Read Yucateco Proverbios 10 Bible Online

Proverbios 10 - Yucateco bible

Proverbios 10

¹U ya'alaj t'aano'ob Salomón: Le paal yaan u yojéelaje' cu qui'imaccuntic u yóolo'ob u taata bey u maama; le paal mixba'al u yojele' cu beetic u yaj óolalo'ob.

²Le ocoltbil ayikalilo'ob ma' tu taasico'ob mix jun p'éel utz, ba'ale' u beeta'al ba'al tu beele' cu beetic u je'echel le quíimilo'.

³Yuumtzile' ma' tu p'atic yéetel wi'ij le máax utze', ba'ale' ma' tu cha'ic u na'ajtal le j loolob wíinico'.

⁴Jun p'íit meyaje', cu taasic óotzilil; ya'ab meyaje', cu taasic ayikalil.

⁵U yúuchul jooch yáax kiine' u ti'al aj ojéelajo'ob; u yúuchul wenel tu kiinil jooche', u ti'al j ma' subtalo'ob.

⁶Tu yóokol máac utze' cu taal ya'abcach utzil, ba'ale' le j loolob máaco' cu ma'acal u chi' tumen kasa'anil.

⁷Le máac utzo' cu ka'ajsa'al yéetel qui' t'aano'ob; le j loolob máaco' séeb u tu'ubsa'al.

⁸Le máax aj ojéelaje' cu yu'ubic tzol xiquino'ob; le máax cu ya'alaj ba'ale' cu bin kaasil ti'.

⁹Le máax mina'an u si'ipile', ti' mix ba'al sajac; le máax kaas u cuxtale', kaas bíin dzo'ococ.

¹⁰Le máax cu chak iche'[3] cu beetic u yantal nucuch kaaso'ob; le máax cu ya'alaj ba'ale' cu bin kaasil ti'.

¹¹U t'aano'ob le máax toj u cuxtale', u sayabilo'ob cuxtal, ba'ale' le loolob máaco' utz u ti'al u beetic loob.

¹²Le p'eeco' cu léecsic ba'atelo'ob, ba'ale' le yaacunajo' cu sa'atsic tuláacal si'ipilo'ob.

¹³Tu chi' le aj ojéelajo' yaan ojéelaji'; u ti'al le j ma' tuuculo', jun puul jaadz tu pu'uch.

¹⁴Le aj ojéelajo' cu mucultic ba'axo'ob u yojel, ba'ale' le quéen t'aanaco'ob le máaxo'ob mix ba'al u yojelo'obo' yaayaj ba'al cu taasic.

¹⁵U ta'acbesajil le ayikalo' u ayikalil; u bin kaasil ti' le óotzilo', u yóotzilil.

¹⁶U bo'olal le máax toj u cuxtale' leti' le cuxtalo'; ba'ax cu najmatic le kaakas máaco', u bin kaasil ti'.

¹⁷Le máax táan óoltic le tzol xiquino', bíin cuxlac; le máax ma' tu táan óoltique', bíin quíimic.

¹⁸Le aj tuutuso'obo' cu mucultico'ob le p'eequilo', le j ma' ojéelo'obo' cu ki'itbesico'ob le x mucul t'aano'ob.

¹⁹Le máax ya'ab u t'aane', ya'ab u si'ipil; le máax cu tucultic ba'ax cu ya'alique' jun túul aj ojel.

²⁰U t'aan máax toj u cuxtale' plata u ca'aj; u tuucul loolob máaque' mix ba'al u tojol.

²¹U t'aan máax toj u cuxtale' cu ca'anbesic ya'abcach máaco'ob, ba'ale' le j ma' ojéelo' u chi' quíimsic.

²²U qui' t'aan Yuumtzile' ayikalil ma' tu taasic ki'inamil tu yéetel.

²³Le j ma' ojéelo' utz tu yóol u pajic u subtal u yéet wíinic; le aj ojéelo' utz u yóol yéetel le yéetel ojéelajo'.

²⁴Ti' le ba'ax cu yáalcab le loolob wíinico' leti' cu yúuchul ti', ba'ale' le toj u cuxtale' cu yúuchul ba'ax cu dzíiboltic.

²⁵Cu taal le chac ikalo'[4] cu sa'atal le loolob wíinico', ba'ale' le toj u cuxtalo' ma' tu péec tu'ux yaan.

²⁶Le ma'akóolo' u ti'al le máax túuchitique', bey su'udz ba'al ti' coj, bey buudz ti' iche'.

²⁷Tziiquil ti' Yuumtzile' cu chowacuntic cuxtal, ba'ale' ti' le loolob wíinico'obo' cu cóomquinta'al.

²⁸U ti'al le máaxo'ob toj u cuxtalo'obo', qui' óolal u alab óolal; u ti'al le loolob wíinico'obo', yaayaj ba'ax cu taasic.

²⁹Yuumtzile' cu beetic utz ti' máax beetic utz, ba'ale' cu jadzic le cu beetico'ob kaaso'.

³⁰Mix bikin bíin xi'ic kaasil ti' le toj u cuxtalo', ba'ale' le loolob wíinico' ma' bíin xaanac te j lu'uma'.

³¹Tu chi' le máac toj u cuxtale' cu jóokol ojéelajil, ba'ale' ti' le kasa'an wíinico' bíin xo'otoc u yaak.

³²Le máac toj u cuxtale' utz yu'uba'al ba'ax cu ya'alic; le j loolob máaco', chéen tuuso'ob cu ya'alic.