Read Yucateco Salmos 96 Bible Online

Salmos 96 - Yucateco bible

Salmos 96

¹Kaye'ex ti' Yuumtzil jun p'éel túumben kaay; Kaaynene'ex ti' Yuumtzil u cajnáalile'ex tuláacal lu'um.

²Kaaynene'ex ti' Yuumtzil, qui'iqui' t'ante'ex u kaaba'; ka'ayte'ex sáamsamal u tocsajil.

³Tzicbalte'ex u nojbe'enil yéetel u jak óol meyajo'ob tu táan tuláacal caajo'ob yéetel múuch' caajo'ob,

⁴tumen Yuumtzile' nojoch, jach cu najmatic utzil t'aano'ob; ¡asab tzicbe'en ichil tuláacal kuobo'!

⁵U Kuob le u láak caajo'obo' mix ba'alo'ob, ba'ale' Yuumtzilo' tu beetaj le ca'ano'obo'.

⁶¡Yaan nojoch ayikalil yéetel nojbe'enil tu táan! ¡Yaan páajtalil yéetel jadzutzil tu quili'ich naj!

⁷Dza'ex ti' Yuumtzil, u cajnáalile'ex le caajo'obo', dza'ex ti' Yuumtzile' páajtalil yéetel nojbe'enil;

⁸dza'ex ti' Yuumtzile' le tziiquil cu najmatico'; Ooquene'ex tu sujuy táancabilo'ob u nail yéetel siibalo'ob;

⁹kulte'ex Yuumtzil tu quili'ich naj. ¡Tuláacal yóokolcaabe' ca quiquilnac tu táan!

¹⁰A'ale'ex ti' le máaxo'ob cu kultico'ob beetbil kuobo': ¡Yuumtzile' leti' ajaw. Leti' ma'alob jedzcunt yóokolcaab uti'al ma' u péec! leti' méektáantic tu queetil le caajo'obo'.

¹¹¡Ca qui'imachchajac u yóolo'ob le ca'ano'obo', bey xan le lu'uma'! ¡Ca áacamnac le ka'anabo' yéetel tuláacal ba'ax yani!

¹²¡Ca qui'imacchajac u yóol le káaxo' yéetel tuláacal ba'ax yani'! ¡Ca awatnaco'ob yéetel qui'imac óolalo' u che'ilo'ob le káaxo'.

¹³tu táan le Yuumtzil cu taalo'! ¡Bey, leti'e' táan u taal u méektáant le lu'uma'; yaan u méektáantic u caajilo'ob le yóokolcaaba' yéetel tojil bey xan yéetel jaajil!