Read Yucateco Proverbios 13 Bible Online

Proverbios 13 - Yucateco bible

Proverbios 13

¹Paal yaan u yojéelaje' cu kamic u tzol xiquin u taata le j ma' subtalo' ma' tu éejemtic u ke'eyel.

²Tuláacal ba'ax cu ya'alic wínique' bíin suunac tu yóokol, ba'ale' le máax cu beetic kaas tu paach u yéet wíiniquile' taac u beetic loob.

³Le máax cu canantic ba'ax cu ya'alique' tu juunal cu canaticabáa; le máax ya'ab u t'aane' tu juunal cu yóotzilcunticubáa.

⁴Ma'akóole' cu u dzíibolal ba'ale' ma' tu yantal mix ba'al ti'; le máax cu meyaje', cu ayikaltal.

⁵Máax no'oja'an u cuxtale' cu p'ectic tuus; máax loolob wíinique' cu paj subtal mina'an xan tziiquil ti'.

⁶Toj cuxtale' cu canantic máax mina'an si'ipil ti'; loobile' cu xu'ulsic le aj kebano'.

⁷Yaan máaxo'ob mix ba'al yaan ti'obe' cu babal a'alico'ob ayikalilo'ob, yaan xan máaxo'ob tuláacal ba'al yaan ti'ob ba'ale' cu cuxtalo'ob bey óotzilo'obe'.

⁸U taakin le ayikalo' leti' toquic u cuxtal; óotzile' mix máax cu táabal u káat taakin ti'.

⁹Máaxo'ob no'oja'an u cuxtalo'obe' beyo'ob sáasil cu jóopbale'; loolob máaco'obe' beyo'ob x t'uchub sáas cu tu'upule'.

¹⁰Le ca'anal icho'obo' chéen cu léecsico'ob ba'atel; le ojéelajo' ti' yaan yéetel le j cabal óolo'obo'.

¹¹Jomoch ayikalile' cu jun p'ittal; le máax cu líikesic jujun p'íitile' cu ya'abcuntic.

¹²Alab óolal ma' tu béeytale' pucsi'ikal cu yaj óolal, ba'ale' dzíibolaj cu béeytale' bey jun cúul u che'il cuxtale'.

¹³Le máax ma' tu yu'ubic jun p'éel túuchi' t'aane', yaan u yaj óoltic; le máax éejemtic tusbele' bíin bo'ota'ac.

¹⁴U ca'anbesaj aj ojéelaje' u sayabil cuxtal cu toquic máac ti' u léechil quíimil.

¹⁵Le ma'alob tuuculo' cu najmatic yaabilaj, ba'ale' le máax cu kexic u yéet cajtale' bíin xi'ic kaasil ti'.

¹⁶Le máax yaan u tuucule' cu beetic ba'ax tu beel, ba'ale' le j ma' na'ato' cu babal tzicbaltic u neetzil.

¹⁷Le loolob aj bisaj t'aano' cu púutic loolob ba'alo'ob, ba'ale' le utz aj bisaj t'aano' cu púutic qui'imac óolal.

¹⁸Óotzilil yéetel sublaquil bíin yanac ti' le máax ma' tu yu'ubic tzol xiquin; nucuch tziiquilo'ob bíin yanac ti' máax cu ch'enxiquintic a'almaj xiquin.

¹⁹Dzíibolal cu béeytale' cu taasic qui'imac óolal. Le j ma' tuuculo' ma' tu páajtal u náachtal ti' le kaaso'.

²⁰Bisabáa yéetel le aj ojéelalo'obo' ca yanac ti' teech ojéelaj; bisabáa yéetel j ma' na'ato'obo' beyo' bíin kasaquech.

²¹Le aj kebano'obo' cu ch'a'apachta'alo'ob tumen kaas; le toj u cuxtalo'obo' bíin bo'ota'aco'ob yéetel utz.

²²Utzil máaque' cu p'atic ba'al u ti'al ti' u yáabilo'ob; le aj kebano' cu much'quintic ayikalilo'ob u ti'al le máax no'oja'an u cuxtalo'obo'.

²³Tu cool óotzile' yaan ya'ab janali', ba'ale' tu'ux ma' tu beeta'al ba'ax tu beele', ya'ab ba'ax cu sa'atali'.

²⁴Máax ma' tu ya'alic u nu'uc ti' u paale' ma' u yaabiltmaji'; le máax cu ya'alic u nu'uc ti' u paale' u yaabiltmaj.

²⁵Le máac no'oja'an u cuxtale' cu janal u ti'al u na'ajtal, ba'ale' le loolob máaco' ma' tu xu'ulul u janal.