Read Yucateco Proverbios 1 Bible Online

Proverbios 1 - Yucateco bible

Proverbios 1

¹Ba'axo'ob tu ya'alaj Salomón, u paal David u ajawil Israel,

²u biilalil le t'aano'oba' u ti'al u dzáa ojéelajil yéetel ca'ansajil, áantaj u ti'al u ma'alob ch'a'a nu'ucta'al t'aano'ob

³u ti'al u yantal ti' wíinic, utzil tuucul, ti'ibil óolal, tojil cuxtal yéetel yiiyij tuucul;

⁴cu beetic u ma'alob tuucul le táanquelemo'ob j ma' na'ato'obo', u ti'al xan u dzáa ti'ob kaj óolal yéetel u ti'al u máansic u tuuculo'ob.

⁵Le aj ojel, máax yaan u na'at yéetel cu qui' u'uyic t'aane' yéetel cu yantal u yojéelaj cu ma'alob canbal xan

⁶u ti'al u ch'a'a nu'uct le ba'ax cu ya'alico'ob le aj ojéelajo'obo', u t'aano'ob, u quet t'aano'ob yéetel u dzaa na'ato'ob.

⁷Le ojéelajo' cu chúunul yéetel u tzi'iquil Yuumtzil, sle j ma' na'ato'obo' cu cúulpachtico'ob le ojéelajo' bey xan le ca'anbesajo'.

⁸In j xibil paal, táan óolt ba'ax cu nu'uctic ti' teech a taata, ma' xan a quex óoltic u ca'anbesaj a maama,

⁹tumen bíin a ti'alint bey jun p'éel qui'ichquelem ba'al cu jadzutzquinaje': bey jun p'éel báakcaale', wa bey jun p'éel péet jo'ole'.

¹⁰Wa le aj kebano'ob u káato'ob u tuseche', ¡ma' a cha'ic u tusiquecho'ob in j xibil paal!

¹¹Wa ca kuchuc u ya'alo'ob xan ti' teech: Co'oten t éetel; chéen tu yo'olal mix ba'ale' cone'ex c dzic jun p'éel léech u ti'al quíimsic wa máax j ma' si'ipil le quéen máanaque'.

¹²Yaan c lukic cuxa'ano'ob le máaxo'ob yaan subtalo'obo' je'el bix u lu'ukul le quimeno'ob cu lúubulo'ob ichil le mucnalo'.

¹³Bíin anac ti' to'on tuláacal u jejeláasil ayikalilo'ob, ¡bíin c chup c najilo'on yéetel tuláacal le ba'alo'ob c ocoltmajo'!

¹⁴Co'oten a táacbes t éetel ba'ax cu taal u kiinil ti' teech beyo' bíin anac ti' to'on jun p'éelili' ayikalil.

¹⁵¡Ba'ale' ma' a bin tu yéetelo'ob, in paal! Náachcuntabáa ti' u kaakas cuxtalo'ob,

¹⁶tumen taac u beetico'ob loob; ¡taac xan u wequico'ob ki'ik!

¹⁷Quex mix jun p'éel utz cu taasic u dzabal jun p'éel léech wa cu páajtal u yila'al tumen le ch'íicho'obo',

¹⁸le máaco'obo' cu dzico'ob léech u ti'alinto'ob cu dzáico'ob xan u cuxtalo'ob tu chi' quíimil.

¹⁹Bey u dzo'ocol le kaakas aj dzíibolalo'obo'; cu quíimsa'alo'ob tumen u kaas dzíbolalo'ob.

²⁰Ti' bejo'ob yéetel ti' kíiwico'ob le ojéelajo' cu beetic u yu'uba'al u t'aan;

²¹cu ka'aytic u t'aano'ob tu jooltaquil naj, ti' u cúuchilo'ob tu'ux cu sen much'tal caaj:

²²Táanqueleme'ex mix ba'al a wojele'ex, j p'a'astaje'ex yéetel j ma' na'ate'ex, ¿tac ba'ax kiin bíin jáawac a yaacuntque'ex le x ma' ojéelajilo', tac ba'ax kiin bíin a p'ate'ex u qui'imac óolalil a p'a'astaje'ex bey xan a p'ectique'ex le ojéelajo'?

²³Qui' u'uye'ex in nu'uc t'aano'obi', téen túune' bíin in chupe'ex yéetel in pixan; bíin in dzáa a kaj óolte'ex in tuuculo'ob.

²⁴Tene' dzo'oc in t'anique'ex, dzo'oc xan in payal t'antique'ex, ba'ale' te'exe' ma' a wóolte'ex a táan óoltene'exi',

²⁵Ma' a káat a wu'uye'ex in tzol xiquino'ob; ma' ta wóoltaje'ex a wu'uye'ex in nu'uc t'aano'obi'.

²⁶¡Je'el u kuchul u kiinil in che'ej le quéen kuchuc te'ex le yaj óolalo'! ¡Bíin in che'ejte'ex le quéen in wila'a' táan quíimile'ex yéetel sajaquile'

²⁷le quéen talac ta wóokole'ex sajaquilo'ob yéetel talam ba'alo'ob, yaamyam óolal yéetel yaj óolal, bey jun p'éel moson cu jutic tuláacal ba'ale'!

²⁸Ti' le kiino' bíin a t'aanene'ex, ba'ale' ma' bíin in núuc a t'aani'; bíin a caxanten, ba'ale' ma' bíin a núuptantene'exi';

²⁹tumen ca kex óotique'ex le ojéelalo', ma' xan a káate'ex a tzique'ex Yuumtzili'.

³⁰Ma' ta éejemtique'ex in tzol xiquino'ob; ca kex óoltique'ex xan in nu'uc t'aano'ob.

³¹¡Yaan a mukyajtique'ex u tojol a kaakas cuxtale'ex! ¡bíin náacac a wóole'ex xan ti' a kaakas cuxtale'ex!

³²Le máaxo'ob mix ba'al u yojelo'obo' cu quíimsa'alo'ob tumen u j ma' ojéelajilo'ob; le j ma' na'ato'obo' bíin xu'ulsa'aco'ob tumen u j ma' dzaa óolalo'ob;

³³ba'ale' le máax cu dzáic u yóol u yu'ubiquene' bíin cuxlac ichil jéedzel óolalil, bíin cuxlac xan x ma' sajaquil ti' quíimil.