Read Yucateco Proverbios 23 Bible Online

Proverbios 23 - Yucateco bible

Proverbios 23

¹Quéen u t'anech janal jun túul nojoch dzuule', tucult ma'alob tu táan máax yanech.

²Quex tumen sen wi'ijeche' mukyajt u taaquil a janal;

³ma' a dzíiboltic u qui'iqui' janalo'ob, bic xi'ic u ta'absech.

⁴Ma' a yamyamtic a ayikaltal, p'at a sen tucultic ba'al beyo'.

⁵Tumen wa ca tucultic ma'alobe', ca wilic mina'an ayikalilo'ob; tu séeblaquil cu xiknalo'ob, beyo'ob aguilaob, jóokol cu beetic u xiiko'obe'.

⁶Ma' a cutal tu chuun u táasche' jun túul wíinic dzu'ut, mix a dzíiboltic u qui'iqui' janalo'ob,

⁷tumen beyo'ob jun cúul tzo'otz tu beel a caale'; cu t'aniquech janal yéetel ukul ba'ale' ma' jach tu jaajil yóoli',

⁸mix ba'al u biilal u qui' t'aano'ob tumen cu dzo'ocole' ca xéic le ba'ax ta jaantajo'.

⁹Ma' a t'aan naadz ti' u xiquin j ma' ojéelajo', tumen a ojéelaj t'aano'obe' je'el u p'a'astique'.

¹⁰Ma' a kexic u cúuchil úuchben xu'uko'ob, mix a wocol ichil u lu'um le ma' taataobo',

¹¹tumen leti'obe' yaan jun túul u aj páajtalil tocsajil bíin jóokoc ba'atel ta wéetel u ti'al u toquico'ob.

¹²Dzáa a tuucul ch'en xiquint xan ti' le cáajsajo'ob yéetel ti' le kaj óolalo'oba'.

¹³Ma' u jáawal a tzol xiquintic le táanquelemo' tumen yéetel tzol xiquino'obe' ma' ta quíimsic;

¹⁴ba'ale' wa ca tzolic u xiquine' bíin a toc ti' quíimil.

¹⁵Quéen yanac ti' teech le ojéelajilo' in j xibil, ma' bíin yanac u láak máac asab qui' u yóol je'el bix tene';

¹⁶bíin qui'imacchajac in wo'ol quéen in wu'uy a t'aan je'el bix u najmale'.

¹⁷Ma' dzíiboltic le aj kebano'obo' mantadz dzáa tziiquil ti' Yuumtzil;

¹⁸beyo' bíin yanac ti' teech u xuul jun p'éel ma'alob cuxtal, a pa'atajile' mix bikin bíin xu'ulsa'ac.

¹⁹In j xibil paal u'uy ma'alob can xan; dzáa a wóol a xíimbaltic le ma'alob bejo'.

²⁰Ma' a nupicabáa yéetel le cala'ano'obo' mix yéetel le sen ya'ab u janalo'obo',

²¹tumen le cala'ano'ob, yéetel le ya'ab u janalo'obo' cu yóotzitalo'ob, ma'akóolo'ob xane' cu búucbesico'ob tzi'itzi'ic nooko'ob.

²²Táan óolt a taata, máax tu beetajech; ma' a kex óoltic a maama le quéen x núucac.

²³Man ba'ax jaaj, man xan ojéelajil, canbal yéetel le ch'a'a nu'uctajile', ¡ma' xan a conic!

²⁴U taata le paal utz yéetel aj ojéelaje' yaan ba'ax óolal u qui' óolta'al yéetel u yu'ubicubáa nojoch ba'al;

²⁵¡beet túun, u qui' óoltalo'ob yéetel u yu'ubicuba'ob nojoch ba'alo'ob, a taata yéetel a maama!

²⁶Dzáa tuláacal a wóol ti' teen in j xibil paal, il ma'alob bix in cuxtal;

²⁷tumen le yaanal co'olel yéetel le x cáacbacho', beyo'ob taamtam nu'ut' ch'e'ene';

²⁸cu dzicubáa j ch'úuc bey j oocole', cu beetic u sa'atal yóol ya'abcach xiibo'ob.

²⁹¿Máax cu mukyaj? ¿Máax cu yáacam? ¿Máax cu máan ich ba'atel yéetel okol t'aano'ob? ¿Máax cu beeta'al loob ti' x ma' si'ipilil? ¿Máax budzucnac u paacat?

³⁰Le máax ma' tu p'atic le cáaltalo', táan xan u yilico'ob bix bíin u xa'akto'ob u yukulil u cáaltalo'ob.

³¹Ma' a sen pactic le vino. ¡Cu chachac léembal ichil le vaso! ¡Jach séeb u jalkajal!

³²Ba'ale' tu dzooque' bey u chi'ibal jun túul caan cu beetic u ki'iname'.

³³Bíin u beet a wilic ba'alo'ob jela'antac, a tucultic yéetel a wa'alic chéen binqui' ba'alo'ob;

³⁴bíin u beet a tucultic ti' yanech yóokol u taamil ka'anabe', ch'uyucbalech tu noj che'il jun p'éel cheeme',

³⁵bíin a wa'ale': J kola'aben ma' tin wu'uyaji'; ja'adzene' ma' tin wojéeltaji'; ba'ale' quéen jóomoc u wóole' bíin xi'iquen in caxant u láak vino.