Read Yucateco Proverbios 2 Bible Online

Proverbios 2 - Yucateco bible

Proverbios 2

¹In j xibil paal Ch'a'a a ti'alint in t'aano'ob; oques ta tuucul in a'almaj t'aano'ob.

²Dzáa a wóol a wu'uyic le ojéelajilo'; kub a tuucul ti' le na'ato'.

³Káat yéetel tuláacal a muuk na'at yéetel ma'alob tuucul

⁴kubabáa tu jaajil a wóol u ti'al a caxtico'ob, je'el bix a caxantic plata wa jun p'éel ayikalil ta'acbesa'an.

⁵Bíin a wojéelt túun ba'ax u káat u ya'al tziiquil ti' Yuumtzil ¡bíin a wojéelt xan ba'ax u káat u ya'al u kaj óolta'al Ku!

⁶Tumen Yuumtzile' leti' máax dzáic le ojéelajilo'; le utzil kaj óolajil, yéetel le kaj óolajilo' cu jóokol tu bóoxel u chi'.

⁷Yuumtzile' cu dzáic u yáantaj yéetel cu canantaj ti' le máaxo'ob toj u cuxtalo'ob, yéetel x ma' si'ipil;

⁸Cu canantic le máaxo'ob cu beet ti'ob ba'ax tu beel yéetel cu canantic le máaxo'ob u yoquesmaj u yóolo'ob ti'e'.

⁹Bíin a wojéelt xan ba'ax no'oja'an yéetel ba'ax tu beel, bíin a dzáa xan a wóol ti' tuláacal ba'ax utz

¹⁰Tumen ta jo'ole' bíin yanac ojéelajil bíin a túunt buca'aj qui'il ojéelajil.

¹¹U mucla'al ba'ax ma' u najmal u yojéelta'al, yéetel le na'ato' leti'ob bíin u canantiquecho'ob mantadz;

¹²leti'ob bíin u tzelecho'ob ti' kaakas bej yéetel ti' le loolob máaco'obo',

¹³ti' le máaxo'ob cu p'áatico'ob le utzil bejo', ti' le cu bino'ob ti' x mucul bejo'ob,

¹⁴le máaxo'ob cu qui'imachajal u yóolo'ob u beetico'ob loob cu papax kabtico'ob xan u beetico'ob loolob,

¹⁵cu xíimbalo'ob ti' keekech bejo'ob bey xan tu tzelajuba'ob ti' u bej toj.

¹⁶bíin u toquecho'ob ti' le co'olel mix máac techo', le cu t'aan jela'an, u ti'al táabsajo'

¹⁷cu xúump'attic u yéet cuxtal tu x lo'obaynil cu tu'ubsic le kax t'aan u beetmaj yéetel Ku.

¹⁸U ch'a'abal le bej cu bin tu tojil u yotoche' bey u ch'a'abal jun p'éel bej cu bin tu beel quíimile';

¹⁹le máaxo'ob cu yocolo'ob tu yotoche' ma' tu ca'a suuto'ob mix bikin bíin u xíimbalto'ob u bejil le cuxtalo'.

²⁰Xíimbalnen túun ti' le ma'alob bejo' cuxlen xan je'el bix u cuxtalo'ob le aj ti'ibil bejo'obo'.

²¹Tumen le máaxo'ob no'oja'an u cuxtalo'ob yéetel x ma' si'ipile' bíin cuxlaco'ob jun puli' te j lu'uma';

²²ba'ale' le loolob máaco'ob yéetel le j ca'a p'éel icho'obo' bíin jóokesa'aco'ob, bíin tojolch'inta'aco'ob xan ti'.