Read Yucateco Proverbios 18 Bible Online

Proverbios 18 - Yucateco bible

Proverbios 18

¹Dzu'ut wíinique' chéen cu caxtic u ayikalil, ma' xan tu yóoltic ca a'ala'ac u nu'uc.

²J ma' ojéele' ma' tac u canbali'; chéen u káat ca u'uya'ac u ya'alic le ba'ax u yojel.

³Yéetel le kasa'anilo' cu taal sublaquilo' yéetel ca'anal ichile', cu taal le x ma' tziiquilo.

⁴U t'aano'ob wíinique' bey taamtam ja'obe', ya'abcach ojéelaje' bey ja' cu yáalcabe'.

⁵Le j p'is óolo'obo' ma' u najmal u yáantico'ob máax yaan u si'ipilo' mix ma' u beetico'ob ba'ax no'oja'an ti' máax mina'an u si'ipil.

⁶J ma' ojéelaje', yéetel u chi'e' cu yocsicubáa ich ba'atelo'ob; yéetel u t'aano'obe' cu caxtic nu'uca'an jaadzo'ob.

⁷U t'aano'ob beetic loob ti' le j ma' ojéelajo'; yéetel u chi'e' cu lechic suum tu caal.

⁸Ki'itbesaj tzicbale' bey qui'iqui janale', cu beetico'ob talam loob.

⁹Ma'akóol yéetel le j xup taakino' ¡cu kuchul u beetuba'ob tac láaktzilil!

¹⁰U kaaba' Yuumtzile' bey u cúuchil ma'alob ta'acbesaje' tu'ux cu bino'ob aj ti'ibil cuxtalo'ob u ti'al ca cananta'aco'ob.

¹¹Le ayikalo' cu tucultic u ayikalile' bey jun p'éel caaj bakpachta'an tumen ca'anal tuulumo'ob.

¹²X ca'anal ichile' kaas ba'ax cu taasic; cabal óolale' utz ba'ax cu taasic.

¹³J ma' ojéelaj yéetel jun p'éel ba'al subtzil u núuca'al jun p'éel t'aan wa ma' tu yu'uba'al ba'ax cu ya'ala'al.

¹⁴Koja'ane' u ch'a'a óolal líiksic, cux túun luba'an óolal, ¿Máax je'el u páajtal u líikesique'?

¹⁵Le aj ojéelajo'ob yéetel j na'ato'obo' cu ti'alintico'ob le kaj óolalo'ob cu caxtico'obo'.

¹⁶Yéetel jun p'éel siibale' cu je'epajal tuláacal jool najo'ob cu yúuchul kuchul tac tu yicnal le jalacho'obo'.

¹⁷Máax cu yáax t'aane' cu toquicubáa bey jach jaaj ba'ax cu ya'alique', ba'ale' le quéen kuchuc u aj p'eeque' cu ya'alic ma' jaaj ba'ax tu ya'alaji'.

¹⁸U xot kiin Kue' cu xu'ulsic le ba'atelo'obo' cu jun páaycuntic le máaxo'ob cu ba'atelo'obo'.

¹⁹Jun túul láaktzil poch'a'ane' cu ta'acbesicubáa, asab ti' jun p'éel caaj bakpachta'an tumen u tuulumil. Le ba'atelo' cu jun páaycunsic wíinic bey u tzatzalo'ob[5] jun p'éel jalach naje'.

²⁰tuláacal wíinique' bíin úuchuc ti' ba'ax cu ya'alic.

²¹U cuxtal yéetel quíimil wíinique' yaan ba'ax u yila'a' yéetel u yaak; máaxo'ob ya'ab u t'aano'obe' bíin u mukyajtico'ob ba'ax cu ya'alico'obo'.

²²U nuptáanta'al atane' lelo' u nuptáanta'al ba'ax utz; u chíiculal xan ka'amal u yutzil Ku.

²³Óotzile' cu t'aan yéetel káat óolalo'ob; ayikale' cu núuquic t'aan yéetel ca'anal ichil.

²⁴Dze'edzec bisajbáilo'obe' cu xu'ulul jun súutuc, ba'ale' yaan aj bisajbáilo'obe' utz u bisicuba'ob asab ti' jun túul sucu'un.