Read Yucateco Proverbios 15 Bible Online

Proverbios 15 - Yucateco bible

Proverbios 15

¹Jun p'éel utzil núuc t'aane' cu jáawsic le kuuxilo'; jun p'éel keyaj t'aane' cu sen p'u'ujsic.

²Tu chi' aj ojéelajo'obe' cu jóokol ojéelajil; tu chi' j ma' ojéelajo'obe', ma' tu jóokol ojéelajil.

³Yuumtzile' tuláacal tu'ux cu yantal táan u canantic le utzo'obo' bey le kasa'ano'obo'.

⁴Le aak cu t'aan yéetel yaacunaje' jun cúul u che'il cuxtal; le aak cu ya'alic kaakas ba'alo' cu loobiltic le pixano'.

⁵Le j ma' na'ato' ma' tu éejemtic u tzol xiquin u taata; máax cu táan óoltique' cu ye'esic yaan u na'at.

⁶Sen ya'ab ba'alo'ob yaan tu yotoch le máac toj u cuxtalo', ba'ale' le cu náajaltic le loolob máaco' chéen bey u bino'.

⁷Le aj ojéelajo'obo' yéetel u chi'obe' cu t'oxico'ob ojéelajil; le j ma' ojéelajo'obo', yéetel u tuuculo'obe' cu beetico'ob u jela'anil.

⁸Yuumtzile' ma' tu kamic u ti'ibil óolal le j loolob máaco'obo', ba'ale' cu kamic yéetel utzil óolal u payalchi' le aj ti'ibil cuxtalo'obo'.

⁹Yuumtzile' ma' utz u yilic bix u cuxtalo'ob le j loolob máaco'obo', ba'ale' u yaabilmaj le máax toj cuxtalo'.

¹⁰Máax cu p'atic le utzil cuxtalo' cu tojquinta'al yéetel yaayaj ja'adz; le máax u p'ectmaj u ya'ala'al u nu'uc ti'e', cu quíimil.

¹¹Wa tu táan Yuumtzil ti' yaan le quíimil yéetel le muucnalo', ¡bix bíin p'áatac ma' u yilic u tuuculo'ob le máaco'obo'!

¹²Le j ma' subtalo' ma' tu yaacuntic le máax a'alic u nu'uc ti', mix tu yóoltic u much'tal yéetel le aj ojéelajo'obo'.

¹³Pucsi'ikal qui'imac u yóole', ma' muculbe'en tu yich yuumili'; pucsi'ikal koja'ane', chíicbe'en tu yich.

¹⁴Tuucul yaan na'at ti'e' cu caxtic ojéelaj, ba'ale' le j ma' j ojéelajo'obo' chéen binqui' ba'alo'ob yaan tu poolo'ob.

¹⁵U ti'al le máax yaan yaayaj óolal ti'e', mina'an kiin utz u ti'al; u ti'al le máax yaan qui' óolal ti'e', sáamsamal kiinku u ti'al.

¹⁶Óotzilil yéetel u tzi'iquil Yuumtzile', asab ma'alob ti' ayikalil chuup yéetel yaj óolal.

¹⁷U jaanta'al janalbe'en xíiwo'ob ich yaacunaje' asab ma'alob, ti' u jaanta'al u bakel wacax ich p'ectmajil.

¹⁸Le máax séeb u p'uujule' cu léecsic ba'atelo'ob; le máax chuca'an u yóole' cu jáawsic le ba'atelo'.

¹⁹U beel u cool máakole' loob yéetel ki'ixo'ob; u beel máac toj u cuxtale' cóococh sac bej.

²⁰Paal aj ojéelaje' cu qui'imacuntic u yóol u taata bey u yóol u maama; paal j ma' ojéelaje' cu kex óoltico'ob.

²¹Le j ma' ojéelajo' utz u yóol yéetel u j ma' ojéelajil; le aj ojéelajo' cu tojquintic u cuxtal.

²²Tu'ux ma' káat chi'ita'al caaje', le meyajo'ob tuculta'ano'obe' ma' tu béeytal; u béeytal jun p'éel meyaje' cu yúuchul tu yo'olal u ya'ab aj tzol xiquino'ob.

²³¡Buca'aj utzil u caxta'al ba'ax kabéet, asab utz wa cu téec nuptáanta'al!

²⁴U bejil cuxtale' ca'anal cu bin, cu tzelic le aj ojéelaj ti' le quíimilo'.

²⁵Yuumtzile' cu jobic u yotoch le j ca'anal icho', ba'ale' cu kalic u bakpach u yotoch le x quimen íichamo'.

²⁶Yuumtzile' ma' chuca'an u yóol u yilic ba'ax cu tucultic le j loolob wíinico', ba'ale' utz tu xiquin le t'aano'ob cu ya'ala'al yéetel utzil tuuculo'.

²⁷Le máax cu kubicubáa ti' kaakas dzíibolaje' cu yóotzilcuntic u yotoch, ba'ale' le máax ma' tu éejemtic u bo'olalil mac chi'e' cu cuxtal.

²⁸Le máac ti'ibil u cuxtale' cu tucultic ba'ax bíin u núuque, ba'ale' le loolob máaco' cu jóokol loolob t'aano'ob tu chi'.

²⁹Yuumtzile' cu náachtal ti' le j loolob máaco'obo', ba'ale' cu yu'ubic u payalchi' le ti'ibil u cuxtalo'obo'.

³⁰Le máax léemkalac u paacate' cu qui'imaccuntic yóol pucsi'ikal; le ma'alob péectzilo'obo' cu dzáico'ob túumben muuko'ob.

³¹Le máax cu yu'ubic le keyaj cu dzáic cuxtalo', bíin yanac cúuchil u ti'al ichil le aj ojéelajo'obo'.

³²Máax ma' tu yóoltic u ya'ala'al u nu'uc ti'e', u p'ectmajubáa tu báil; le máax ch'enxiquintic u nu'uc ti'e' cu yantal u na'at.

³³U tzi'iquil Yuumtzile' cu dzáic ojéelajil; u ti'al u ka'amal tziiquilo'obe', táanile' kabéet cabal óolal.