Read Yucateco Proverbios 17 Bible Online

Proverbios 17 - Yucateco bible

Proverbios 17

¹U jaanta'al chuchul waaj yéetel jéedzel cuxtale', asab ma'alob ti' u yantal ya'abcach kiinkujo'ob ichil ba'atelil.

²Palitzil u yojel meyaje' cu kuchul u beet u dzuulil j ma' subtal paal, yaan xan u kamic siibalil je'el bix le u láako'obe'.

³Oro yéetel platae' káak beetic u yojéelta'al wa ma'alobo'ob wa ma'; le tuuculo'obo' Yuumtzil beetic u yojéelta'al.

⁴Loolob máac yéetel j tuutus wíinique' cu táan óoltico'ob le binqui' t'aano'obo'.

⁵Máax p'a'astic óotzile', cu pajic u subtal Máax beete; le máax xan cu yutztal tu yo'olal u mukyaj óotzile' ma' bíin p'áatac x ma' jaadzi'.

⁶U péet jo'ol nuxibo'obe', u yáabilo'ob; u ca'anal óolal paalale' u taata yéetel u maama.

⁷Wa ti' le máax mix ba'al u biilal ma' utz u yu'ubic u jadzutz t'aane', mix ti' le tzicbe'en wíinic, u ya'alic tuuso'ob.

⁸Máax cu kamic u bo'olal u maquic u chi' cu tuculticubáa nojoch ba'al, tumen cu ayikaltal yéetel tuláacal ba'ax cu beetic.

⁹Máax ma' tu táan óoltic u ya'ala'al ba'al ti'e' cu beetic u yantal yaacunaj; Le máax cu yaj óoltique' cu náachcuntic u yéet bisajbáa.

¹⁰keyaje' cu beetic asab utz ti' le máax yaan u na'ato', ba'ale' cien u puulul jadze' mix ba'al u biilal le j ma' ojéelajo'.

¹¹Máax j líiksaj óol caaje' chéen j caxan ba'atel, ba'ale' bíin túuxta'ac ti' jun túul loolob aj bisaj t'aan.

¹²Nactáanticabáa yéetel jun túul p'uja'an x osae', asab ma'alob ti' a nactáantic jun túul j ma' ojéelaj u ch'icmubáa u beet wa ba'ax.

¹³Mix bikin bíin u tzelubáa le loob tu yotoch le máax cu sutic kaas tu yo'olal le utz cu beeta'al ti'o'.

¹⁴Máax chu'unsic ba'atele' bey u luksa'al u maac ja' cu tóoch'bale'; asab utz ca a tzelabáa ti' ma'ili' u babliquech.

¹⁵U sa'atsa'al aj si'ipil yéetel u xot kinta'al máax ma' si'ipilchaja'ane' ca'a p'éel ba'al chi'ichnaccuntic Yuumtzil.

¹⁶¿Ba'axten cu taal le j ma' ojéelaj yéetel taakin tu kab, u ti'al u máan ojéelajil, wa mina'an dzo'omel?

¹⁷Jun túul c éet óol utz u bisicubáa mantadze', tu kiinilo'ob yaj óole' bey jun túul a sucu'une'.

¹⁸Le j ma' tuuculo' cu kóochic u p'aax yéet caajal cu cóiticubáa u cuch u p'aax xan u yéet bisajbáa.

¹⁹Le máax utz tu t'aan u ya'alic ba'ale' utz tu yich xan ba'atel; le máax cu tuculticubáa nojoch ba'ale' cu caxtic u bin kaasil ti'.

²⁰Mix bikin bíin u nuptáantubáa le máax kaas u tuuculo' yéetel le utzo'; le aak cu p'u'up'u chicubáa j t'aane' bíin lúubuc ich yaayaj cuxtal.

²¹Paal mix ba'al u yojele' chéen chi'ibal pool u ti'al u taata; paal mix ba'al u biilale' chéen chi'ichnaquil u ti'al u taata.

²²Pucsi'ikal qui'imac u yóole' ma'alob dzaac, ba'ale' ma' óolale' cu beetic u lúubul muuk.

²³Loolob wíinique' cu x mucul kamic u bo'olal mac chi', u ti'al u kechic u tojil ti'ibil bejil.

²⁴Ojéelaje' leti' u káat u chuc le aj na'ato', ba'ale' le máax mix ba'al u yojelo' ma' jéedzel ba'ax u káat u beeti'.

²⁵Paal mix ba'al u yojele', u ti'al u taata yéetel u maamae', u chuun kuuxil yéetel yaayaj óolal.

²⁶Ma' utz u beeta'al u bo'ol le máax mina'an u si'ipilo' mix u ja'adzal le tzicbe'en máaco'.

²⁷Aj ojéelajo'obe' ma' suuc u t'aano'ob ya'abi', máaxo'ob yaan u na'ato'obe' mantadz joomol u yóolo'ob.

²⁸Tac le máax mix ba'al u yojelo' cu paticubáa aj ojéelaj yéetel j na'at, le máax cu maquic u chi'e' utz u tuucul.