Read Yucateco Proverbios 12 Bible Online

Proverbios 12 - Yucateco bible

Proverbios 12

¹Wa ca yaabiltic u cóola'al a xiquine', ca yaabiltic le ojéelajo'; u p'ecta'al le keyajo' lelo' j ma' ojéelaj.

²Le utzul máaco' cu éejemta'al tumen Yuumtzil, le ma' j subtalo' ma' tu éejemta'al tumen.

³Le kaaso' ma' mootz u ti'al mix máaqui'; le máaxo'ob no'oja'an u cuxtalo'obo' ma'alob taabalilo'ob.

⁴Co'olel utz u cuxtale' cu beetic jun túul ajaw u yíicham, ba'ale' le kaakas atano' jun puli' u xu'ulsic.

⁵Máaco'ob no'oja'an u cuxtalo'obe' cu tuuculo'ob tu beel le j loolob máaco'obo' chéen tuus yaan tu poolo'ob.

⁶U t'aan loolob máaque' jun p'éel u léechil quíimil; u t'aan le máac no'oja'an ba'ax cu beetique', u ti'al cuxtal.

⁷Le loolob máaco'obo' cu lúubulo'ob, leti' u xuulo'ob, ba'ale' u yotoch le máac no'oja'an u cuxtale' utz yanil.

⁸Je'el buca'aj u na'ate', bey u yúuchul utzil t'aan tu yo'olal, ba'ale' le j ma' na'ato' cu najmatic kex óolta'al.

⁹Mixba'al ti' ca kex óolta'ac wa utz u tzéenta'al, ba'ax u biilal ca tzi'iquic wa ma' chuca'an u janali'.

¹⁰Le máac no'oja'an u cuxtale' u yojel cu mukyaj u yaalako'ob ba'ale' le loolob máaco' ma' tu ch'a'ic óotzil.

¹¹Le máax cu meyajtic u lu'ume' yaan ya'ab waaj ti', le ma' na'ato' cu beetic ba'alo'ob mix ba'al u biilal.

¹²Le kaakas dzíibolalo'obo' leti'ob u léechil le loolob máaco'obo'; ba'ale' u mootz le máaxo'ob no'oja'an u cuxtalo'obo' mina'an u xuul.

¹³Le loolob máaco' cu sa'atal u yóol ichil u tuuso'ob, ba'ale' le máac no'oja'an u cuxtale' cu jóokol ma'alob ti' u yaj yanil.

¹⁴Ti' tuláacal wíinic cu suut u jeel ba'ax cu ya'alic cu kamic xan u bo'olal ba'ax cu beetic.

¹⁵Le j ma' na'ato' cu tucultique' tuláacal ba'ax cu beetique' ma'alob, ba'ale' le máax yaan u yojéelaje' cu dzáic u yóol ti' tzol xiquino'ob.

¹⁶Le j ma' na'ato' séeb u ye'esic p'uja'an; le máax utz u tuucule' ma' tu táan óoltic u ya'al ba'al ti'.

¹⁷Máax ma' tu tuuse' cu ya'alic ba'al jaaj; le máax ma'a tu ya'alic ba'al jaaje' cu babal tuus.

¹⁸Yaan máaxo'ob cu beetico'ob loob yéetel u t'aano'ob, ba'ale' t'aano'ob le aj ojéelo'obo' cu dzáico'ob toj óolal.

¹⁹Le máax cu ya'alic u jaajile' ma'alob yanil, ba'ale' le j tuuso' bíin tze'elec.

²⁰Ichil ba'axo'ob cu tucultico'ob le loolob máaco'obo' yaan tuusi'; u tzol xiquin máac j ma' ba'atele' yaan qui'imac óoli'.

²¹Le máac no'oja'an u cuxtale' mix bikin bíin u mukyajt mix jun p'éel kaas, ba'ale' le loolob máaco' tuláacal le kaaso'ob bíin taalac yóokol.

²²Yuumtzile' u che'e p'eec le máaxo'ob cu tuuso'obo', ba'ale' yéetel utzil óolal cu pactic le máaxo'ob beetic ba'al jaaj.

²³Le aj na'ato' ma' tu babal tzicbaltic ba'ax yojel, ba'ale' le j ma' na'ato' cu babal tzicbaltic u j ma' na'atil.

²⁴Le máax cu meyaje' cu méektáantaj; le ma'akóolo' cu méektáanta'al.

²⁵Le yaayaj óolo' cu t'ona'ancuntic wíinic; le utzil t'aano' cu qui'imacuntic u yóol.

²⁶Le máac no'oja'an u cuxtale' cu nu'uctic u beel u láak, ba'ale' le loolob máaco'obo' cu sa'atal u beelo'ob.

²⁷Le ma'akóol aj dzoono', ma' tu dzonic mix ba'al, ba'ale' le sáakol wíinico' cu náajaltic ya'abcach ayikalilo'ob.

²⁸U cuxtalil ti'ibil bejile' cu dzáic cuxtal; le j ma' tuuculile' cu taasic quíimil.