Read Yucateco Proverbios 20 Bible Online

Proverbios 20 - Yucateco bible

Proverbios 20

¹Vinoe' cu tu'ubsic u subtal wíinico'obo'; cu léecsa'al tumen ukul cu cáalcunaj; yéetel u cáalcunaje' mix máac u yojel ba'ax cu beetic.

²Jun túul ajaw p'uja'ane' bey jun túul león cu yáacame'; le máax p'u'usique' cu dzáic u cuxtal tu chi' quíimil.

³Tziiquil u ti'al wíinic u wet'ic sacach t'aano'ob, ba'ale' je'el máaxac j ma' na'ate' cu páajtal u léecsic.

⁴Tu kiinil u péecsa'al lu'ume' máakole' ma' tu péecsic lu'um; ba'ale' le quéen kuchuc u kiinil jooche' mix ba'al bíin u nactáante.

⁵Mucul tuucule' bey tamcach ja'e', ba'ale' máax yaan u na'ate' u yojel bix u caxta'al.

⁶Yaan ya'ab máaco'ob jaka'an u yóolo'ob tu yo'olal u chuca'an óolalo'ob, ba'ale' ma' tu páajtal u caxta'al mix jun túul cu páajtal u ya'ala'al wa jaaj.

⁷¡Qui' yóolo'ob le paalal cu pa'atalo'ob tumen máax cuxlaj toj yéetel tzicbe'enil!

⁸Le quéen culac ajaw tu káanche'il xot kiine' chéen kabéet ti' jun p'éel paacate' cu míist le kaaso'.

⁹Mix máac cu páajtal u ya'alic: Tene' utz yanil in pucsi'ikal, ma' si'ipilchaja'anen ti' kebani'.

¹⁰Tusub p'iiso'ob yéetel muuto'ob ma' chuca'ano'obe' ca'a p'éel ba'alo'ob cu p'ectic Yuumtzil.

¹¹Yéetel ba'axo'ob cu beetic jun túul táanquelem wíinique' cu yojéelta'al wa toj u cuxtal.

¹²Yuumtzile' tu beetaj: Xiquine' u ti'al u'uyaj, iche' u ti'al paacat.

¹³Ma' u máan kiin táan a wenel, tumen je'el u yóotzilcuntiqueche'; máanac teech kiin p'ila'an a wich u ti'al ca yanac teech ya'ab ba'al a jaante.

¹⁴¡Jach kaas le ba'ax cu co'onolo'! cu ya'alic le máax maano', ba'ale' le quéen dzo'ococ u maane' tu juunal cu qui' óolticubáa.

¹⁵Máax cu t'aan yéetel ojéelaje', asab ma'alob ti' tuláacal le oro yéetel ti' u ayikalilo'ob yóokolcaab.

¹⁶Máax cu cuchic u p'aax yaanal máaque', u naj u lukesic u nook le máaco' ca ch'a'a bey páay ooquile'.

¹⁷Wíinique' utz tu t'aan u náaysic u yóol yéetel tuuso'ob, quex ca suunac ti' bey chéen jun níich'il u waajil lu'ume'.

¹⁸Ba'axo'ob cu tuculta'al beeta'ale' cu kax t'anta'al yéetel jun p'éel ma'alob tzol xiquin; ba'atele' cu nu'ucta'al yéetel jun p'éel ma'alob na'at.

¹⁹Máax cu ki'itbesic tzicbale' ma' u yojel mucult jun p'éel t'aani', le t o'olale' ma' nupicabáa yéetel máaco'ob cu ki'itbesico'ob tzicbal.

²⁰Máax cu loolob t'antic u taata yéetel u maamae', bíin quíimic ichil u talam sajaquil éekjoche'enil.

²¹Le ba'ax chéen ch'a'abil u najmatale' tu dzooque' ma' tu dzáic qui'imac óolal.

²²Mix bikin a tzibaltic, wa bíin a sut le kaas cu beeta'al ti' techo'; alab wóolt Yuumtzil, le ti' bíin u beet a jóokol utzil.

²³Yuumtzile' u p'ectmaj u meyajta'al p'iiso'ob ma' chuca'ano'obi'; p'iiso'obo' ma' chuca'ano'obe' p'ecbe'eno'ob.

²⁴Yuumtzile' leti' nu'uctic u beel wíinic; mix máac u yojel ba'ax bíin úuchuc ti'.

²⁵Yaayaj ba'al u ti'al wíinic u séeb chi'itic wa ba'ax ti' Ku cu dzo'ocole' cu sen tucultic u séeb chi'.

²⁶Ajaw yaan u yojéelaje' cu náachcuntic tu táan le j loolob máaco'obo' cu puch'ico'ob xan yáanal jun p'éel sutub che'.

²⁷Le pixan u dzaama Ku ti' wíinique' sáasil u jul tu jach taamil u cuxtal.

²⁸Ajawe' jéedzel yanil tu jalach káanche' wa cu yaacunaj yéetel cu dzo'ocbesic u jaajil.

²⁹U nonoj báil le táanquelemo'obo' ti' yaan tu muuko'obe' u tzicbe'enil nuxibo'obe' ti' yaan tu saquil u poolo'obe'.

³⁰Kasa'anile' cu dza'acal yéetel yaayaj loobilo'ob; yaayaj ba'alo'ob beetic u yutztal le tuuculo'.