Read Yucateco Proverbios 24 Bible Online

Proverbios 24 - Yucateco bible

Proverbios 24

¹Ma' a dzíiboltic u cuxtal j loolob wíinico'ob mix a yaayamtic a wantal ichilo'ob,

²tumen chéen cu tucultico'ob meyaj loob ma' tu t'aano'ob wa ma' u ti'al u beetico'ob loob.

³Yéetel ojéelaj cu beeta'al naj, yéetel kaj óolale' cu dza'abal u chuun pakil;

⁴yéetel kaj óolale' cu chu'upul u káasab najilo'ob yéetel jadzutz co'oj ba'alo'ob bey xan yéetel ba'alo'ob utz ta wich.

⁵Wíinic yaan u yojéelaje' Asab ma'alob ti' mu'uka'an wíinic; ca'anbesajile' asab ma'alob ti' páajtalil,

⁶tumen ba'atele' cu beeta'al yéetel ma'alob tuucul, u béeychajale', u ca'aca'aj ti' ya'ab aj tzol xiquino'ob.

⁷J ma' ojéelaje' ma' u yojel ba'ax bíin u ya'al tu najil p'is óoli' tumen ojéelaje' náach yanil ti'.

⁸Máax chéen cu tucultic u beetic loobe', cu najmaltic u ya'ala'al ti' j kaakas tuucul.

⁹U tuucul j ma' ojéelaje', u keban ¡mix máac cu yóoltic antal tu yicnal j ma' subtal!

¹⁰Wa cu lúubul a wóol le quéen a wilabáa ich talamile', cu yúuchul tumen jun p'íit a muuk.

¹¹Toc le máaxo'ob xot kinta'ano'ob quíimilo'; toc le máaxo'ob ti' yano'ob tu chi' quíimilo'.

¹²Tumen quex ca wa'al ma' a wojel ca'ache', máax u yojel ba'ax o'olale' leti' bíin u yojéelte; bíin u ma'alob ojéelt le máax ch'úuctiquech le máax bo'otic jujun túul je'el bix cu najmatique'.

¹³In j xibil paal jaant u ch'ujuquil u paak le caabo'; túunt buca'aj qui'il.

¹⁴Bey bíin a wu'uy u ch'ujuquil le ojéelajo' yéetel le kaj óolalilo'; wa ca nactáantico'obe' bíin xi'ic teech utzil a pa'atajile' mix bikin bíin xu'ulsa'ac.

¹⁵Ma' a patic ta pool loolob tuuculo'ob u ti'al a beetic kaas ti' utzil máac, mix a ch'ejic ba'alo'ob tu'ux cajacbal,

¹⁶tumen quex lúubuc siete u téenele', bíin líikic buca'aj u téenel tu ca'a téen; ba'ale' le loolob máaco'obo' bíin mu'ucuco'ob ichil u numyajilo'ob.

¹⁷Ma' u qui'imacchajal a wo'ol mix a kiinbesic u t'óochpajal yéetel lúubul a aj p'eec,

¹⁸tumen Yuumtzile' ma' utz tu yich u yilic ba'al beyo', u p'u'ujul túune' bíin u tzelubáa ti'.

¹⁹Ma' a kuuxil tu yo'olal le loolob máaco'obo' mix a dzíiboltic kaakas cuxtalo'ob,

²⁰tumen le loolob máaco' ma' bíin xi'ic utzil ti'i': ¡le loolob máaco' bíin tu'upuc bey jun p'éel x t'uchub sáase'!

²¹In j xibil paal qui'iqui' t'ant Ku bey xan le ajawo'; ma' a much'icabáa yéetel le aj p'eeco'obo',

²²tumen u ch'e'ejele' bíin kuchuc jun súutuc mix máac xan u yojel ba'ax jaadzil bíin u dzáa Ku, yéetel le bíin u dzáa ajawi'.

²³Bey xan le je'elo'oba' u cóomcom ca'anbesajo'ob aj ojéelajo'ob: Ma' utz u mixba'alcunta'al mix máac tu najilo'ob p'is óoli'.

²⁴Máax jáalkabtic máac yaan u si'ipile', cu loolob t'anta'al tumen le caaj, cu kex óolta'al xan tumen u láak caajo'ob;

²⁵ba'ale' le máaxo'ob cu beetico'ob u bo'otico'ob u si'ipilo'obe' cu bin utzil ti'ob caaj xane' cu yutzil t'aan yo'olalo'ob.

²⁶Je'el bix u dza'abal jun p'éel dzu'udz ti' máac tu chi'e', bey le máax u yojel ma'alob núuc t'aane'.

²⁷Táan óolt a baluba'ob j bej, beet xan u meeyjulo'ob a cool, cu dzo'ocole' beyo' je'el u páajtal a beetic a najile'.

²⁸Ma' a chéen tac pool tu yóokol a wéet wíiniquil mix a wa'alic wa jaaj jun p'éel tuus.

²⁹Mix bikin a tucultic a sutic u jeel loob, ti' máax tu beetaj ti' teech beyo'.

³⁰J máanen tu cool máakol wíinico' j máanen xan tu x péet pach le j ma' dzo'omelo':

³¹ba'ax tin wilaje' jun p'éel lu'um loob yéetel ki'ix, u cootile' láaj jeenel.

³²Le ca tin wilaje', tin t'ilcuntaj tin tuucul; tin wilaj, ca tin canaj u ca'ansajil:

³³ca'aliquil táan a wayake' yéetel táan a niiquibe', ca méekic a kab u ti'al a ma'alob wenele',

³⁴le óotzililo' bey jun túul j ma' beele', bíin talac u pulubáa ta wóokol yéetel u nu'ucul ba'atel.