Read Yucateco Salmos 98 Bible Online

Salmos 98 - Yucateco bible

Salmos 98

¹¡Kaye'ex ti' Yuumtzil túumben kaay, tumen dzo'oc u beetic jak óol meyajo'ob! ¡Dzo'oc u ti'alintic dzáancha'atajil yéetel u nojoch páajtalil yéetel xan u quili'ich kab!

²Yuumtzile' dzo'oc u ka'aytic u dzáancha'ajtajil; dzo'oc u ye'esic u páajtalil tu táan le múuch' caajo'obo',

³ka'aj ti' u yaacunaj yéetel u kub óolal tu yo'olal ucaajil Israel. Tac u xuul u naklil yóokolcaabe' dzo'oc u yila'al u dzáancha'ataj c Yuum Ku.

⁴Kaaynene'ex ti' Ku yéetel qui'imac óolal, u caajile'ex tuláacal le lu'uma'; cha'ex u qui'imac óolale'ex, yéetel kaye'ex kaayo'ob.

⁵Kaye'ex kaayo'ob ti' Yuumtzil je'el bix u bin u pa'axal le arpao', je'el bix u bin u pa'axal táabil paaxo'obe'.

⁶Kaaynene'ex yéetel qui'imac óolal tu táan Yuumtzil ajaw; kaaynene'ex je'el bix u bin u pa'axal le jóopsbil paaxo'obo'.

⁷Awatnac le ka'anabo' yéetel tuláacal le ba'axo'ob yano', le yóokolcaaba' yéetel u caajilo'ob;

⁸papaxkabnaco'ob le áalcab ja'obo'; u nupuba'ob le pu'uco'obo' ti' u yawatilo'ob qui'imac óolal

⁹tu táan Yuumtzil, máax táan u méektáantic le lu'uma', Leti' bíin u méektáant u caajilo'ob le yóokolcaaba' yéetel tojil bey xan yéetel queetil.