Read Yucateco Proverbios 14 Bible Online

Proverbios 14 - Yucateco bible

Proverbios 14

¹Le co'olel yaan u yoojéelaje' cu líiksic u yotoch; le co'olel mix ba'al u yojele' yéetel u kuuxtal cu kascuntic.

²Le máax no'oja'an u cuxtale' cu tziquic Yuumtzil; le máax keechel u cuxtale' cu kex óoltic.

³Tu chi' le máac mix ba'al u yojelo' cu jóokol nonoj báil t'aano'ob; u chi' le aj ojéelajo', cu canantic.

⁴Le kiin cu mina'antal colnáalo'obe', cu mina'antal ba'al jaanta'al; yéetel u muuk colnáale' cu ya'abtal ba'al jo'ochol.

⁵Le jach aj jaajcunajo' cu ya'alic ba'ax jaaj; le j ma' utz jaajcunajo' chéen tuutuso'ob cu ya'alic.

⁶Le j ma' subtalo' cu caxantic ojéelale' ba'ale' ma' tu nuptáantic; u ti'al le máax yaan u na'ato', ma' talam le ojéelajilo'.

⁷Tzelabáa ti' le j ma' na'ato', tumen tu chi'e' mix bikin bíin yanac ti' teech kaj óolajil.

⁸Ojéelaje' cu beetic u yojéeltic bix u najmal cuxtal le aj ojéelajo', ba'ale' le j ma' ojéelajo' cu tu'usul tumen u j ma' ojéelajil.

⁹Le j ma' ojéelajo'obo' cu sutico'ob che'ejil u si'ipilo'ob, ba'ale' ti' le máaco'ob toj u cuxtalo'obo' utz u bin ti'ob.

¹⁰Le pucsi'ikalo' cu kaj óoltic u mukyajo'ob, ma' xan tu dzáic u qui'imac óolal ti' máax ma' u kajoli'.

¹¹U yotoch le loolob máaco'obo' yaan u xu'ulsa'al; u ti'al le máaco'ob toj u cuxtalo'obo' bíin xi'ic utzil ti'ob.

¹²Yaan máaque' cu tuclic utz ba'ax cu beetic, ba'ale' tu xuule' cu nactáantic quíimil.

¹³Tac u ti'al che'eje' cu yajtal le a pucsi'ikalo', tu dzoocbale' le qui'imac óolo' cu xu'ulul yéetel okol.

¹⁴Le j ma' na'ato' utz tu yóol bix cuxlic; le utzul máaco' utz u yóol yéetel ba'ax cu beetic.

¹⁵Le j ma' tuuculo' cu éejemtic tuláacal ba'ax cu ya'ala'al ti'; le máax utz u tuuculo' cu táan óoltic tu'ux cu dzic u yooc.

¹⁶Le aj ojéelajo' cu yilic bix u taal le kaaso' cu tzelicubáa ti', ba'ale', ba'ax u káat ti' le j ma' ojéelo'.

¹⁷Le máax séeb u p'u'ujule' cu beetic ba'al x ma' tuuculil, le máax cu yáax máansic u tuucule' ma' tu jáan péecsic u kab.

¹⁸Le máaxo'ob ma' utz u tuuculo'obo' cu ti'altico'ob u j ma' ojéelajilo'ob; le máaxo'ob utz u tuuculo'obo' cu bakpachta'alo'ob tumen kaj óolajil.

¹⁹Le j loolob máaco'obo' bíin u chíinpolto'ob le utzil máaco'obo'; le aj loolob cuxtalo'obo' bíin xi'ico'ob káatanquil tu jool u najilo'ob le aj ti'ibil cuxtalo'obo'.

²⁰Óotzile' cu ch'a'a kuxta'al tac tumen u yéet bisajbáil; ayikale' ma' tu bineltic máax láakintic.

²¹Le máax cu kex óoltic u yéet bisajbáe' cu kebanchajal, Ba'ale' ¡qui' u yóol le máax cu ch'a'ic óotzilil ti' le óotzilo'!

²²Le máax cu caxtic meyaj loobe', cu sa'atal u yóol; le máax cu caxtic u beet utze' cu yaabilta'al tu jaajil.

²³Ti' tuláacal xup muuke' cu yantal u náajalil; ti' babal t'aane' cu taal chéen óotzilil.

²⁴U péet jo'olal le j ojéelajo' na'atil; u ti'al le j ma' ojéelajilo', u j ma' na'atil.

²⁵Le jach aj jaajcunajo' cu toquic ti' quíimil u yéet wíiniquil; le aj tuus jaajcunajo' cu beetic u quíimsa'al.

²⁶U tzi'iquil Yuumtzile' cu dzáic jun p'éel ma'alob alab óolalil cu dzáic jéedzel xan ti' paalal.

²⁷U tzi'iquil Yuumtzile' u sayabil cuxtal cu tzelic wíinic ti' u léechil quíimil.

²⁸U méektáanta'al ya'ab caaje' jun p'éel tziiquil u ti'al ajaw; u méektáantic jun p'íit caaje' óotzilil u ti'al.

²⁹Kuchpaja'an óolale' u chíiculal ya'ab na'at; x ma' kuchpajal óole' u chíiculal x ma' na'atil.

³⁰Le jéedzel tuuculo' cuxtal u ti'al le wíinclilo', ba'ale' le saawinaj óolalo' cu laabcuntic tac le baaquelo'obo'.

³¹Le máax cu yedzic óotzile' cu poch'ic u Aj Beetajil, ba'ale' cu tzi'iquil tumen le máax cu ch'a'a' óotziltico'.

³²Le loolob máaco' cu quíimsa'al tumen u kaasa'anil; le wíinic utz ba'ax cu beetique' cu cananta'al tumen u yutzil.

³³Le ojéelajo' cu cajtal ti' poolo'ob utz u tuuculo'ob, ba'ale' ichil le ma' u yojelo'ob mix ba'alo' ma' kaj óola'ani'.

³⁴Le ti'ibil cuxtalo' u ca'anal ichil jun p'éel caaj; kebane' u subtzilil.

³⁵Le palitzil yojel meyaje' cu najmatic u yalab óolal ajaw, ba'ale' le mix ba'al u yojele' cu najmatic u p'uujul.