax cu ya'alic te'exo':

⁸Ma' a chichcuntique'ex a pucsi'ikale'ex, je'el bix úuchic Meribae', je'el bix xan úuchic Masah te x tocoy lu'umo',

⁹le ca tu dzajeno'ob ti' túuntajil le a wúuchben ch'i'ibale'exe', quex dzo'oquili' u yilico'ob in meyajo'obe'.

¹⁰Cuarenta ja'abo'ob j kuuxchajen yéetel le ch'i'ibalo'obo', ca tin wa'alaj: Le máaco'oba' jach keechel u beelo'ob; ¡ma' tu yu'ubaj t'antico'ob in wa'almaj t'aano'ob!

¹¹Le o'olale' tin wa'alaj ichil in p'uja'anile' ma' bíin ococo'ob tu cúuchil in je'eleli'.