Read Yucateco Proverbios 11 Bible Online

Proverbios 11 - Yucateco bible

Proverbios 11

¹Yuumtzile' u táaj p'eec le p'iso'ob ma' chuca'ano'obo' utz tu t'aan le p'iso'ob chuca'antaco'.

²Le ca'anal icho' cu taasic paj subtal; le ojéelajo' ti' yaan yéetel le cabal óolo'obo'.

³Le máaco'ob toj u cuxtalo'obe', cu beetico'ob ba'ax tu beel; le máaco'ob ma' tu beetico'ob ba'ax tu beele' bíin xu'ulsa'aco'ob tumen u tuuso'ob.

⁴Le ayikalilo' mix ba'al u biilal tu kiinil xot kiin, ba'ale' le ti'ibil óolalo' cu tocsaj ti' quíimil.

⁵Le ti'ibil óolalo' cu tojquintic cuxtal le aj ti'ibil u cuxtalo', ba'ale' le loolob wíinico' cu lúubul tu yo'olal u kasa'anil.

⁶Le ti'ibil óolalo' cu jáalkabtic le máaxo'ob toj u cuxtalo'obo', ba'ale' le aj kebano'obo' bíin léechta'aco'ob tumen u kebano'ob.

⁷Le quéen quíimic loolob máaque', cu quíimil pa'ate' yéetel u alab óolalo'ob bey xan u dzíibolalo'ob.

⁸Kue' cu toquic ti' yaj óolal le aj ti'ibil cuxtalo', tu cúuchile' cu dzáic le loolob máaco'.

⁹U t'aano'ob le loolob máaco' cu beetic kaas ti' yéet wíinic, ba'ale' u na'at le aj ojéelo' cu taasic tocsajil ti'ob.

¹⁰Le kiin cu ayikaltal le no'oja'an u cuxtalo'obo', cu qui'imactal u yóol le caajo'; le kiin cu quíimil le loolob máaco'obo', caaje' cu síit' yéetel qui'imac óolal.

¹¹Yéetel u qui' t'aan le no'oja'an cuxtalo'obo' cu ayikaltal caaj, ba'ale' u t'aan le loolob wíinico'obo' cu yóotzilcuntico'ob.

¹²Le j ma' tuuculo' cu ya'alic ba'al tu yo'olal yéet bisajbáil; Le máax utz u tuucule' cu maquic u chi'.

¹³Le máax cu ki'itbesic tzicbale' tuláacal ba'al cu tzicbaltic; le máax cu canantic ba'ax cu ya'alique' cu ta'acquic ba'ax ma' u naj u yojéelta'ali'.

¹⁴Wa mina'an ma'alob méektáane' le caajo' cu bin kaasil ti'; u bin utzil ti' le caajo' ti' u taal ti' ya'ab tzol xiquino'obe'.

¹⁵Kaas u bin ti' le máax cuchic u p'aax yaanal máac; le máax ma' tu éejemtic u cuch p'aaxe' jéedzel u cuxtal.

¹⁶Le co'olel t'a'aje' cu beetic tzi'iquil, j xiib sáakole' cu ayikchajal.

¹⁷Le máax cu ch'a'ic óotzile' cu beetic utz tu baatzil, ba'ale' le loolob máaco' leti' caxtic u kaasil.

¹⁸Le j loolob máaco' cu kamic bo'olal ma' tu beeli'; le cu beetic ba'ax no'oja'ane' cu bo'ota'al jach tu beel.

¹⁹U beeta'al ba'ax no'oja'ane' cu chowacuntic le cuxtalo'; ba'ale' u beeta'al ma' no'oja'ane' cu beetic u séebtal le quíimilo'.

²⁰Yuumtzile' cu p'ectic le máaxo'ob kaas u tuuculo'obo', ba'ale' cu pactic yéetel utzil le máaxo'ob no'oja'an u cuxtalo'obo'.

²¹Tu jaajile' le loolob máaco' ma' tu p'áatal x ma' jaadzil, ba'ale' le máaxo'ob no'oja'an u cuxtalo'obe' bíin xi'ic ti'ob utzil.

²²Jun jokni' oro u ca'aj, tu ni' kéekene' bey le qui'ichpam co'olel jun p'íit u na'ate'.

²³U dzíibolal máaxo'ob no'oja'an u cuxtalo'obe' ma'alob u laj béeytal; u dzíibolal le j meyaj loobo'obo' chéen cu léecsic p'u'ujulil.

²⁴Yaan máac utz u siibal cu kamic asab ya'ab ti' le cu dzáico', yaan xan máac dzu'ut cu quíimil ich óotzilil.

²⁵Le máax ma' dzu'ute', cu bin utzil ti', le máax cu siibale', cu máatan xan.

²⁶Le máax cu manic janalbe'en neeko'ob cu ta'aquic u ti'al u con co'oje', cu loolob t'anta'al tumen caaj; le máax conique', cu qui' t'anta'al.

²⁷Le máax cu caxtic u beet utze', utz u pacta'al; le máax cu máan tu paach kaase', kaas u yila'al.

²⁸Le máax cu alab óoltic u ayikale', bíin lúubuc bey báanal u tiquin le' che'e', ba'ale' le máaxo'ob no'oja'an u cuxtalo'obo' yaan u cuxa'antal u yóolo'ob bey u ya'ax le' che'e'.

²⁹Le máax ma' tu canantic u yotoche', mix ba'al bíin p'áatac ti'; le j ma' ojéelo' mantadz bíin palitzilta'ac tumen le aj ojéelo'.

³⁰Ba'ax no'oja'ane' cu dzáic cuxtal le meyaj loobo' cu lukesic.

³¹Wa le máax no'oja'an u cuxtal cu najmatic u bo'olal way lu'ume', ¡bix bíin p'áatac ma' u kamic le cu najmatic le j loolob wíinic yéetel le aj kebano'!