Read Yucateco Salmos 97 Bible Online

Salmos 97 - Yucateco bible

Salmos 97

¹¡Yuumtzile' Leti'e' ajaw! ¡Qui'imacchajac u yóol tuláacal le lu'uma'! ¡Qui'imacchajac u yóolo'ob tuláacal le peteno'obo'!

²Bakpachta'an tumen múuyalo'ob yéetel éekjoche'enil; t'ilcunta'an u jalach káanche' tumen le utzilo' yéetel tumenle tojilo';

³táanil ti' leti' cu bin le káako' yéetel cu tóoquic le aj p'eeco'ob bakpachmailo'.

⁴U léenbal cháaquilo'obe' cu sáasilcuntico'ob yóokolcaab; ¡le lu'uma' cu quiquilaanquil le quéen u yilo'ob!

⁵Le pu'uco'obo' cu yíibilo'ob bey u yíibil quibe' tu táan Yuumtzil u yuumil tuláacal le lu'uma'.

⁶Le ca'ano'obo' cu ka'aytico'ob u tojil; tuláacal le caajo'obo' cu yilico'ob u nojbe'enil.

⁷Cu p'áatal sublac u yóolo'ob le máaxo'ob kultico'ob beetbil kuobo', le máaxo'ob ca'anal u yicho'ob tu yo'olalo'ob. ¡Tuláacal le kuobo' cu chintalo'ob tu táan Yuumtzil!

⁸Yuumtzil, Sión yéetel u noj caajilo'ob Judae' cu sen qui'imactal u yóolo'ob tu yo'olal a wa'almajt'aano'ob,

⁹tumen teche', sen ca'anal Yuumtzilech, ti' yanech tu yóokol tuláacal le lu'uma' yéetel asab ya'ab u ca'anlil ti' tuláacal le kuobo'.

¹⁰Yuumtzile' u yaacuntmaj le máaxo'ob u p'ecmajo'ob lekaaso'; cu canantic u cuxtal le máaxo'ob u kubmaj u yóolo'ob ti'o'; ma' táan u cha'ic u lúubulo'ob tu kab le j loolob máaco'obo'.

¹¹Le sáasilo', cu jóopbal u ti'al utzil máac; le qui'imac óolalo' u ti'alo'ob le máaxo'ob toj u pucsi'ikalo'obo'.

¹²¡Qui'imacchajac u yóolo'ob ti' Yuumtzil le utzilmáaco'obo', u qui'iqui' t'anto'ob xan u quili'ich kaaba'!