Read Yucateco Proverbios 16 Bible Online

Proverbios 16 - Yucateco bible

Proverbios 16

¹Le tuuculil u beeta'al wa ba'axe' u ti'al wíinic; u béeytale', Yuumtzil cu bin u ya'al ca úuchuc.

²Ti' xiibe' ma'alob u yilic tuláacal ba'ax cu beetic, ba'ale' Yuumtzile' leti' máax a'alic wa tu beel.

³Dzáa tu kab Yuumtzil tuláacal ba'ax ca beetic, beyo' cu béeychajal le ba'ax ca tucultico'.

⁴Yaan ba'ax o'olal tu beetilac Yuumtzile' tuláacal ba'al: u ti'al le j loolob máaco', kiinil jaadz.

⁵Yuumtzile' ma' utz u yilic le j ca'anal icho'obo'; yaan u kuchul u kiinil u kamico'ob u jaadzil.

⁶Yéetel yaacunaj bey xan yéetel jaaj cu sa'atsa'al keban; yéetel u tziquic wíinic Yuumtzile', cu náachtal ti' le kaaso'.

⁷Wa cu lúubul utzil ti' Yuumtzil bix u cuxtal jun túul máaque', tac le máax p'ectmail le máaco' cu beetic u bisicubáa tu yéetel.

⁸Jun p'íit náajal yéetel tojile', asab utz ti' le ya'ab cu náajalta'al yéetel oocolo'.

⁹U ti'al wíinic u tucultic u beetic wa ba'ax, u ti'al Yuumtzile' u nu'ucbesic bix bíin beeta'ac.

¹⁰Ajawe' cu t'aan tu yo'olal Ku le beetic ma' tu páajtal u xotkin ma' tu beeli'.

¹¹X ch'uyub p'iiso'ob yéetel p'iiso'obe' Yuumtzil a'alic bey, wa ma', tuláacal u nu'ucul p'iise' leti' beetmail.

¹²Ajawo'obe' cu xet' óoltico'ob le loolob ba'alo'ob cu beeta'alo', tumen jalach káanche'e' cu jéedzel ti' ba'ax no'oja'an.

¹³Le ajawo'obo' cu yaabiltico'ob yéetel cu yilico'ob yéetel utzil le máax cu t'aan yéetel tziiquil bey xan yéetel u jaajil.

¹⁴U p'u'ujul ajawe' u aj bisaj t'aan quíimil, u ti'al aj ojéelajo'ob u caxtico'ob u jóomsico'ob u yóol.

¹⁵U qui'imac óolal ajawe' u séeb chi'il cuxtal, u yutzile' bey múuyal cu beetic u káaxal ja'e'.

¹⁶U ma'anal ojéelaje' asab ma'alob u ti' ma'anal oro; u ma'anal na'ate' asab ma'alob ti' u ma'anal plata.

¹⁷Ba'ax nu'uctic u cuxtalo'ob le máaco'ob ti'ibil u cuxtalo'obo', u tzelicuba'ob ti' kaas; u yilic bix u cuxtale' u cananticubáa.

¹⁸Tu tzéel x ca'anal ichile' cu taal sublaquil; tu tzéel nonoj báile', cu taal lúubul.

¹⁹Cabal óolal ichil óotzilo'obe' asab utz ti' ayikchajal wíinic ichil j ca'anal icho'ob.

²⁰Máax yojel u canant ba'ax yaan ti'e' ma'alob u bin ti'; ¡qui' u yóol le máax cu yocsic u yóol ti' Yuumtzil!

²¹Le máax yojel ba'ax cu tucultique' cu ya'ala'al yaan u na'at; ch'ujuc t'aano'obe' ma'alob u beetic u yúuchul kub óolal.

²²Máax cu tuucul tu beele' ti' leti' yaan u sayabil cuxtal; u ca'anbesa'al j ma' tuucule', ma' tuuculil xan.

²³Le máax u yojel ba'ax cu tucultique' u yojel t'aan ma'alob, u t'aano'obe' cu beetic u yúuchul ma'alob kub óolal.

²⁴Ch'ujuc t'aano'obo' beyo'ob u chúujil caabe': cu ch'ujucquintico'ob u yóol wíinic, cu dzáic u túumben muuk xan.

²⁵Yaan bejo'ob toj u yila'alo'ob, ba'ale' tu xuulo'obe' ti' yaan quíimili'.

²⁶U taaquil u janal le aj meyajo' cu dzáic u muuk u ti'al j meyaj, wi'ijile' leti' beetic u p'is muktic u dzo'ocsic.

²⁷Le máac máan kaas u kuuxtale' cu meyaj loob bey u tóoc chujcabe'; ¡tac u t'aano'obe' bey u tóoch'balo'ob káake'!

²⁸Le j loolob máaco' cu léecsic ba'atelo'ob; le j ki'itbesaj tzicbalo' cu beetic u yantal kuuxiltáanbal.

²⁹Le j loolob cu tusic u yéet bisajbáa yéetel cu beetic u kéechel u cuxtal.

³⁰Cu chakic u yich le máax cu tucultic u beetic loobo'; cu chi'ic u bóoxel u chi' le máax dzo'oc u beetico'.

³¹U saquil u tzo'otzel jo'ole' jun p'éel péet jo'olal tziiquil, náajalta'an yéetel jun p'éel ma'alob cuxtal.

³²Chuca'an óolale' asab utz ti' j xibil máaquil; a pa'ic a j ca'anal ichil ta juunale' asab utz ti' a pa'ic u muuk caajo'ob.

³³Wíinique' cu káat chi'itic ti' j meen ba'ax cu taal u kiin ba'ale' Yuumtzil tucultic ba'ax bíin úuchuc.