Read Yucateco Proverbios 19 Bible Online

Proverbios 19 - Yucateco bible

Proverbios 19

¹Óotzilil yéetel toj cuxtale' asab ma'alob, ti' j ma' ojéelaj yéetel ti' j a'alaj ba'al.

²Ma' utz sen meyaj x ma' tuuculi'; u beeta'al xan ba'ax séeba'ane' cu dzáic tu'ux u beeta'al ba'ax ma' tu beeli'.

³U j ma' tuucul wíinique' cu beetic u satic u beel, cu dzo'ocole' wíinique' ya'alic ti' Yuumtzil yaan u si'ipilil.

⁴Ayikalile' cu ya'abcuntic aj bisajba'ob, ba'ale' óotzile' tac u yéet aj bisajba'ob cu náachatalo'ob ti'.

⁵Aj jaajcunaj cu tuuse' ma' bíin p'áatac x ma' jaadzili'; aj tuuse' ma' bíin jóokoc ma'alobi'.

⁶Utzul máaque' cu siibal, ma' dzu'uti', tuláacal máax caxtic u ti'al u beeticubáa u yéet bisajbáil.

⁷Wa óotzil cu kex óolta'al tac tumen u láake', bix ma' u kex óolta'al tumen u yéet bisajbáil.

⁸Máax cu babal beetic ba'ax tu canaje', utz u tuculticubáa cu bin utzil ti'.

⁹Aj jaajcunaj cu tuuse' ma' bíin p'áatac x ma' jaadzi'; aj tuuse' cu pa'ata'al tumen quíimil.

¹⁰Ma' suuc ti' le j ma' ojéelajo' u dzáic ba'alo'ob co'oj u tojol, mix xan bíin u méektáant jalacho'ob le palitzilo'.

¹¹Máax cu tuucule' cu cóomquintic u yóol j p'uujul, u tziiquile', cu beetic ma' u táan óoltic u ya'ala'al ba'al ti'.

¹²U p'uujul ajawe' bey u yáacam jun túul leóne', ba'ale' u yutzile' bey p'uul ja' tu le' xíiwe.

¹³Jun túul paal mix ba'al yojele' cu beetic u mukyaj u taata. Je'el bix le ja' cu ch'ajlanquile' bey le co'olel x caxan ba'atelile'.

¹⁴Taatae' cu dzáic, naj yéetel ayikalilo'ob; ba'ale' ti' Yuumtzil cu ka'amal le atantzil yaan u yojéelaj.

¹⁵Ma'akóole' cu t'úubul j wenel, bíin xan u máans wi'ij.

¹⁶Le máax cu dzo'ocbesic le nu'ucbe'en t'aano' cu canantic u cuxtal; le máax cu cúulpachcuntic u ca'anbesaj Yuumtzile', cu quíimil.

¹⁷Dzáa majnil ti' óotzile', ti' Yuumtzil cu dza'abal. Yuumtzil xan bíin u bo'ote.

¹⁸A'al u nu'uc ti' a paal ca'aliquil cu páajtal, ba'ale' bic a quíims yéetel jaadz.

¹⁹Le máax ya'ab u p'uujule', cu kamic ba'ax cu najmatic; u to'ocol ti' jaadze' cu jach kastal.

²⁰Ch'a'a nu'uct le tzol xiquino' éejemt u ya'ala'al ti' teech u nu'ucul; beyo' bíin a ti'alt le ojéelajo'.

²¹Wíinique' cu beetic ya'ab jok jo'olo'ob, ba'ale' chéen béeytal le ba'ax u káat Kue'.

²²Ba'ax cu dzíibolta'al ti' wíinique' u kub óolal; asab ma'alob óotzilil, ti' máac cu tuus oocol.

²³U tzi'iquil Yuumtzile' cu bisic wíinic ti' cuxtal; cu cuxtal máac qui'imac u yóol ma' xan tu mukyajtic mix jun p'éel loob.

²⁴Ma'akóole' cu chukic u yo'och waaj ichil u laquil le janalo', ba'ale' mina'an u yóol u kujsic tu chi'.

²⁵Iquil u ja'adzal le j ma' subtal wíinico' cu canbal le j ma' na'ato'; le yaan u na'ato' cu canbal chéen yéetel u tzol xiquinta'al.

²⁶U loobilta'al jun túul taata yéetel u tojolch'inta'ale' jun túul maamae' ba'alo'ob seten subtzil, keyajbe'en xan u ti'al jun túul paal.

²⁷In j xibil paal wa ca ch'enic a táan óoltic in keyaje', bíin a tzelabáa ti' in ma'alob tzol xiquino'ob.

²⁸Aj jaajcunaj cu tuuse' cu che'ejtic ti'ibil bejilo'; le j loolob wíinico' loolob t'aano'ob cu jóokol tu chi'.

²⁹Máakanta'an u che'ilo'ob u ja'adzal le j ma' tzico'obo'; le ma'alob jaadzo'ob u ti'al u paach le j ma' na'ato'obo'.